Hâur qar tsêr kruô Homestay A Châu ntơưv trung tâm xã Tà Xùa, pêz njiz Châu Xênhv Lux, thơưx paz xav tơưv dự án- Lênhx tuz hluôs Hmôngz zus shông 1996 sôngz saik, đrơưk đrôngk, txưv njêx muôs pov njôngr muôx cêr njênhs. Nhoz ntơưv iz saz hưx đêx yuôx zêx Tà Xùa nhiv kruôr tsâu tsênhv nqo pa niaz, A Châu thav txos têx cêr xav cxiv tsa huv: Tà Xùa muôx jê 400 ha yuôx zêx Shan tuyết, ntâu tsoz tuôx hâur har jôngr tâu yênhx puô shông nhoz trâu qơư siaz 1.500 thiar. Taz sik, yuôx zêx zos xuôk têk uô tsês, uô tsơưs, kaz tsik tâu siz luôs, zav yuôx uô zôngx ziv, cêr siz tưr pâur muôs tsơưs. Nưk xar njôngr, zos muôs yuôx zêx li đrav ntêx, mak lax yôngv gri. Tsuv muôx iz faz uô yiaz, tsưx tâu kror tsư ha thiaz yuôx zêx Tà Xùa kaz txơưr hlo.

Txix li xar ntơư, cêr tsưx tsês, uô tơưv yuôx zêx hâur tos trax shôngz mor trax tâu uô yênhx. Zôngv trax shôngz mor trax tsưx tâu yuôx zêx kror tsư ha đuô, zuk trôngx têz ho muôx shôngz mor trax, tsik zôngv têx nhaz tax jaik buô, uô tơưv huv kaz  txơưr  hlo trâu tox siaz, fiv huv nênhs siv hâuk, zuôr uô huv krưr trâu kruô nuôv zax.

Muôx cêr xav uô huv, têx yuôx zêx trax shôngz Tà Xùa tưz txos trâu têx kruô txix li muôx cêr nuôv zax jêx jol. Đros trâu uô kôngz lông, Châu Xênhv Lux uô tơưv tsêr kruô  homestay đros ndis saiz txux chi jêx jok. Yênhx shông, homestay A Châu tok tâu li 1.000 pưs kruô nuôv zax tuôx ndis saiz, nus txos cêr nox nhoz ntơưv tsôngv cưr tix Hmôngz thiaz saiz thax tsav yuôx zêx Shan tuyết lâuk Tà Xùa. Đhâu têx nuv kria huv đros qơư nuôv zax, yuôx zêx  tos trax shôngz Tà Xùa jux juk tâu kruô nuôv zax pâuz txos thiaz xair tsov zuôr uô huv krưr đhâu iz jâus tuôx ndis txos.

Ntu xuz thơưx, yuôx zêx trax shôngz uô tsơưs, chia paz trâu têx kruô so đhâu hnuz hmo. Pov njôngr têx nuv ciz, đo, ntiv yuôx zêx trâu tos trax shôngz đros têx luk paz ntơưv têx nênhs siv hâuk yuôx zêx tưz paz Châu pâuz tâu mênhx đuô cêr muôx liv pâur muôs. Txix ntơư, tsov xav, uô tiar tsưr ziv thiaz kriz đar uô tơưv. Njik yuôx zêx nhôngk tov kaz đê tâu xuôk têk ciz hâur ziak thiaz vâuv li 4 six hơưv. Têx trax shôngz, ntêr li 30 cm, hur, muôz ntiv yuôx zêx tưz vâuv uô yênhx cxênhx chia cov tsưx tâu blôngx, njik, tsik lor. Yuôx zêx tsưx tsês hâur tos shôngz, thâuv vâuv, tsưx tâu kror tsư ha txơưr hlo, tsês tâu yuôx zêx ntêr hnuz nhôngs.

