Vân Hồ - ndâux cêr tuôx trâu tỉnh Sơn La muôx ntâu homestay zos cưr tix nênhx tsa Hmôngz ntias tus. Hâu ntơư, A Chu homestay nhoz trâu jok Hua Tạt, zos qơư so tâu têx kruô nuôv zax nhiav so, yax hlo zos têx kruô nhoz oz chas têz. Luz tsêr homestay zos luz tsêr ntông cênhz cưv ntơưv cưr tix nênhx tsa Hmôngz luz nênhx, nhoz đros tox trôngz, hâur pêk, đrox tsuôs. Têx qơư nox nhoz lok six zôngx ziv, taz sik pov mênhx tâu têx zav txux chi, cênhz cưv jông ntơưv hair nênhs.

Tix lâus Chu Xênhv Tsaz, tus tsưr A Chu homestay, haik tiak: A Chu Homestay zos moz siaz sir zôngv têx zav txơưr hlo ntơưv Hmôngz luz nênhx, đros trâu têx zav yiaz, chia paz max trâu têx kruô nuôv zax nhiav ndis uô si thiaz muôx txiax njis. Ntơưv no, kruô nuôv zax pov tâu têx zav txơưr hlo ntơưv cưr tix Hmôngz luz nênhx, txix li têx qơư nox, nhoz, kak nox thiaz têx txux chi.

Hok ntơưv Mộc Châu, thax tsav no tưz tsik zos muôx tox trôngz, hâur pêk njuôz xiaz, jông jav xưz, tsênhv gruô hu tâu têx kruô nuôv zax txix li muôx ntâu têx txux chi, cênhz cưv taz tov tâu huôv tsar yênhx hax huv nuôv zax jông txơưr hlo. Mộc Châu muôx 12 hair nênhs nhoz uô cê. Txix ntơư, têx txux chi, cênhz cưv cxuô hair nênhs ntơưv no muôx lok six ntâu zav, yax hlo zos têx cêr grâuv pax, cêr chai đaz kruôk tâu tsưx truôx thiaz nthuôr huôv. Thị xã nhiv no muôx 7 txux chi, cênhz cưv têz qơưk, hâu ntơư muôx 4 zav txux chi, cênhz cưv cxuô hair nênhs nhoz trâu Mộc Châu.

Tuôx trâu thax tsav pak đêx Quỳnh Nhai, thax qơư muôx ntâu qơư nuôv zax jông txix li muôx pak đêx tênhz điện Sơn La. Thâuv hâu shông, Quỳnh Nhai tưz yênhx qơư grâuv pax luz chaix ntux yiaz trâu têx kruô nuôv zax nhoz đêz, jê, tuôx ntơư thax qơư no têx kruô nuôv zax zuôr tâu ndis shuôk qơư ndo txiax njis Ndâux Han, qơư ndo txiax njis Linh Sơn Thủy Từ; côngv cêr grâuv pax siz tưr gruôv gox; côngv Tuần Txux chi, Thể thao thiaz Nuôv zax thiaz têx cêr uô si txơưr hlo hâur thax tsav pak đêx tênh điện.

Têx txux chi, cênhz cưv tâu tsưx truôx, nthuôr huôv tưz yênhx têx zav jông chia huôv tsar nuôv zax ntơư Quỳnh Nhai. Yax hlo zuôr tsuv haik txos têx txux chi, cênhz cưv têz qơưk tưz tâu côngk nhav, li: Cêr grâuv pax Pang A ntơưv hair nênhs La Ha; grâuv pax Xé Pang Á ntơưv hair nênhs Poz Thơưx; cêr chai tsâus plâuz hâu, grâuv pax Kin Pang Then thiaz Tsiaz hli đra ntơưv hair nênhs Poz ziz đơưz... đros trâu ntâu têx cêr grâuv pax txơưr tâu tsưx truôx thiaz nrhuôr trâu têx kruô nuôv zax saiz hâur têx jias nthuôr txux chi - nuôv zax ntơưv huyện.

Tix lâus Đoàn Đông Đức, kruôv nuôv zax nhoz trâu thành phố Hồ Chí Minh, haik pâuz thâuv tâu côngv hnuz Grâuv pax siz tưr gruôv gox Quỳnh Nhai shông 2025: Tuôx ntơưv no, cur pov tâu thax qơư no jông gâux, pêx xênhv lok six nhiav kruô.

Têx txux chi, cênhz cưv txơưr hlo ntơưv cxuô hair nênhs nhoz trâu Sơn La tâu fuô kria đêz đar chia muôx têx zav jông txơưr hlo trâu têx qơư nuôv zax nto mông...Têx cêr grâuv pax, têx jax cưr cxiax, sênhr chêr, tsôngk hnar tưz tâu nthuôr hâur têx hâux lưv nthuôr grâuv pax txux chi - nuôv zax, paz trâu nuôv zax Sơn La hâur têx shông lok no. Hâur 3 hli hâu shông 2025, hur si tỉnh tok tâu 1,76 triệu pưs kruô nuôv zax, sâu tâu 1.985 tỷ đaiv.

Zơưs Phạm Hồng Thu, Phó Giám đốc Sở Txux chi, Thể thao thiaz Nuôv zax, haik pâuz: Sở tưz moz siaz fuô kria, cxaz nzir cêr pâuz trâu têx cán bộ, đảng viên thiaz pêx xênhv lok sâuv por hưv têx txux chi, cênhz cưv. Moz siaz sir zôngv khoa học công nghệ, nhiax txiax số, chia tsưx truôx têx txux chi, cênhz cưv jông ntơưv hair nênhs. Moz siaz cxiv kho đuô têx cêr grâuv pax cênhz cưv jông ntơưv hair nênhs đros trâu huôv tsar nhiax txiax cxuô thax tsav, yax hlo zos huôv tsar nuôv zax.

Txix li 17 zav txux chi, cênhz cưv têz qơưk, 96 qơư cênhz cưv - txux chi, qơư uô si tưz paz muôx nzir ntâu qơư nuôv zax jông trâu thax tsav tỉnh Sơn La. Têx txux chi, cênhz cưv ntơư taz tov tâu tsưx truôx thiaz nthuôr huôv trơưk tsưr ziv jông, cxiv tsa têx txux chi yênhx têx zav sâu tâu nhiax txiax, paz trâu huôv tsar nhiax txiax - xã hội hâur thax tsav.