Hnuz so tuần tưs sơưr đơưk cux siz zâuv tuôx shâuv ntơưv Tsêr txux chi jok Bướt, xã Xuân Nha, suôz trax suôz đruôk nxê nxênhk sơưr đơưk tuôr têk sênhr chêr lov jêv ntưk, pêx xênhv tuôx saiz lok six chôngz. Niav lâuk Vì Thị Định, Thơưx chox paz nênhs nthuôr txux chi jok, haik: Tuần tưs sơưr đơưk cux tuôx shâuv sênhr chêr, haik cưr cxix Puôz Ziz. Têx cưr cxiax, sênhr chêr no pêz puôr lênhx tưx cơưv trơưk cênhz cưv txux chi Puôz Ziz đros txux chi yiaz chia muk nthuôr trâu sơưr đơưk saiz têx thâuv xã, jok muôx hâux lưv.

Xã Xuân Nha hiện muôx 28 paz nênhs nthuôr txux chi cxuô jêx jok, iz paz muôx txix 8 - 10 lênhx, shâuv tsik so muk nthuôr trâu sơưr đơưk saiz hâur têx hnuz tsiaz, hnuz têz qơưk muôx cxênhx xưv chính trị zov chênhr. Yênhx shông, iz paz nênhs nthuôr txux chi tâu paz 2 triệu nhiax. Iz chas ntơư, xã tưz muôx chai paz tso yar nthuôr txux chi uô lov jêv trâu sơưr đơưk. Txix thâuv hâu shông txos nhiv no, xã tưzốt yar 7 jias muk đros lưv luz xã, cxơưz cêr thôngx siaz, siz tưr nthuôr txux chi cxuô qơư.

Niav lâuk Hà Thị Huyền, thơưx chox paz nênhs nthuôr txux chi jok Nà Hiềng, haik: Têx jias muôx hâux lưv nthuôr cêr lov jêv, cxuô lênhx hâur pêz paz nênhs nthuôr txux chi puôr lênhx uô jông bax cov nzơưk, cov nthuôr trâu sơưr đơưk saiz têx jax sênhr chêr, têx suôz cưr cxiax zos cênhz cưv zuk hair nênhs. Ntơưv no, cux zos iz jias paz nênhs nthuôr txux chi tâu muk siz njiz, siz chos nthuôr cêr lov jêv.

Tâu saiz sênhr chêr, zơưs Hà Đức Dung, shir phaz haik: Cêr lov jêv zos iz zav pêz chia siaz yax. Lênhx tưs cux tok njôngr têx jias nthuôr cêr lov jêv li no, tâu mnôngs têx suôz trax, côngv nthuôr txux chi, cov pêx xênhv sơưr đơưk muôx cêr shir phaz.

Pos Mùi Thị Quyên, Thơưx phòng Txux chi, xã hội xã Xuân Nha, haik: Cêr siz tưr nthuôr txux chi tưz yênhx kror qơư paz pêx xênhv cxuô hair nênhs muôx cêr thôngx siaz, siz chos cxiv tsa luz nênhx tsiv txiax muôx txux chi. Ntu no muk, xã zuôr tror puôz tiz cov cxuô paz nênhs nthuôr txux chi hax zav muôx ntâu cêr shir phaz, đros đraiv cêr siz tưr cxiv tsa  jêx jok yiaz. Cxuô đơn vị siz chos kriz lớp kria nzir txux chi trâu têx nênhs nhiav txux chi; nthuôr cêr lov jêv trâu pêx xênhv saiz.

Cêr siz tưr nthuôr cêr lov jêv hâur tsôngv pêx xênhv jok Xuân Nha tưz yênhx luôs hâux lưv chia cxơưz pêx xênhv luz nênhx muôx cêr shir phaz, cê tsưx hưv thiaz nthuôr huôv têx txux chi trơưk cênhz cưv chax chês hair nênhs tsơưs.