Đê yuôx zêx saiz njôngr, chia cov txuôs tâu yuôx zêx Shan tuyết lâuk; sir zôngv tos trax shôngz mor trax hlôngr hnaz ntiv txo tsơưs tâu têx hnaz por tsês, tsơưs kror hiav tox trôngz qơư nhoz tsik hur. Zôngx ziv gra, yuôx zêx mor trax Tà Xùa zênhx max tâu têx kruô nuôv zax xair zuôr muk uô huv krưr. Nhiv no, yuôx zêx muôs tâu gri 170.000 đaiv nhiax/trax, iz trax ntiv tâu 170 txiax yuôx zêx. Txix shông 2022 txos nhiv no, muôs trâu cêr luôv jê 4.000 trax yuôx zêx. Zos têx xuz muôs trâu kruô tuôx nuôv zax so tsêr kruô homestay, yuôx zêx jux juk tâu kria muk đêz đar đhâu têx cêr pov njôngr ti vi, têx tsêr muôs huv jông hâur zuk thiaz luôs tỉnh.

Tix lâus Lê Văn Hùng, kruô nuôv zax tuôx ntơưv Ninh Bình, thav tiak: Tuôx txos Tà Xùa, iz chas muôx tox trôngz thiaz tiz nênhs ntơưv no, cur lok sik txâuk siaz trâu têx yuôx zêx tos trax shôngz mor trax viv tsư ha, pluôk iaz kri, jông hâuk, ho tsưx tsês atau ntêr hnuz nhôngs. Cur tưz zuôr yuôx zêx muk uô huv krưr puz nênhs cxênhz jê thiaz zuôr kria trâu têx fôngx zưx pâuz.

Cê muôs tâu nhiax, Dự án Yuôx zêx tos trax Tà Xùa tsênhv muôx nuv uô tsik tsês trâu li 15 tus nênhs thax tsav; đros ntơư, siz khov đros 9 ziv pêx xênhv Hmôngz nhoz jok Chung Trinh côngv chos, đê, ciz thiaz ntiv tsês, paz max truôx njês cêr nox nhoz, sâu nju nhiax txiax thiaz tsưx tsês yuôx zêx Shan tuyết lâuk. Châu Xênhv Lux kria nzir: Yuôx zêx nhiv kruôr uô tiar ntơưr hồ sơ por hưv bê lax luôv, tok txos chênhr nhav OCOP; đros ntơư, kriz đar cêr pâur muôs ntơưv Hà Nội, Hồ Chí Minh uô ntêx zuôr muôs trâu têx têz qơưk châu Á, châu Âu, têx cêr khov zênhv hnuz zênhv ntâu txos yuôx zêx xuôk têx ciz jông kaz. Đros ntơư, pêz paz nênhs zuôr tror cxiv tsa qơư nuôv zax siv “Hâuk yuôx zêx saiz huôz Tà Xùa”, paz têx kruô nuôv zax pâuz toz đuô lok sâuv txux chi jêx jok thiaz têx yuôx zêx uô tơưv.

Zơưs Đỗ Văn Xiêm, Chủ tịch UBPX xã Tà Xùa, thav pâuz: Xã zuôr tsik tsês đros lês, paz dự án uô tiar ntơưr hồ sơ chai têz qơưk, cxiv tsa bê lax luôv, zuôr muôs thiaz huôv tsar têx qơư ndis saiz nuôv zax đros yuôx zêx Shan tuyết. Xã cux cxơưz paz, nriar cêr chia têx qơư piz uô luôv yuôx zêx truôx njês, siz chos lês cêr xav cxuz cêr pluôs, cxiv kho jêx jok yiaz.

Yênhx côngz ntơưv Dự án Yuôx zêx trax shôngz Tà Xùa, siz chos uô ntâu zav huv yuôx zêx Shan tuyết Sơn La, uô tâu muk đêz đar cêr piz uô luôv txix zuk têx yuôx zêx jêx jok, chuôz jos chia hluôs nênhs zos pêx xênhv hair nênhs tsơưs truôx siaz huôv tsar nhiax txiax ntơưv zuk jêx jok. Txix têx nux gri pov njôngr txơưx fiv uô tơưv, muôx liv nhiax txiax, cik txos têz qơưk thiaz xav huôv tsar truôx njês, tâu gas trâu paz Top 20 dự án jông yax Jâus tưr Piz uô luôv Têz qơưk shông 2025 zos pênhr xưv trâu têx huv har jôngr thâuv tâu tuôr xav uô tơưv, huôv tsar trơưk faz truôx njês.