Txos xã Tà Xùa, thax qơư muôx 100% zos cưr tix nênhx tsa Hmôngz nhoz, ntơưv thax qơư no, lênhx tưs cux pâuz txos Chu Xênhv Muôk, nhoz trâu jok Làng Chếu. Shông no tưz muôx yax 50 shông, taz sik nưk puôr lênhx trâu siaz njo txuô kênhx thiaz kria têx mê tuz, mê nhuôv yuôz kênhx. Nhiv kruôr đhâu, zơưs Chu tưz đros têx cưk txux Tu Xênhv Phax, Vảng Xênhv Lux thiaz tus tuz zos Tôngx Xênhv Muôk tưz tâu kria tsưr ziv txuô kênhx thiaz yuôz kênhx zos Trung tâm Txux chi - Zênhx zav tỉnh thiaz xã Tà Xùa siz chos kriz trâu 40 lênhx nênhs côngv.

Zơưs Chu Xênhv Muôk haik pâuz: Chia cov txuô trâu iz traz kênhx, mak zuôr tsuv uô tiz jông lês hâur cxuô ntu, xair ntông, shôngz, uô tus blaiv, txos trâu muôz đhok cov yênhx iz traz kênhx. Tus yuôz kênhx mak zuôr tsuv pâuz hur si têx tsưr ziv muôz pa, tso pa yuôz kênhx. Pêz tưz kria têx nênhs cơưv têx jax kênhx, đhia kênhx thiaz kria trâu lơưr pâuz txos trâu kênhx txiax njis. Xar cov đhâu jias kria nzir tsưr ziv no zuôr paz trâu fâuv hluôs nhiav Hmôngz têx txux chi, cênhz cưv đuô thiaz muôx phênhv shuôv tsưx jông têx txux chi.

Tsưx jông hâux lưv chos max, ntok ntâuz, muôv Njuv Xênhv Shôngx tưz tsa tơưv Tổ siz khov xơưk tsôngk hnar Hmôngz xã Tà Xùa, muôx 20 thành viên. tưz tsik zos xơưk tâu têx hax huv chia muôs trâu têx kruô nuôv zax xưz, têx thành viên hâur tổ tsênhv kria tsưr ziv trâu têx mê nhuôv, cxơưz paz por hưv tâu jông têx txux chi, cênhz cưv, paz trâu têx gâux muôv hâur thax tsav sâu tâu nju nhiax txiax truôx njês. muôv Njuv haik pâuz: Tâu cêr paz ntơưv Hội Liên hiệp Pox niav tỉnh, shông 2019, cur tưz tsa tơưv Tổ siz khov xơưk tsông hnar Hmôngz. Côngv trâu hâur Tổ siz khov, têx thành viên tâu kria nzir tsưr ziv lok sâuv saiz car nhiax txiax ntơưv zis nênhs; kria tsưr ziv piz lês hâux lưv; kria cxiv tsa cêr tuôr xav uô kôngz lông, lax luôv thiaz tâu tso muk cơưv shâuv nzir tsưr ziv ntơưv iz cxia thax tsav.

Cêr sir jos tsưx truôx tưz tsik zos têx cưk txux ntơưv jêx jok xưz, mak tsênhv tâu tsưx jông txix li têx nênhs txơưx njê, têx văn nghệ sĩ zos hair Hmôngz. Têx hội viên Hội Liên hiệp Văn học - Nghệ thuật tỉnh, li: Grênhz x Muôk, Chi hội VHNT Phù Yên; Lias Xênhv Vax, Chi hội Văn học thax tsav Thành phố; Muôk Xênhv Thox, Fênhx Xênhv Muôk, Chi hội văn nghệ dân gian tỉnh; Tú Anh Xênhv Lâux, Chi hội âm nhạc... lơưr tưz paz zok nriar têx txux chi thiaz tsưx tâu jông têx txux chi, cênhz cưv thiaz fuô kria têx cêr chai ntơưv hair Hmôngz đhâu têx jax sâu chia fuô kria txos trâu chôngz lênhx nênhs.

Yax hlo, zơưs Di Xênhv Lâux, hội viên Chi hội Văn học nghệ thuật Sông Mã - Sốp Cộp, zos iz lênhx pâuz mênhx txos têx txux chi, cênhz cưv ntơưv hair Hmôngz, puôr lênhx sâu tâu têx jax sâuv muôx yưv hâur cưr tix nênhx tsa Hmôngz luz nênhx cxuô hnuz. Txos nhiv no, nưk tưz sâu tâu yênhx châuv jax sâu, tâu ntâu giải thưởng hâur têx jias tưr ntơưv Trung ương thiaz thax tsav.

Têx shông đhâu, ntâu txux chi ntơưv pêz hair Hmôngz tưz tâu zok nriar, por hưv thiaz nthuôr huôv. Yax hlo, cêr chai đaz kruôk uô nênhz kho chuôz xênhv, tsưr ziv yuôz kênhx thiaz cok chiaz ntaz ntơưv hair Hmôngz nhoz trâu thax tsav Mộc Châu tưz tâu Bộ Txux chi, Thể thao thiaz Nuôv zax côngk nhav zos zav txux chi, cênhz cưv têz qơưk. Kror hâux lưv côngk nhav ntơư tưz tsik zos cêr jông siaz xưz, mak tsênhv zos qơư chuôz jos chia pêz hair Hmôngz tror trâu siaz tsưx jông thiaz fuô kria trâu fâuv hluôs tov kaz.

Têx cêr sir jos ntơưv têx nênhs nhiav txux chi, cênhz cưv tưz cxơưz paz tsik zos tsơưs trâu hâux lưv tsưx jông Hmôngz têx txux chi hâur ntu nênhx hlôngr yiaz nhiv no. Txix ntơư, têx txux chi tâu nthuôr huôv, paz trâu pêx xênhv luz nênhx tâu jông, zov chênhr zos cxơưz paz huôv tsar nuôv zax jêx jok, nuôv zax ndis shuôk têx txux chi - cênhz cưv ntơưv thax tsav.