Jâus gruôv pax mor blêx yiaz xã Ngọc Chiến shông 2025 muôx phênhv đaz kruô thiaz phênhv lov jêv. Phênhv đaz kruô zos lais đaz mor blêx yiaz ntơưv Tsêr txi Đon Hó, jok Mường Chiến; Tsêr txi tsoz ntông chiaz, jok Nà Tâu. Txir đaz uô tsâus txos pox côngz zơưv txưr, xênhz têz xênhz qơư, ntux têz, thor por hưv, por zôngv, uô tâu kôngz lông sâu nju, ntu nênhx tâu nox kaz hnar jông, cxix cxuô.

Lais tas ntơưv tsêr txi, têx ziv pêx xênhv bax lais đaz ntơưv nhiak zis nênhs. Tsi njênhk trâu nhiak vax tsê txơưv zênhx chia chơư kruô tuôx côngv lov jêv. Suôx câuv lais đaz, tsưr tsêr zâuv kruô đros nox lov jêv ntơưv huz chơưr xơưk, phôngv côngz têx zav jông yax.

Phênhv lov jêv muôx chôngz tus kruô nuôv zax đros têx jax cưr cxiax sênhr chêr jông haik txos cêr xav “Mor blêx yiaz Ngọc Chiến”, đros ntâu jax cưr cxiax, sênhr chêr, trax zos têx cưk txux thiaz paz nênhs haik cưr cxiax sênhr chêr têx jêx jok ntơưv xã đror nxiak ntưk tox trôngz hâur pêk, kruôk Đảng, Zơưv Hloz Hôx, jêx jok hlôngr yiaz, cêr plênhk gâux đrâus, tox trôngz hâur pêk thiaz nxiaz blêx tsưr ha pur ntia têx đrak liax Ngọc Chiến.

Jâus gruôv pax mor blêx yiaz kriz ndax trâu ntu têx đrak liax tsênhv pur ntia tus đêx Chiến siar đax vos, yênhx đaiv zênhx zav blêx siaz đax jông saiz trâu tox trôngz hâur pêk. Ntơư zos jâus chia yâu mông, kria pâuz, gruô hu tâu kruô nuôv zax hâur zuk thiaz luôs tỉnh tuôx ndis saiz, siv, zok cêr txơưv zênhx cxiv tsa, siz nus, siz khov, huôv tsar ntơưv trôngx têz puôs đrav ntêx Ngọc Chiến muôx ntâu cêr txơưv pênhv huôv tsar nuôv zax.

Jâus gruôv pax mor blêx yiaz xã Ngọc Chiến shông 2025 tâu kriz trâu 2 hnuz (30 thiaz 31/8) ntơưv yar tiax jok Mường Chiến 1, xã Ngọc Chiến đros têx cưr cxiax sênhr chêr, thể thao, cêr uô si cênhz cưv gas siaz, pov njôngr chas txux chi pêx xênhv cxuô zav nênhs tox siaz. Lar haik, txos Jâus gruôv pax têx kruô tsênhv tâu côngv cxơưz jos thiaz uô siv phênhv tưr tuôr cxur blêx yiaz; tưr hnar tsôngk cênhz cưv thiaz kror jông ntơưv têx gâux xưz trôngx têz xã Ngọc Chiến; lês chai đaz kruô "Jâus hu tưv plis" thiaz tưr fơư tưv jông ; tưr cxov njêk, tưr cxiv jêz jông saiz, tưr uô kar nox kaz ... tênhv six trâu têx kruô nuôv zax hâur zuk thiaz luôs têz qơư ndis saiz cov gas siaz.

Nhoz hâur têx hâux lưv Jâus gruôv pax mor blêx yiaz shông 2025, xã Ngọc Chiến tưz kriz Jâus tưr tuôr blêx yiaz cốm cênhz cưv.   

Jâus tưr muôx 7 paz, đros trâu 35 thành viên zos têx cưk txux muôx tsưr ziv ziv. Iz paz tưr bax tsơưs yax cux 3 chiaz blêx blâuv yiaz, đros cxix cxuô têx chuôz zênhx, li: Kror chok, đâux chos, ziak thiaz kror chuz hluôr tơưk. Hâur 60 phênhz, cxuô paz tưr tưz lês tâu kror txơưr, côngv tsưr ziv thiaz siaz siz côngv, kror uô cxix cxuô ntơưv yênhx kror uô cxur cốm: Txix li ciz blêx hâur kror chuz chia chok nxiak siar huv, thâuv tuôr thiaz tsôngr chia uô yênhx luz cxur cốm pluôr txêr, tsư ha thiaz muôx xiv njuôz trâus kror muôs saiz, tsư ha txơưr hlo.

Jâus tưr zos yar uô si chia têx cưk txux nthuôr têx cêr txơưx txux, đros ntơư zos jâus chia kria pâuz, yâu mông têx hax huv thax tsav jê têx kruô nuôv zax đuô, siz chos uô tâu muk đêz đar têx nux gri txux chi cênhz cưv jông fiv.