Têx shông đhâu, tỉnh Sơn La tưz nhav tâu kror moz paz ntơưv Trung ương Đảng, Chính phủ thiaz têx bộ, ngành Trung ương fuô lês hâux lưv đros oz chas têz siz khov uô cxuô zav hâux lưv, lar haik hâur siz chos lês thiaz paz 9 tỉnh têz qơưk Lok Tsuôk, li: Hủa Phăn, Luông Pha Băng, U Đôm Xay, Xay Sổm Bun, Xiêng Khoảng, Phông Sa Lỳ, Luông Nậm Thà, Bò Kẹo, Xay Nha Bu Ly.

Fuô lês hâux lưv saz lax thênhv siaz Việt Nam - Lok Tsuôk, tỉnh Sơn La tưz moz siaz chox car uô trơưk têx ntâuz ntơưr chox car ntơưv Trung ương lok sâuv côngz xưv đros oz chas têz siz khov cêr lax luôv, cxuô hâux lưv, tsưr ziv đros têx tỉnh têz qơưk Lok Tsuôk siz chos lês têx hâux lưv: Cêr siz khov jông; tsưx truôx thax tsav nhoz njias to; choz kria ntơưr thiaz huôv tsar tiz nênhs; kôngz lông, har jôngr; cxơưz cêr lax luôv đhâu đriv têz thiaz paz huôv tsar; hâux lưv txux chi, đros oz chas têz siz chos uô cxuô zav hâux lưv, xã hội, kho moz thiaz đros pêx xênhv thav.

Hnuz 25/11/2025, Chính phủ nhiv kruôr tso tơưv Nghị định số 305/2025/NĐ-CP, hâur ntơư, trơưk điểm b khuz 8 Grê 7 fuô mênhx: "Xav hur si nhiax paz ntơưv thax tsav Việt Nam trâu têz qơưk đrâuv tsik đhâu 10% tsov xav bax nhiax zôngv thax tsav cấp tỉnh" thiaz trơưk điểm b khuz 12 Grê 3 fuô mênhx: “b) “Phi dự án choz kria trơưk tsưr ziv shông" zos phi dự án  paz tsưr ziv chia choz kria tiz nênhs ntơưv tos txaik nhav nhiax paz đhâu têx khóa choz kria lur hnuz nhôngs lok sik ntêr hnuz nhôngs zos saz Việt Nam paz, tâu fuô lês trơưk cxênhx cxênhv, muôx tsơưs ntâuz ntơưr thiaz trơưk cêr tuôr xav, tsưr ziv choz kria yênhx shông".

Cxênhx cxênhv paz choz kria ntơưv tỉnh Sơn La trâu têx tỉnh Kâuv têz qơưk Lok Tsuôk tâu txuôs jông fuô lês ntâu shông no trơưk đraiv Đảng thiaz Têz qơưk cêr chai tso tơưv trơưk li têx saz lax ntơưv thênhv siaz hâur 2 têz qơưk Việt Nam thiaz Lok Tsuôk. Tsik tas li, Đaiv ntơưr saz lax siz khov tưz tâu sâu bê ntu 2022-2026 hâur tỉnh Sơn La thiaz 9 tỉnh Kâuv têz Lok Tsuôk tưz thôngz ndâux luk, tỉnh Sơn La paz cxưx nhiax uô iz cxia hâux lưv choz kria ntơưr, njuôk moz..., xav hur si nhiax chos luk ntơưv têx Đaiv ntơưr sâu bê chos luk nto 53,9 tỷ đaiv.

Ntu 2021-2025, bax nhiax zôngv thax tsav tưz zok 370 - 400 tỷ nhiax/shông, hâur ntơư têx nhiax zôngv cấp tỉnh txix 130 - 170 tỷ đaiv/shông. Trơưk li cêr chai fuô trơưk điểm b khuz 8 Grê 7 Nghị định số 305/2025/NĐ-CP, xav hur si nhiax paz ntơưv tỉnh yênhx shông tsik đhâu 13-17 tỷ nhiax/shông, taz sik lar haik cxênhx cxênhv choz kria trơưk tsưr ziv shông nhiv no tưz tsar chor nhiax tâu paz zos chai. Viv li, têx cxênhx cxênhv tưz saz lax paz chia têx tỉnh txơưr cxưx nhiax uô hâux lưv ntơưv têx tỉnh Kâuv têz Lok Tsuôk txos nhiv no tsênhv tsik tâu fuô lês trơưk Đaiv ntơưr saz lax tưz tso tơưv.

Fuô luk ntơưv jias uô hâux lưv, đồng chí Phó Chủ tịch UBPX tỉnh cxiz cov têx sở ngành tsuv bax uz no chia ntu zuôr txos, paz côngz xưv ntơưv tỉnh muk shuôk thiaz đros 2 tỉnh Kâuv têz qơưk Lok Tsuôk uô hâux lưv trơưk têx cxênhx cxênhv tưz chos luk; siz chos saz lax, kria pâuz kror khuôv đais chia tỉnh khov têx bộ, ngành trung ương piar Chính phủ zênhv trâu tỉnh Sơn La bax nhiax zôngv thax tsav chia tưx tsov xav tsưr ziv fuô lês thiaz nhav phênhv shuôv trâu têx nhiax paz trơưk ntơưr chos trâu têx tỉnh Kâuv têz qơưk Lok Tsuôk./.