Muk txos tổ dân phố Tà Loọng têx hnuz kaz shông cơưs, thâuv pax txir nkhơưz tơưs pâus pur ntar trôngz, cux zos thâuv pox niav Cho Nhiax trâu siaz njo ria tsôngk hnar cênhz cưv chia xơưk yo yiaz tok đaz kruô,Tsiaz. Têx cxaik têk sưv uô liax têz txơưx  xơưk uô kaz côngz, kaz xor mok  nhôngk trâu têx ntâuz pas trâuk gax, uô tơưv têx pax ntâuz jông saiz. Pos Lý Thị Son thav: Tsôngk hnaz tiz nênhs Cho zos kror côngv siz luôs jok ntơưv ntâuz trâuk gax hâuk chiaz ntaz, tơưs pax jênhk ntơưv têx xor nriar thiaz têx zav njaik hli xaz xênhz, cxaz nzir cêr jông gâux trâu tus pox niav. Nria pax ntâuz tâu têx pos, têx niav kria đhâu ntâu fâuv nênhs; têx nxaik uô ntêx zuôr muk zuôr txir tsuv tưx zuk cxaik têk xơưk tiaz yo trâu ziv nênhs. Txơưv ntu nênhx hlôngr pâur, cur cux kria têx mê nhuôv xênhz nzưr nria pax ntâuz, siz chos tsưx tsês chas txux chi zuk hair nênhs.

Đros trâu tsôngk hnar, têx zav jông hâur txux chi cưr cxiax tâu hair nênhs Cho lok sik moz siaz tsưx tsês, hâur ntơư zuôr tsuv thav txos sênhr chêr cho tsưz. Hâur cêr sênhr, luz tsưz zâu zos tôngx đror tsênhv chênhz uô suôz đror yênhx suôz siz luôs jok,tsik tu nduô, muôs jos ho. Suôz tsưz muôx hâur hur si cxuô zav cêr lês cênhz cưv ntơưv hair nênhs Cho, iz jax sênhr chêr puôr lênhx muôx suôz đror txơưr thiaz muôx txiax njis tsik siz thôngx. Sênhr chêr cho tsưz trâu hâu shông tsênhv zos tok nrư iz shông uô tâu kôngz lông jông, sâu nju; txos kaz shông sênhr chêr hơưv viv sâu tâu kôngz lông, hlôngr luk uô tsâus pox côngz zơưv txưr, ntux têz paz txos chia pêx xênhv muôx iz shông tâu ntux yar, ntux nas siz luôs, sâu nju kôngz lông, ntu nênhx nhoz zênhv hnuz zênhv nox kaz hnar jông.

Zơưs Bàn Văn Dần, tổ dân phố Tà Loọng, thav pâuz: Sênhr chêr choz tsưz zos iz hâur têx txux chi ntơưv pêx xênhv Cho Nhiax, tâu lês trơưr cxuô tiav txos nhiv no. Lar haik mak ndax têx hnuz gruôv pax, hnuz tsiaz, pur ntiak jêx jok hair nênhs Cho tror kaz lov jêv ntưk cêr sênhr chêr cho tsưz, faz sênhr chêr muôx lênhx bôngs cêr siz côngv tsôngv nênhs, li khơưr luk chox kria cxuô fâuv nênhs Cho Nhiax zuôr tsuv ndo txos hâuk pâuk chas nôngz nênhx zuk hair nênhs.

Iz chas cưr cxiax, sênhr chêr, tsôngv nênhs Cho tsênhv muôx ntâu cêr gruôv pax jông thiaz gas siaz, li: Gruôv pax Púng Hiéng, đhia Tsiaz, cêr chai Hloz tiar chêr trâu txir nênhx... Iz kro cêr chai haik txos cêr xav muôx lênhx thiaz pov njôngr cêr uô nênhx, nox  nhoz ntơưv ntơưv tiz nênhs Cho txơưx fiv, txâuk siaz. Zơưs Bàn Văn Giáp, nênhs muôx côngz nto bê tổ dân phố Tà Loọng, thav tiak: Pêx xênhv Cho Nhiax hâur jok zênhx txuôs tsês thiaz tuôr truôx têx cêr đaz,  cêr kruô cênhz cưv. Txir nênhx, pox niav, têx hluôs nênhs ndêv nduô thâuv txos shông puôr lênhx côngv lês têx nuv txux chi tsôngv nênhs, cơưv haik cưr cxiax, cơưv sênhr chêr, ntâuk đruôk đax, đruôk nênhz, uô tsôngk hnar... Têx nênhs muôx hnuz nhôngs kria trâu têx hluôs nênhs, côngv cxiv kho têx jax jông, gas siaz. Viv li, nux gri txux chi cênhz cưv cux tâu lês trơưr txos nhiv no.

Chia cov têx txux chi cênhz cưv jông tsik plox, pêx xênhv hair nênhs Cho nhoz Tà Loọng kriz têx paz cơưv kria têx txux chi cênhz cưv, li ria tsôngk hnar, haik cưr cxiax siz qiz, lês chai tuz tiar txir... Tix lâus Bàn Văn Giáp, Bí thư Chi bộ, Tổ trưởng tổ dân phố Tà Loọng, thav pâuz: Tas nro tổ muôx 236 ziv, 1.138 tus nênhs, đros 5 hair nênhs nhoz uô cê; hâur ntơư hair nênhs Cho txênhz 90%. Tsôngv nênhs Cho zênhx to tâuz tsênhz cêr tsưx tsês têx txux chi cênhz cưv jông  ntơưv hair nênhs đros cêr huôv tsar nuôv zax. Cxuô fâuv cưk txux tâu paz chia kria txux trâu tsôngv nênhs; têx cêr chai txux chi qơư nhoz tâu moz siaz cxiv kho; têx nênhs txơưx cưr cxiax ntơưv tổ tsik so lês siz nus cơưv shâuv nthuôr txux ntơưv têx jâus muôx cxênhx xưv txux chi hâur zuk thiaz luôs tỉnh. Txix ntơư, siz chos tsưx tsês, huôv nzir têx nux gri txux chi jông gri, cxiv kho thax tsav pêx xênhv nhoz thôngx siaz, nhaz xênhz, nox kaz hnar jông, shir phaz.

Cêr siz lis ntơưv tox trôngz hâur pêk nhoz lax trôngz Mộc Châu thiaz cêr tsưx tsês thiaz huôv nzir têx nux gri txux chi hâur tsôngv nênhs Cho nhoz Tà Loọng, taz tov yôngv siaz cêr chia siaz trâu pêx xênhv, muôx cêr gas siaz txơưr hlo kriz tâu sênhv cêr huôv tsar nhiax txiax nuôv zax trâu zuk thax tsav.