Đros muk muôx đồng chí Nguyễn Minh Tiến, Phó Chủ tịch UBPX tỉnh; thơưx car iz cxia sở, ngành ntơưv tỉnh; thơưx car têx xã, phường Vân Sơn, Vân Hồ, Tô Múa, Tân Yên; têx đơn vị nênhs ntiar uô, kria sox saiz lês dự án.

Trơưk fuô ntơưv Ban Saiz car dự án cxiv tsa uô têx công trình cêr yêz, ntu đhâu thax tsav tỉnh Sơn La ntêr 32,3 caik, muôx 3 poz ntiar cxiv đhok (26, 27, 28); xav hur si gri lês xav yax 201tiv nhiax, bâuv 5,77% gri chos luk. Txix hnuz 1/4/2026 txos nhiv no, thâuv qơư đo cxuô poz ntiar tâu zok, têx nênhs ntiar tsik so lês uô; xav têx kror uô tas nro dự án tsar txix 18 txos 25 kror; têx nênhs ntiar gruô hu yax 500 tus nênhs, đros yênhx puô luz máy paz uô. Têx xã, phường tưz zok qơư đo trâu nênhs ntiar 30,15/32,3 caik, tâu 93,34%. Taz sik, qơư đo nhiv no tsik tâu siz txuôk, yuôr ntâu qơư siz khuôv hiav txos cêr lês uô. Lar haik, yêv têx qơư nquôr khâuz nhaz thiaz cêr têz qơư tsênhv kênhz, ntâu qơư tsik tâu tiar tas cxênhz yuôx, xav faz thêv nhiax lok sik tsik tâu huv pêx xênhv siaz. Xã Vân Hồ tưz cơưv têx tos cik txos chia uô sai, hâur ntơư thôngz luk xuz uô tiar yêv qơư đo zok chia uô ntơưv 18 thax qơư nquôr khâuz nhaz, 19 cêr têz qơư luz 5 hli shông 2026.

Tov kaz muk yuôx qơư tas, đồng chí Chủ tịch UBPX tỉnh kruôk txos têx cêr sir jos ntơưv têx đơn vị uô, nênhs ntiar thiaz đơn vị sox saiz thâuv fuô lês dự án. Đồng chí cxiz cov têx sở, ngành, đơn vị cik txos thiaz UBPX têx xã, phường côngv uô sai yêv qơư đo; sir jos uô tiar hur si nuv zok qơư đo, têx qơư nquôr khâuz nhaz thiaz cêr têz qơư uô ntêx hnuz 31/5/2026 chia chok nxiak uô hur si siz luôs thôngz txox cêr. Ndo njôngr đros đơưk têx chor nhov, khuôv đais muôx yưv thâuv lês. Têx nênhs ntiar tsuv huôk njôngr têx hnuz tâu ntux chia xuôk máy móc, chuôz zênhx thiaz tiz nênhs, kriz uô jông fiv, truôx siaz uô tiar dự án trơưk cêr xav tso tơưv.

Cux zos hnuz no, paz côngz xưv tưz muk cxênhz qơư, njuôk saiz thax tsav tuôr xav qơư uô kôngz lông zôngv chuôz zênhx jông, thax công nghiệp Tân Yên. Dự án muôx qơư đar li 201 ha, muôx têx thax tsov xav, siv, zôngv, choz kria, hlôngr chuôz zênhx thiaz uô kôngz lông chuôz zênhx jông. Ntơư tâu tok nrư zuôr yênhx đruôz qơư tsov xav, sir zôngv txơưx fiv chuôz zênhx hâur cêr uô kôngz lông, siz chos cxơưz paz hlôngr yiaz qơư tsar nhiax thiaz yôngv siaz nux gri uô kôngz lông ntơưv tỉnh hâur ntu txuôk nzir.