Tsa yênhx trâu luz 9/2021, muôx 9 lênhx thành viên, HTX Dược liệu núi zuôr têx kok lâuv liaz, linh chi, txir tuôz ziz, điz iaz, bồ kết, jiz mur lok uô yênhx yuôx muôs... Car shênhv têx zav muôx txơưv hâur thax tsav no, HTX tưz njuôk tsov, uô tơưv ntâu zav huv zênhv hnuz zênhv fiv huv têx nênhs sir zôngv.

Pos Lò Thị Chuông, Giám đốc HTX Dược liệu núi, haik: Xã Mường La muôx zuôr luôs 200 ha txir tuôz ziz, taz sik phênhv ntâu zos muôs nhôngk xưz tsik truôx njês, cux tsik tâu gri. Txix têx cêr chia siaz uô chak cov têx kôngz no muôs tâu gri, HTX tưz njuôk tsov kra txir ziz kruôr cov tsês tâu ntêr, thiax muôs tâu gri. Têx txir tuôz ziz thâuv xair tâu cxôngr uô đaiv jiaz kruôr, ciz cov gis jav uô hmôngr mok ntiv uô yênhx hnaz. Têx hmôngr txir tuôz ziz kruôr lok six tsư ha, muôx iz tsok kâuz txêr sơư trâu iz tsok kaz jiz liax, zôngx ziv sir zôngv. Shông 2023, zav yuôx zêx txir tuôz ziz tưz tâu côngk nhav OCOP 3 luz pax hnuz kuz thiaz shông 2025 tror tâu côngk nhav đuô, chuôz nzir đas jis trâu HTX piar muôs hax huv trâu têx nênhs sir zôngv.

Tsik zos uô têx hax huv yuôx zêx txir tuôz ziz thiaz yuôx xưz, HTX tror njuôk tsov, siz khov đuô uô tơưv têx hax huv zos yuôx chia huôv tsar têx hax huv yuôx tsâus plâuz hâu thiaz cxơưz iz chê, lar haik mak zav yuôx jơưr plâuz hâu tâu uô txix txir tuôz ziz. Đhâu ntâu lưv siv, HTX tưz uô yênhx hưx yuôx muôs uô lax luôv. Iz chas ntơư, HTX tsênhv uô tơưv têx yuôx tsâus plâuz hâu bưk, yuôx đa đêx, yuôx nzuôr muôs, yuôx tsuôs zus plâuz hâu thiaz ntâu zav yuôx zos zôngv têx yuôx muôx txơưv.

HTX cxưx nhiax uô vax tsê, zuôr chuôz zênhx jov, máy tưx liv, lâux câuz, njuôk tsov hna trâu, uô bê ntơưr lo trâu hax huv. Iz chas ntơư, đros têx ziv pêx xênhv chos yuôx hâur xã siz khov zuôr yuôx trơưk chaix. Fênhx đraz iz shông, HTX zuôr tas txix 10 tấn yuôx cxuô zav lok tu yênhx hax huv muôs. Shông 2023, HTX tâu UBPX huyện Mường La kuz paz 200 triệu nhiax uô hnaz ntiv, uô logo cxiv tsa bê lax luôv, mã kria mênhx qơư uô tơưv thiaz kria tsưr ziv uô yênhx hax huv, iz thênhv jux juk uô yênhx hax huv jông zôngx ziv cxênhz tâu bê lax luôv.

Chox hax huv muôs txos kruô sir zôngv, HTX piar muôs têx hax huv đhâu mạng xã hội: Zalo, Facebook, TikTok; đros trâu livestream piar muôs hax huv, côngv têx jias cơưv, saz lax, kriz ciaz lax luôv thiaz gra têx hax huv muk muôs ntơưv têx qơư nuôv zax hâur tỉnh thiaz oz chas. Muôs huv trơưk iz txưv thiaz muôs trực tuyến puôr lênhx tâu lês siz luôs jok, paz HTX kriz đar cêr luôv, tsar nzir kruô zênhv hnuz zênhv chôngz.

Ntơưv hnuz grâuv pax cà phê Sơn La jias tiv oz shông 2026 nhiv kruôr đhâu, HTX Dược liệu núi qar thaz nzưr muôx lok six chôngz pêx xênhv thiaz kruô nuôv zax zuôr huv. Hâur 5 hnuz grâuv pax, HTX muôs tas yax 400 gơưv yuôx jơưr thiaz tsâus plâuz hâu, 1.200 zav yuôx đa đêx, yuôx nzuôr muôs thiaz yuôx tsuôs plâuz hâu bưk, muôs txix 30.000 txos 320.000 nhiax. Niav lâuk Tặng Thị Hương, phường Thảo Nguyên, haik: Cur tưz sir zôngv zav yuôx jơưr plâuz hâu txir tuôz ziz ntơưv HTX lơưv cux fiv huv. Thâuv jơưr tas, plâuz hâu bưk, tsik yuô muôx plfơưk thiaz tsik khâuk toz hâu, li ntơư hnuz no cur tror zuôr muk zôngv. Cur cux zuôr nzir yuôx đa đê thiaz yuôx tsuôs zus plâuz hâu ntơưv HTX muk zôngv.

Txix thâuv hâu shông txos nhiv no, thâuv xav tas têx nhiax zuôr cxuô zav, HTX sâu tâu 300 triệu nhiax tsav. Pov njôngr hâux lưv uô cxuô zav yuôx thiaz piar muôs huv taz tov iz thênhv jux juk nthuôr huôv tas têx zav muôx txơưv, chuôz nzir đas jos chia HTX tror kriz đar cêr lax luôv. Iz chas ntơư, cêr lax luôv ntơưv HTX tsênhv paz trâu 4 tus nênhs muôx hâux lưv uô tsik tu nduô thiaz 15 - 20 tus nênhs uô hâux lưv trơưk chaix.

Niav lâuk Hoàng Thị Thiên, nênhs uô hâux lưv ntơưv HTX Dược liệu núi, shir phaz piar kria: Tưz uô hâux lưv ntơưv HTX tâu yax 1 shông no, zos tu têx yuôx nhôngk uô yuôx zêx, yuôx jơưr plâuz hâu thiaz livestream piar muôs huv. Hâux lưv truôx njês, muôx nhiax paz vax tsê thiaz zuôr uô hâux lưv trâu HTX ntêr muk.

Huôv tsar hax huv txix têx yuôx muôx txơưv, HTX Dược liệu núi taz tov iz thênhv jux juk cxơưz têx yuôx muôx txơưv yênhx hax huv jông, kriz đar cêr lax luôv, paz pêx xênhv nhoz jêx jok muôx hâux lưv uô, sâu nju nhiax txiax, huôv tsar yênhx hax huv jông.