Pêx xênhv Poz Ziz Sơn La muôx ntâu txux chi lov jêv jông saiz, hâur ntơư, muôx cêr por poz. Luz poz tâu pox niav Poz Ziz cxais têx txơưx xơưk đros trâu ntâu zav xiv, hâur plơưr poz zos ntiv nôngz blêx, pax, lok sik suôz jêz, muôz ntâuz krưr xơưk đros trâu tuôx tư, thâuv laiv poz thiax za muk trơưk li cêr xav por. Yar poz zos têx tiax lox đar, plơưr tiax cxok iz tus nxêz trâu đruôz đraz tiax, uô iz vox sâuv tus ndêx nxêz chia phiar, laiv poz cov gas. Lênhx nênhs phiar poz siaz, sir jos cov gas luz vox đros trâu cêr chia siaz trâu shông yiaz zuôr muôx ntâu cêr lov jêv.

Côngv trâu têx hâux lưv ntơưv jâus Gruôv pax Chaix pax huôv tsar tơưs thành phố Sơn La shông 2023, muôv Phạm Thu Giang, kruô nuôv zax nhoz thành phố Hà Nội tuôx, haik tiak: Cêr jông siaz yax tiv phiar poz gas vox. Tsik zos zuk iz lênhx xưz, mak cxuô tus puôr lênhx đros shir phaz. Ntơưv no zos jâus xuz thơưx cur tuôx txos Sơn La, tâu côngv têx cêr lov jêv, txux chi pêx xênhv ntơưv no tênhx tus, cur pov lok sik jông njia, tsik plox hâur đruôz siaz.

Jâus Gruôv pax nox mor blêx yiaz ntơưv xã Ngọc Chiến, huyện Mường La, tâu kriz hâur luz 9 hli nhuôv kruôr đhâu, têx txux chi pêx xênhv tênhx tus tâu xã kriz đuô thiaz muôz lês trâu phênhv cêr lov jêv tov kaz jâus lais đaz mor blêx yiaz ntơưv tsêr txi đaz Đon Hó, jok  Mường Chiến. Tsik muôx tsêr lox jông, tsik tsêr tsar yar tiax, tsuôk zos lês trâu têx thax trôngz đo, lok sik têx jêk liax, taz sik têx txux chi uô si pêx xênhv tus cux tâu kriz uô lov jêv ntưk.

Txux chi uô si Ngu Kin Khiết (tsênhv tâu hu uô jax naz muk sâuv huôz chuô) tâu tror kriz đros jâus gruôv pax nox mor blêx yiaz đros trâu têx paz nênhs tưr muôx txir nênhx, pox niav nhoz têx jêx jok hâur xã tuôx côngv. Uô si zôngx ziv taz sik cuz siaz jông trâu nênhs tuôx saiz txix têx jâus siz châuv, uô trâu sơưr đơưk luôs, jông siaz.

Đros ntơư, têx hluôs gâux, hluôs đrâus  hnar tsôngk uô jav sênhk zos zuk zav nênhs tênhx tus, ndơưk txir lưk pax xưz cux uô trâu ntâu nênhs saiz cxơưz jos, buôx têk nxiak.

 Zơưs Bùi Tiến Sỹ, Bí thư Đảng ủy xã Ngọc Chiến, thav pâuz: Gruôv pax shông no pêz kriz trâu hnuz so xiaz 2/9. Chia cov muôx kror hlôngr yiaz, lês tâu jông trâu sơưr đơưk tuôx saiz txos têx txux chi gruôv pax đrav ntêx, pêz tưz kriz jâus tưr fơư tưv jông gâux, kho kriz têx txux chi pêx xênhv tênhx tus đros trâu cêr txuôs tsês thiaz huôv nzir têx nux gri txux chi cênhz cưv ntơưv cxuô hair nênhs; cxiv kho iz kro cêr uô si pêx xênhv tus zos iz zav txux chi nuôv zax trâu têx kruô ndis saiz, kria lol sâuv trôngx têz, tiz nênhs, cêr đaz cêr kruô ntơưv tsôngv pêx xênhv cxuô hair nênhs xã Ngọc Chiến kriz trâu têx kruô saiz.

Zos nhoz li por poz, muk tơư nênhk, ntâuk txir toz, tưr cxov njêk zos têx txux khênhr lês ntơưv têx cêr gruôv pax ntơưv pêx xênhv Poz Ziz, mak tuôr nduôr blêx, ntâuk vêx vôngs, njuôk jos khênhr tâu kriz trâu têx hnuz gruôv pax zos txux chi tiz nênhs Hmôngz. Hâur ntơư, ntâuk vêx vôngs zos txux chi pêx xênhv tus jông yax pov njôngr cêr khar nxias ntơưv txir nênhx Hmôngz. Uô ntêx, nênhs ntâuk vêx vôngs tsuv bax luz vêx vôngs thiaz hluô tso vêx vôngs. Têx vêx vôngs tâu txuô, hliar tơư juôs txix têx zav ntông tơưr, li ntông far tôngx, phax chaz. Txox hluô vêx vôngs zos muôz hluô ntuôs xuôz. Thâuv ntâuk vêx vôngs mak ntâuk chor jux juk, đêz juk, ntâuk trâus luôs vêx vôngs zuk luz tsênhv cir sêv zênhx luz tso mak thiax zos tus zênhx. Zôngx ziv li taz sik tus nênhs ntâuk tsuv muôx đas jos thiaz tsưr ziv, viv li thâuv ntâuk, lênhx tưs tâu saiz cux lov jêv đros têx nênhs ntâuk vêx vôngs thiaz nênhs ntâuk uô tiz jông saiz têx tês ntâuk jông, njuôk tsov ndax thiax trâus.

Têx shông đhâu, Sở Văn hóa, Thể thao thiaz Nuôv zax tưz cxơưz paz têx huyện, thành phố  kriz thiaz lês têx cêr nthuôr txux, uô si pêx xênhv tus, tưr uô thể thao cênhz cưv ntơưv zuk thax tsav hâur têx jâus gruôv pax hâu shông yiaz, gruôv pax txux chi - thể thao, txux chi pêx xênhv cxuô hair nênhs; yênhx shông tỉnh puôr lênhx kriz uô thể thao tưr têx zav thể thao cênhz cưv ntơưv pêx xênhv, li: Njuôk jos, tuô nênhr, truz hluô...

Têx huyện, thành phố tsi njênhk trâu têx zav muôx txơưv yênhx thax tsav, yênhx hair nênhs chia cxiv tsa kriz têx cêr uô si pêx xênhv tus fiv huv; zok nriar nzir thiaz kho đuô iz cxia txux chi pêx xênhv chia cxaz nzir ntâu trâu têx txux chi hâur zuk thax tsav.

Txix li zos pêx xênhv tênhx tus xuôk têx kria, ndâux kria, têx txux chi xưk li zuôr plox jux juk trâu hâur ntu têz qơưk hlôngr yiaz. Hâux lưv kho đuô, tsưx tsês thiaz huôv tsar nzir têx pêx xênhv tus zos hâux lưv lês thiaz kror moz siaz ntơưv têx cấp, têx ngành, nov hâu zuk thax tsav.

Taz sik, têx thax tsav tsuv xair tsov têx txux chi trơưk li cêr uô têz, uô qơư, pov njôngr txux chi tsưr ziv, muôx kror jông thiaz cơưv shâuv cxaz nzir đas jos, tsuv tso tsês têx txux chi tsik nhaz xênhz, tsik muôx liv./.