Yênhx shông, Sở Txux chi, thể thao thiaz Nuôv zax (VHTT&DL) đros Sở Dân tộc thiaz Tôn giáo cxênhz yuôx, phaiz nzir nhiax ntơưv Cxiax cxênhv 1719 chia lês têx nuv tsưx tsês thiaz huôv nzir nux gri txux chi cênhz cưv đros đraiv huôv tsar nuôv zax. Gruô hu tsôngv nênhs sơưr đơưk lês hâur tsưx tsês, huôv nzir nux gri txux chi cênhz cưv; tsik so choz kria, cxaz nzir têx công chức txux chi xã jok, cưk txux, nênhs muôx côngz nto bê hâur kria thiaz tsưx tsês nthuôr txux pêx xênhv tênhx tus; huôv tsar têx huv nuôv zax txơưr hlo, cxiv tsa njux đuôz txux chi  Sơn La cxix cxuô têx txux, gas siaz têx kruô nuôv zax hâur zuk thiaz luôs têz qơư.

Hâur ntu 2021-2025, Sở VHTT&DL đros têx thax tsav kriz 17 paz nênhs cơưv nzir, cxaz nuv chuyên môn, kria txux chi; tsov xav, por hưv têx chas txux nziv zuôr plox muk, li Gruôv pax Mợi ntơưv nênhs Mêx Jênhx, ntâuk vê vôngs thiaz tuô hnênhr ntơưv hair nênhs Hmôngz; cxiv tsa qơư nox nhoz txux chi hair nênhs Hmôngz ntơưv xã Vân Hồ, hair nênhs Poz Ziz ntơưv xã Yên Châu; tsa tơưv 10 câu lạc bộ txux chi pêx xênhv; paz 70 paz nênhs haik cưr cxiax sênhr chêr cênhz cưv thax tsav pêx xênhv hair nênhs tsơưs. Ngành cux kho sâu, niak tơưv fâu ntơưr yuôz “Jông txux chi cênhz cưv ntơưv cxuô hair nênhs tsơưs tỉnh Sơn La”; “Txuôx tsês thiaz huôv nzir têx nux gri txux chi jông ntơưv hair nênhs Poz Ziz nhoz Sơn La hâur ntu siz khov ntiax têz”. Iz chas ntơư, Sở cux lês kho nzir, tsik chia pôngz nux gri têx txux txuôs tsês: Huôz kas Mường Và, xã Sốp Cộp; Thax tsav txuôs tsês cêr uô têz qơư cách mạng Việt Nam – Lok Tsuôk, xã Phiêng Khoài; Thax txi Huôz taik Lê Thái Tông; Zênhx Mộc Lỵ; Qơư txuôs tsês cêr uô têz qơư Đơưv trôngz Pha Đin. Đros têx cơ quan báo chí, fuô mông uô 2 bộ phim ntơưv qơư nuôv zax têx xã: Ngọc Chiến, Mường La, Tà Xùa, Bắc Yên. Kriz Jâus saz lax cxiv tsa huv nuôv zax thax tsav pêx xênhv nênhs tsơưs thiaz tox siaz; cxiv tsa têx jax sâu mông nuôv zax tso yưv ntu VTV3 Đài xa đuôz Việt Nam; chia cxiv tsa tsưx tsês jok cênhz cưv nto mông ntơưv cxuô hair nênhs tsơưs nhoz jok Tà Số, phường Mộc Châu...

Cux txix li nhiax Cxiax cxênhv 1719, Sở VHTT&DL tưz paz cxiv tsa tơưv tâu 20 jax chai txux chi, thể thao; 576 gơưv chuôz zênhx ntơưv têx jok thax tsav pêx xênhv nênhs tsơưs thiaz tox siaz; cxiv tsa yiaz, kho đuô 191 luz tsêr txux chi xã, jok, xav hur si nhiax uô tas yax 200 tiv đaiv, siz chos paz yôngv tiv tsôngv jok muôx tsêr cơưv txux chi tsôngv nênhs ndê 95,43%, bâuv li 2.320 luz jok muôx tsêr txux chi thiaz muôx paz nênhs cưr cxiax sênhr chêr cênhz cưv.

Xã Ngọc Chiến muôx yax 95% toz hâu nênhs zos pêx xênhv Poz Ziz, Hmôngz, La Ha nhoz uô cê. Lês Dự án txuôs tsês, huôv nzir nux gri txux chi cênhz cưv cxuô hair nênhs tsơưs đros trâu huôv tsar nuôv zax, ntu 2022-2025, xã tưz paz yax 300 triệu đaiv nhiax paz têx paz nênhs haik cưr cxiax sênhr chêr uô nuv; zuôr chuôz  zênhx txux chi trâu têx jok thiaz kriz lês têx cêr Gruôv pax nox mor blêx yiaz, Gruôv pax Pang A ntơưv tiz nênhs La Ha thiaz cêr đaz kruô hu plis tưv... Zaz  zâuv sơưr đơưk  cxiv tsa, kho jông têx qơư nuôv zax txi cêr muôx lênhx, đros txux chi li Tsêr txi Đon Hó; ntông lâuk Sa Mu; Xủ Công; Cốc Nố Xí Tu... xav hur si gri nhiax muôx li 6 tiv đaiv.

Zơưs Nguyễn Minh Tuân, Bí thư Đảng ủy xã Ngọc Chiến, thav pâuz: Xã lês trơưr cêr fuô kria txux pêx xênhv tus, đros iz tus cưk txux haik cưr cxiax Then, 35 tus nênhs haik cưr cxiax Poz Ziz, 51 tus cưk txux ntâuk trax flâux tâuz, 46 tus nênhs yuôx kênhx, 15 tus nênhs yuôz trax, kưr blôngx; nriar nzir 11 jax đaz nênhs uô têz qơư, txux chi thiaz choz kria têx nênhs chox kruô nuôv zax. Ntâu cêr gruôv pax jông tâu tsa  nzir, txix ntơư, iz shông, xã tưz muôx yax 120.000 pưs kruô tuôx nuôv zax, nhiax nuôv zax sâu tâu txix 8-10 tiv đaiv.

Têx nuv uô tâu txix Dự án ntơưv Cxiax cxênhv 1719, tưz siz chos cxơưz paz huôv tsar nhiax txiax - xã hội, yôngv siaz cêr nox nhoz chia siaz ntơưv tsôngv pêx xênhv cxuô hair nênhs. Ntâu thax tsav ndê tsas truôx khor, yênhx qơư nuôv zax gas siaz, cê por hưv, huôv tsar nux gri txux chi, cê huôv tsar nhiax txiax, cxuz cêr pluôs truôx njês, cxiv kho jêx jok yiaz thiaz tso tsês têx kuz txux tsik fiv huv.