Đêz đrôngs xã Yên Châu li 15 caik, Phiêng Khoài muôx ntâu vax txir nox, fiv huv cêr  ndis nuôv zax, saiz siv. Iz luz chaix txir siaz, tưz  gas siaz kruô nuôv zax. Tix lâus Lò Văn Vinh, tiểu khu 19/5, xã Yên Châu, thav tiak: “Cur khênhr tuôx trâu Phiêng Khoài têx hnuz kaz tuần đros ziv nênhs thiaz fôngx zưs. Nhiav cxaik zênhx zav, chia tsês têx ntu jông đhâu têx đaiv zênhx zav. Iz jâus tuôx txos Phiêng Khoài, cur muôx iz kro cêr ndis cax siaz, yax hlo mak chaix txir siar, thâuv tox trôngz hâur pêk hlôngr chaix trơưk yênhx ntu”.

Ntơưv thôn An Hưng, vax txir thênhx caz ntơưv Đinh Văn Vân ziv nênhs, thành viên HTX Kiên Cường, zos iz hâur têx qơư muôx kruô nuôv zax gas siaz ndis saiz. Muôx li 500 tsoz txir thênhx caz Navel txuôk trâu txir lưk jôngr, chos shông 2020, taz tov zos chaix đê thiaz yax 500 tsoz chos yiaz. Shông no, tsov xav đê tâu li 50 tấn txir. Chia paz têx kruô ndis saiz siv tsênhz mênhx, ziv nênhs tưz kriz cêr muk hâur vax thênhx caz, kria tsưr ziv chos, tu saiz txir thênhx caz thiaz tưx zuk cxaik têk đê txir nox siv. Txir thênhx caz tâu muôs cias ntơưv vax tâu gri 60.000 đaiv nhiax/chiaz. Đhâu ntơư, ziv nênhs to cêr yâu mông kôngz txir, kriz đar ntu muôs thiaz iz truôv jux juk uô kôngz txir đros trâu kriz cêr nuôv zax ndis saiz.

Zơưs Đinh Văn Vân, thành viên HTX Kiên Cường, thav tiak: Txir thênhx caz Navel, txir lox, tơưr nhiak, muôx cuô, tsik muôx nôngz, kaz jiz thiaz tsư ha txơưr hlo. Zav txir thênhx caz no muôz chos trâu Phiêng Khoài zos txuôk trâu txir lưk jôngr. Đhâu chos, hloz jông fiv huv huôz chuô, đêx ar thax tsav no, paz nênhs chos muôs tâu ntâu nhiax txiax.

HTX Kiên Cường nhiv no muôx li 10 ha txir thênhx caz Navel, zov chênhr txuôk hâur pâuk txir lưk jôngr. Hâur cêr uô tơưv, têx ziv thành viên saiz hloz sir zôngv qir trâu hữu cơ, têx zav đrox tsuôs uô tơưv thiaz sir zôngv tsưr ziv tu saiz fiv huv, paz max tâu jông. Muôv Nguyễn Thị Nguyệt, Phó Giám đốc HTX Kiên Cường, xã Phiêng Khoài, thav pâuz: Txir thênhx caz fiv huv huôz chuô, đêx ar thax tsav, đê tâu nju kaz; tsưr ziv chos thiaz đas jos tu saiz tsik tas ntâu  njuôk li iz cxia txir thênhx caz txơưr. Tâu nênhs zôngv kruôk nxiak, muôs tâu li 50.000-70.000 đâiv nhiax/chiaz.

Xã Phiêng Khoài nhiv no muôx li 50 ha thênhx caz Navel, hâur ntơư 20 ha tưz tâu đê truôx njês, nju txix 20 - 25 tấn/ha. Shông no, têx txir thênhx caz tas nro hâur xã tsov xav sâu tâu 500 tấn. Đê txix đraz hli10 txos hâu shông tov kaz hâur ntâu hli, paz têx nênhs chos côngv yâu mông, muôs kôngz txir đros trâu tok kruô ndis saiz, siv trơưk chaix, iz thênhv jux juk huôv tsar nuôv zax  đros uô kôngz txir.

Zơưs Nguyễn Văn Toàn, Phó Chủ tịch UBPX xã Phiêng Khoài, thav pâuz: Thax tsav no xav huôv tsar txir thênhx caz đros cxuô zav ntông nox txir; zaz zâuv pêx xênhv kriz đar vax chos fiv huv cêr xav, sir zôngv khoa học kỹ thuật hâur tu saiz thiaz phax tar caz hmoz hiav. Đros ntơư, xã côngv cxiv tsa bê lax luôv, tok txos fiv huv têx cêr xav VietGAP, OCOP thiaz fuô lês tâus tâu qơư uô tơưv txix mã QR, iz thênhv jux juk yôngv siaz zav txir kaz, nto mông thiaz muôx cêr siz tưr muôs trâu cêr pâur muôs.  

Kriz đar cêr pâur muôs txir thênhx caz Navel, xã Phiêng Khoài cxiv tsa cêr xav txuôk chuôs têx nênhs xav tơưv njiaz luk, nênhs muôx côngz hâur mạng xã hội côngv lês livestream muôs huv hâur TikTok, Facebook; kria lưv ciz uô tơưv, đê txir thiaz ntiv hnaz. Đhâu têx tsưs số, têx txir thênhx caz Navel thiaz thax tsav chos Phiêng Khoài muôx cêr chuôs têx kruô, kriz đar qơư pâur muôs.

Chaix txir thênhx caz Navel muôs tâu nhiax trâu nênhs chos, kriz cêr huôv tsar nuôv zax ndis saiz ntơưv Phiêng Khoài. Txix li chos tâu txir kaz, kriz đar cêr pâur muôs thiaz kriz tâu muôx liv têx cêr txơưv zênhx nuôv zax vax txir, thax tsav no taz tov iz thênhv jux juk yôngv siaz gri kôngz txir, yâu mông njux đuôz thax tsav đriv têz, chuôz jos huôv tsar nhiax txiax truôx njês./.