Tas cik hnuz tiv 2, shuv xênhz Yar cơưv PTDT Nội trú tỉnh cux hnar tsôngk jông jav nhiak hair nênhs muk hơưv qix, cơưv shâuv cêr chai hâu tuần. Iz chas têx six hơưv cơưv zov chênhr, yar cơưv tsênhv kriz jias kria pâuz tuôr têk sênhr chêr, “Jax tuôr têk sênhr chêr thôngx siaz” zos iz hâur têx jax tuôr têk sênhr jông yax ntơưv hair nênhs Poz Ziz trâu shuv xênhz cơưv shâuv. Txos nhiv no, 100% shuv xênhz hâur yar cơưv tưz pâuz sênhr tas têx jax sênhr chêr cênhz cưv hair nênhs tsơưs. Lar haik, hâur cxênhx xưv saiz hloz 130 shông Hnuz tsa tâu tỉnh Sơn La nhiv kruôr đhâu, yax 100 shuv xênhz hâur yar cơưv tâu tuôr têk sênhr chêr, paz bôngs trâu pêx xênhv cxuô hair nênhs Sơn La txux chi jông hâur yar tiax lox ntơưv tỉnh.

Cưk kria Lương Thị Bích Hiền, Phó Hiệu trưởng Yar cơưv PTDT Nội trú tỉnh, kria pâuz: Shông cơưv no, yar cơưv muôx zuôr luôs 800 shuv xênhz zos hair nênhs Poz Ziz, Hmôngz, Maz, Poz Thơưx, Kháng, La Ha, Cho... Đros trâu hlôngr yiaz hâux lưv kria thiaz cơưv ntơưr, yar cơưv tsênhv moz siaz choz kria txux chi cênhz cưv, đhâu têx hâux lưv, côngv muôz lok đros kria trâu têx môn cơưv ngữ văn, txiax njis, choz kria thax tsav, kria pâuz têx hnuz grâuv pax cênhz cưv, txox chai, têx cêr uô si tênhx tus, haik cưr cxiax, sênhr chêr jông ntơưv cxuô hair nênhs. Đros ntơư, ndax têx hnuz so, nox tsiaz, yar cơưv cux kriz tưr têx môn thể thao cênhz cưv, li tuô hnênhr, njuôk jos, muk tơư nênhk..., nthuôr haik cưr cxiax, sênhr chêr, hnar tsôngk jông jav, cê txuôs jông txux chi hair nênhs, cê cxiv tsa yar cơưv choz kria ntơưr pâuz siz hluz siz paz, thôngx siaz.

Iz chas ntơư, Yar cơưv PTDT Nội trú tỉnh tsênhv txuôs jông têx CLB yuôz trax Hmôngz, tơưv lâus, uô pax ntâuz… muôx chôngz shuv xênhv cơưv shâuv. Niav hluôs Pax Xênhv Thox, shuv xênhz lớp 10A, thav kria: Nhoz hâur CLB yuôz trax Hmôngz, cur tưz pâuz yuôz têx jax Chaix ntux yiaz tuôx txos jok Hmôngz, Suôz gâux Tây Bắc... thiaz tâu yuôz hâur ntâu cxiax cxênhv txux chi, haik cưr cxiax hâur yar cơưv. Têx CLB txux chi tưz yênhx “kror qơư uô si” chia shuv xênhz cê cơưv shâuv, cê nhiav zuk thax tsav, pâuz mênhx đuô lok sâuv cênhz cưv.

Zos thax tsav txuôs jông txux chi muôx 6 hair nênhs nhoz uô cê, ntu đhâu, têx yar cơưv hâur thax tsav xã Chiềng La tưz moz siaz choz kria txux chi cênhz cưv trâu shuv xênhz đros trâu muôx ntâu tsưr ziv uô, muôx phaz nzưr. Ntơưv Yar cơưv Tiểu học Tông Cọ, yênhx lớp cơưv puôr lênhx muôx iz “Kror qơư nthuôr thax tsav txux chi", tâu cưk kria thiaz shuv xênhz nthuôr têx chuôz zênhx tuôv txênhv nhoz trơưr hair nênhs Poz Ziz luz nênhx, li fuôv txiax, tơưz, chês ntok ntâuz, tsưr ziv tsêr tsar lơưx...paz shuv xênhz nhiav, njênhs njôngr thiaz pâuz mênhx đuô zuk hair nênhs txux chi. Cưk kria Nguyễn Thị Chín, Hiệu trưởng yar cơưv thav pâuz: Đros trâu yax 80% shuv xênhz hâur yar cơưv zos hair nênhs tsơưs. Iz chas nthuôr txux chi hâur têx lớp cơưv, yar cơưv tsênhv kriz têx hâux lưv cơưv shâuv, chơư têx cưk txux tênhx tus, têx nênhs txơưx txux chi hair nênhs tsơưs tuôx nthuôr, thav pêv, kria têx shuv xênhz pâuz haik cưr cxiax Poz Ziz, tuôr têk sênhr chêr... paz têx shuv xênhz pâuz nzir thiaz nhiav zuk hair nênhs txux chi đuô. 

Fuô lês hâux lưv shông cơưv, Sở Choz kria ntơưr tưz chox car têx yar cơưv tsik tsês uô jông cêr sik tưr “Yar cơưv pâuz siz hluz siz paz- shuv xênhz moz siaz cơưv ntơưr”, txuôs jông môn cơưv choz kria thax tsav, đros trâu cxênhx cxênhv fiv huv; yênhx học kỳ kriz txix 2-3 jias kria pâuz hair nênhs txux chi. Ngành choz kria ntơưr cux zaz zâuv têx yar cơưv cxiv tsa thiaz txuôs jông CLB txux chi, thể thao, chia shuv xênhz tâu siz njiz, cơưv shâuv têx cêr uô nênhx, tsiv txiax, muôx txux chi, tir tar tsik cik txos têx cêr fêv hâur luz nênhx.  

Hâux lưv choz kria txux chi hair nênhs tsơưs lok trâu yar cơưv đhâu nthuôr ntâu hâux lưv muôx kaz hâu, tưz thiaz tsênhv yênhx txux chi jông hâur hâux lưv choz kria ntơưr ntơưv Sơn La. Tsik zos paz shuv xênhz pâuz mênhx thiaz njênhs njôngr trâu cênhz cưv xưz, mak têx hâux lưv no tsênhv cxơưz cxiv tsa chux pưv, uô tiar hâux lưv por hưv thax tsav, têz qơưk, pêx xênhv cxuô hair nênhs Sơn La txux chi hâur ntu nênhx yiaz nhiv no./.