Muk shuôk zơưs Xưv Xênhv Hav, nênhs zênhx ntâuk hlâu ntêr yax ntơưv jok  Tà Số 1 yax 60 shông lok. Txơưv muôx hnuz nhôngs, taz sik yênhx đâux ntâuk hlâu ntơưv zơưs cux đror uô zênhv lus gis gruôs, muôx jos ho.Têx traz triav, traz hlâu, traz đuôr cxoz zos zơưs ntâuk tơưv tsik zos truôx khor, njê juôs pliak xưz, tsênhv jông gâux txơưr hlo, tâu pêx xênhv hâur jok thiaz kruô nuôv zax nhiav sir. Zơưs Xưv thav tiak: Chia cov uô tơưv têx chuôz zênhx jông, têx nênhs ntâuk hlâu tsuv hla đhâu ntâu ntu ntâuk ntov nti, txix li xair hlâu, txiar hlâu, hlơưr, ntâuk cov yênhx, chênhv caz hlâu, hor, txos trâu uô co thiaz uô hnaz trik triav.

Lưx hlâu Hmôngz uô zôngx ziv, taz sik hlơưr tâu caz hlâu liaz sai, luz kror chuz tsuôk zos muôz ar tias kaz, muôx jêz thair ndis cov truôx. Luz yuôz chuô tso tar njus iz saz luz kror chuz, tâu muôz ntông lox lok txâus khôngz uô, saz hâur muôx tus pak tik plâuz kaiz truz muk lok cov muôx chuô thơưz muk lok, yuôx tơưv iz saz tar trâu kror chuz chia hlơưr têx caz hlâu cov liaz thâuv zuôr ntâuk. Đros ntơư, muôx têx zav chuôz zênhx li: Trâux, chiax taik, jêz hor, thair hlâu, fiaz đêx, car tsơưz nhôngk thiaz thênh…hur si puôr lênhx paz trâu faz ntâuk hlâu.

Têx zav ntâuk tơưv chuôz zênhx zov chênhr zos têx caz hlâu por tsês. Tsi njênhk trâu yênhx zav chuôz zênhx, tus cưk hlâu xair caz hlâu cov fiv huv. Xav li lias, triav lok sik tâuk... khênhr sir caz grax yêz ô tô, lò xo lok sik caz cxiv puôz vax tsê, zos zav caz truôx khor jôngx, tsik yuô xêz, paz uô tơưv chuôz zênhx njê juôs, truôx khor trơưk hnuz nhôngs.

Ntâuk hlâu tsik zos khov tus nênhs ntâuk muôx jos xưz, tsênhv khov muôx txaik têk txơưx, truôx siaz, txơưx fiv thiaz tsênhv chênhz yax mak siaz nhiav zuk faz hâux lưv. Iz zav huv tâu uô tơưv puôr lênhx zos têk uô, txix li luz đas jos thiaz siaz nhiav ntơưv tus nênhs ntâuk. Viv li, tus gri muôs têx chuôz zênhx, triav khênhr civ jos têx zav công nghiệp uô tơưv 2 - 3 bâus.

Đros pêz thav zơưs Xưv haik nzir tiak: Cưr cơưv ntâuk hlâu thâuv muôx 15 shông, ntâuk đhâu pêz tiav hâur iz ziv nênhs, txix zơưs côngz, cur txir, txos cur. Cêr ntâuk hlâu zos hâux lưv hnhar, txov nhêv, ho muôs tâu nhiax tsơưs, li ntơư nhiv no ntâu tus hluôs tsik yuô nhiav ntâuk hlâu. Taz sik, cur cux tas siaz njưk kria trâu têx xênhz nzưr, tok nrư têx fâuv hluôs tov kaz zuôr pâuz ntâuk hlâu, tsưx tsês faz ntâuk hlâu cênhz cưv ziv nênhs, chia thâuv tưs cux muôx lưx hlâu.

Zơưs Zik Xênhv Muôk, Bí thư chi bộ, Thơưx jok Tà Số 1, thav tiak: Nhiv no, jok muôx 197 ziv, yax 1.000 tus tiz nênhs, đros trâu 100% tus pêx xênhv zos Hmôngz. Thâuv ntêx, xưk li luz tsêr tưs cux muôx lưx ntâuk hlâu, taz sik nhiv no tsuôk zos yuôr 3 ziv lơưv xưz. Kror chor mak têx fâuv hluôs tsik yuô nhiav, uô trâu faz ntâuk hlâu xưk li zuôr plox jux juk muk. Chi tsưx tâu faz ntâu hlâu cênhz cưv, jok tưz fuô kria, zaz zâuv têx tuz nhuôs xênhz nzưr cơưv ntâuk hlâu. Lar haik mak luz chaix so ntux sor, têx xênhz nzưr zâu tâu chox muk saiz lưx hlâu, cơưv shâuv, iz thênhv jux juk pâuz tâu têx tsưr ziv têx lâuk kria tsês. Iz chas ntơư, thị xã Mộc Châu tưz tuôr xav huôv tsar nuôv zax tsôngv nênhs tus đros đraiv ntâuk hlâu, muôz têx lưx hlâu uô qơư ndis saiz trâu têx kruô nuôv zax.

Txix hâu shông txos nhiv no, jok Tà Số 1 tok tâu yax 3.000 lưv pưs kruô tuôx nuôv zax, sâu tâu li 300 triệu đaiv nhiax. Kror no, tsik zos paz pêx xênhv sâu nju nhiax txiax xưz, tsênhv paz tsưx tsês thiaz huôv nzir txux chi tiz nênhs Hmôngz, hâur ntơư muôx faz ntâu hlâu trơưk cênhz cưv./.