Iz chas ntơư, Háng Đồng tsênhv zos qơư nox nhoz muôx jông txux chi ntơưv pêx xênhv Hmôngz. Têx luz tsêr ntông chiaz cênhz cưv, têx tsôngk hnar txaix đrâus jênhk tơưs pax riz, suôz kênhx đror saik jiv ntơưv têx jâus gruôv pax “Chaix nênhk đhia sênh lênhk ndis tox trôngz shơư huôz”, têx kar nox kaz xik ndâux tsư ha nzias đros tox trôngz har jôngr...zos têx nux gri txux chi tsiv gri taz tov tâu tsưx tsês thiaz huôv nzir.

Kror đror hâur huôv tsar nuôv zax tsôngv nênhs ntơưv Háng Đồng, tsênhz zos cêr paz max ntơưv têx hluôs nênhs.Nto mông, Câu lạc bộ “Txuôs tsês txux chi jông tiz nênhs Hmôngz” muôx yax 10 tus đoàn viên taz tov hnuz hmo trâu siaz cơưv shâuv đhia kênhx, nria pax ntâuz, ntok ntâuz... Tsik tso tsês ntơưv cêr txuôs tsês têx zav jông cênhz cưv, hluôs nênhs tsênhv cơưv shâuv nzir tsưr ziv kriz cêr nuôv zax, chia kria ntox ndis, yâu mông lok sâuv Tiax Suôz txos kruô nuôv zax nhoz jê, đêz.

Nhiv no, hur si xã muôx li 10 luz tsêr kruô homestay txâuk chai tok kruô tuôx so đhâu hnuz hmo, xav têx nhiax nuôv zax sâu tâu jê 5 tiv đaiv/shông. Têx lêx tsênhv tsik tâu ntâu, taz sik zos cêr chia siaz trâu iz thax tsav muôx trôngx têz tsuôk zos sưv trâu cêr uô liax, têz. Ntâu ziv pêx xênhv tưz truôx siaz cxiv tsa vax tsê, têx qơư uô nox hâuk tiz nênhs tsơưs tus, ntâuz max trâuk gax, siv hâuk yuôx zêx Shan tuyết ntêr shông.

Tix lâus Zênhz Xênhv Thox, jok Chống Tra,thav tiak:Xuz thơưx kriz cêr nuôv zax lok sik cxơưx, viv tsik pâuz thav pêv li chak. Taz sik muôx xã kriz kria nzir, muk cơưv têx qơư kriz nuôv cêr nuôv zax ntơưv Tiax Suôz, Vân Hồ, li ntơư  cur tưz pâuz faz taz kruô, tu tsêr kruô so homestay. Nhiv no, muôx têx hnuz ziv nênhs tok 30-40 tus kruô, cê muôx đaiv nhiax txiax, cê jông siaz viv tsưx tâu tsês thiaz huôv nzir tâu txux chi ntơưv tiz nênhs Hmôngz.

Txơưv muôx ntâu cêr txơưv zênhx, taz sik Háng Đồng cux tsênhv njiz tsik tsơưs cêr chor nhov hâur cêr huôv tsar nuôv zax tsôngv nênhs viv cêr yêz muk lok tsik tâu jông, ntâu ntu cêr muk trâu têx qơư nuôv zax tsik tâu lênhv bê tông, chaix ntux nas bluô blênhr, riaz nênhs. Têx tsêr so nhoz tsênhv tsơưs, tsuôk zos txâuk kro njik trâu txox cêr khov vav. Cêr yâu mông zov chênhr fuô đhâu mạng xã hội, tsik tâu cêr siz chuôs đros têx công ty thâux kruô tsênhv chênhz. Luk haik cux muôx cêr txơưr viv trâu thâuv thav pêv, kria têx kruô nuôv zax. Ntơưv no zos luz cênhz uô chak têx paz cơưv nzir tsưr ziv, lar haik mak têx hluôs nênhs, tsuv khov kriz tsik so thiaz kria toz đuô.

Chia kriz cov tas ntâu cêr txơưv pênhv, Háng Đồng lok sik khov txuôk chuôs hâur têx cêr nuôv zax uô thax tsav. Têx qơư txuôk trâu qơư nto côngz mông li Tiax Suôz, Ngọc Chiến, Mộc Châu... zos nhoz li tâu tuôr xav cxix cxuô, Háng Đồng  pênhv yênhx “sơư tik” tsênhv chênhz hâur cêr saiz nus txos txux chi Kâuv Têz hnuz pôngz (Tây Bắc). Cêr cxiv tsa cêr ntox ndis nuôv zax thôngz jêx jok, kriz têx pưs kruô châuv saiz huôz, nuôv zax kôngz txir - txux chi, kriz đar têx tsêr kruô so homestay zuôr zos faz cêr muk khov muôx.

Đros ntơư, nov hâu thax tsav tror huôv nzir qơư sơưr xav kria, paz pêx xênhv txaik pênhr nhiax xuz paz kriz cêr nuôv zax; choz kria tsưr ziv tâu cơưv, yâu mông njux đuôz trôngx têz. Đros ntơư, khov siz côngv ntơưv têx ngành, têx paz pơưs chia cxiv tsa côngz bê nuôv zax tsôngv nênhs Háng Đồng đros đraiv njux đuôz txux chi Hmôngz jông gas siaz, njuôz – hur – tsênhz mênhx ndax ndênhk.

Hâur cêr xav trâu tov kaz, Háng Đồng zuôr huôv tsar têx zav zuk txơưv zênhx, cov yênhx qơư nuôv zax đros đraiv tsưx tsês txux chi tiz nênhs, siz chos paz max huôv tsar truôx njês, yôngv siaz ntu nênhx nox nhoz trâu pêx xênhv.