Tỉnh Sơn La muôx li 12.300 ha txir nkhơưz kaz jiz, đê nju txir hâur yênhx shông tâu 90 cxênhz tấn. Txir nkhơưz kaz jiz Sơn La muôx njik kâuz, kaz jiz liax, gis, tsư ha đuô njuôk li têx trôngx têz txơưr, tâu tuz luôv, tiz nênhs nhiav zuôr. Chia cov zênhv hnuz zênhv txâuk trâu kruô zuôr, HTX Kôngz txir jok Nọng Piêu, xã Phiêng Khoài, huyện Yên Châu tưz huôv tsar têx zav txir nkhơưz kaz jiz ruby.

Pos Bùi Phương Thanh, Phó Giám đốc HTX thav pâuz: Txix ntu hlôngr chos txir nkhơưz kaz jiz ruby tsuv xav lok sik ntov, taz sik thâuv chox muk muôs, kruô ho tsik yuô njênhs tiv zos tsik pâuz mênhx pêv zos huv tâu tu li chak, jông li chak. Li ntơư, muôz têx txir nkhơưz kaz jiz ruby muk tưr huv OCOP cấp tỉnh shông 2023, pêz vav tiak têx nênhs zuôr huv pâuz txos zos kaz, jông, muôx bê lax luôv, txix ntơư, kriz đar qơư chos, têx thành viên thiaz ziv côngv chos txir nkhơưz kaz jiz đros HTX muôs tâu ntâu nhiax.

Cux zos iz hâur têx đơn vị muôx hax huv tưr OCOP cấp tỉnh shông no, Công ty TNHH Iz thành viên Đạt Thủy, xã Cò Nòi, huyện Mai Sơn tưz lês tiar hâux lưv uô tơưv hlưz txir lưv tsiz, sir zôngv chuôz zênhx yuôz hlưz kruôr txix điện hur si. Shông 2023, têx hlưz txir lưv tsiz yuôz kruôr tâu côngk nhav tâu chai xav zos OCOP 4 luz hnuz kuz cấp tỉnh.

Pos Nguyễn Thị Ngọc, hlôngr njêx muôs Công ty TNHH iz thành viên Đạt Thủy kria tiak: Lês cxiax cxênhv OCOP, pêz xav haik kror jông, bê lax luôv cux li kriz đar cêr zuôr muôs trâu têx huv uô tơưv. Pêz tsênhv tâu kria, paz nhiax hlôngr đuô hnaz ntiv cov fiv huv, tâu cêr muk muôs huv trâu têx jâus kriz ciaz pâur muôs hâur zuk têz qơưk thiaz oz chas têz qơưk chia kriz đar cêr pâur muôs.

Tas nro tỉnh Sơn La nhiv no muôx yax 200 zav huv kôngz lông muôx liv lok sâuv gri nhiax thiaz cêr pâur muôs, nziv zuôr huôv tsar yênhx têx hax huv OCOP. Ntơư puôr lênhx zos têx hax huv txơưr hlo nhoz cxuô qơư hâur tỉnh, muôx ntâu tsar zav, li 5 côngs zov chênhr: Kar nox; têx zav zos đêx kaz jiz hâuk; yuôx njuôz; huv zuôr saiz đaz muôs; uô cxuô zav, nuôv zax jêx jok. Kror siz thôngx ntơưv têx HTX, tsêr luôv mal zos cxiv tsa hax huv OCOP puôr lênhx ndo njôngr hlôngr tsưr ziv uô tơưv, hlôngr yiaz txơưx fiv-tsưr ziv chia uô tâu têx hax huv jông, sir jos yâu mông, zuôr muôs têx hax huv đhâu đruôz mair.

Uô jông hax huv OCOP, tỉnh tsik so kria uô tiar tsưr ziv tso tơưv, kho jông tsêr, chuôz zênhx uô tơưv hax huv, tuôr xav ntơưr lo, hnaz ntiv, chênhr nhav hax huv hur têx kar nox, fuô kria txox chai, kror jông, ntơưr kria bê hax huv, bê ntơưr cok, lo ntơưr kria qơư uô tơưv... chok nxiak zos lưv ciz. Tsa yênhx têx zav siz txuôk uô tơưv, uô luôv cxuô zav siz côngv đros têx hâux lưv cxiv tsa, huôv tsar bê lax luôv, huôv tsar kriz đar cêr pâur muôs trâu cxuô zav huv.

Zơưs Dương Gia Định, Phó chánh Văn phòng Điều phối cxiax cxênhv têz qơưk xav cxiv kho jêx jok yiaz tỉnh, thav pâuz: Txix shông 2023, tỉnh Sơn La fuô lês Bộ tiêu chí hâux lưv hax huv OCOP ntu 2021-2025. Bộ tiêu chí yiaz kho, nzir iz cxia njiaz luk. Pir li, cxênhz, phênhv hov huv tâu lês txix cấp xã, hlôngr txix cấp huyện li đrav ntêx. Iz chas ntơư, UBPX cấp huyện zuôr côngk nhav têx hax huv OCOP tâu 3 hnuz kuz hlôngr cấp tỉnh đrav ntêx, paz têx thax tsav ndo xair tsov têx hax huv nto côngz, txuôs tâu six hơưv, muôz nhiax uô trâu têx nênhs lês.

Hlôngr yiaz cêr cxênhz saiz, côngk nhav huv OCOP tưz paz cêr zôngx ziv đuô trâu têx uô tsưr lês cxiv tsa thiaz huôv tsar têx hax huv OCOP muôx liv, txơưr hlo ntơưv thax tsav. Đhâu lês, txos nhiv no, hur si tỉnh muôx 151 zav huv OCOP, hâur ntơư muôx 1 zav huv tâu 5 hnuz kuz; 55 zav huv tâu hov 4 hnuz kuz thiaz 95 zav huv tâu hov 3 hnuz kuz.

Cêr xav txos shông 2025, tas nro tỉnh sir jos cov iz luz xã, phường muôx tsơưs yax cux iz zav huv OCOP, tỉnh tsik tsês sir jos zôngv têx txơưx fiv lol sâuv côngz xưv saiz car, cxiv tsa qơư uô luôv zâu thiaz tov thơưx, HTX uô tơưv hax huv OCOP. Lês hâux lưv chos luk tâus tâu qơư uô tơưv huv OCOP, sâuv qơư tâus qơư uô tơưv ntơưv tỉnh. Đros ntơư, cxênhz yuôx, saiz, tuôr xav huôv tsar têx hax huv trơưk zav jông. Côngv đas jos huôv tsar têx huv tưz muôx, uô tiar têx cêr paz chia yôngv siaz hov hax huv txix 3 hnuz ndê 4 hnuz kuz, txix 4 hnuz kuz ndê 5 hnuz kuz, zênhv hnuz zênhv fiv huv cêr khov pâur muôs trâu txox cêr lax luôv./.