Thôngz tỉnh muôx yax 84.700 ha ntông nox txir cxuô zav. Hâur ntơư, yax 19.500 ha mo môngk, lưv tsiz; zuôr luôs 14.500 ha tuôz ziz; yax 11.400 ha txir khơưz kaz jiz; 5.600 ha txir tsơưz; zuôr luôs 5.000 ha txir thênhx caz, lưk pax, đuô li zos bơ, chuôz thox hmaz, hồng gik... Txix hâu shông txos nhiv no, têx txir cxuô zav sâu tâu 253.000 tấn.

Cias tov kaz đê tas, Sở Kôngz lông thiaz Huôv tsar jêx jok tưz muôx têx ntâuz ntơưr kria têx huyện, thành phố, đơn vị cik txos zaz zâuv pêx xênhv tu têx ntông nox txir. Chox car Chi cục Chos kôngz thiaz Por hưv kôngz lông đros Trung tâm kria pêx xênhv uô kôngz huyện, thành phố kria têx zis pêx xênhv tu têx txir, yax hlo zos têx thax tsav muôx hax huv zov chênhr ntơưv tỉnh tâu muôz ntơưr paz thiaz hax huv OCOP. Đros ntơư, siz chos kriz têx lớp kria nzir tsưr ziv trâu pêx xênhv lok sâuv têx tsưr ziv chos, tu kôngz, tu trơưk tsưr ziv txâuk chai VietGAP, têx tsưr ziv tu puôr lênhx txâuk chai txix li tu, saiz shuôk txos thâuv đê, chia cov đê tâu nju thiaz kaz.

Nhiv no, huyện Mộc Châu muôx 3.200 ha txir nkhơưz kaz jiz, hâur ntơư zuôr luôs 2.400 ha tưz tâu sâu. Cxuô shông, Trung tâm kria pêx xênhv uô kôngz huyện tưz phaiz cán bộ cik txos sox njôngr thax tsav, paz kria nzir tsưr ziv tu txir nkhơưz kaz jiz tov kaz đê tas trâu pêx xênhv. Lês hâux lưv tuôr xav qơư chos txir nkhơưz kaz jiz tu trơưk chuôz zênhx jông ntơưv vok har txir nkhơưz Nà Ka muôz mã số kria pâuz qơư chos; kria tsưr ziv tu txir nkhơưz trơưk faz hữu cơ.

Tix lâus Lý Văn Đức zis nênhs, nhoz tiểu khu Tà Lọng, thị trấn Nông trường Mộc Châu muôx 2 ha txir nkhơưz kaz jiz; shông no têx txir nkhơưz đê tâu 17 tấn, sâu tâu 130 triệu đaiv. Tix lâus Đức haik pâuz: Nhiv no, taz tov yiz chêr, luôx đrox trâu vax txir khơưz. Tov kaz ntơư, tso qir lưv tiv 2, tsuôs yuôx chia cov txir tơưs pax nzor. Pêz tưz tsik so muk shuôk vax txir chia nzor pov caz nox hiav, txix ntơư muôx tsưr ziv phax tar.

HTX kôngz lông hur Chiềng Hặc, huyện Yên Châu tu 14,5 ha txir mor môngk trơưk chai VietGAP, tâu muôz mã số kria pâuz qơư chos trâu mo môngk tơưk njuôz. Cxuô shông HTX têx mo môngk tưz muôs muk trâu têx têz qơưk Úc, Mỹ, Trung Quốc. Zơưs Hà Văn Sơn, Giám đốc HTX, haik pâuz: Chia cov txâuk chai chia muôs trâu oz chas têz, thành viên HTX tưz moz siaz tu trơưk tsưr ziv, xair têx zav qir, yuôx tuô caz, tuô đrox jông. Đros ntơư, siz khov đros têx đơn vị sâu zuôr chia sox njôngr hâur ntu tu txos trâu thâuv đê, chia cov txâuk chai muôs oz chas têz. Sir zôngv têx tsưr ziv, viv li têx mo môngk tưz hloz huôv jông, đê tâu 300 tấn txir/chiv; shông 2023, HTX sâu tâu 2,2 tỷ đaiv txix li muôs txir mo môngk.

Huyện Mường La muôx 5.850 ha ntông nox txir, phênhv ntâu zos mo môngk, lưv tsiz, txir tsơưz, sâu tâu 24.000 tấn txir/shông. Zơưs Lù Văn Quý, Thơưx phòng Kôngz lông thiaz Huôv tsar jêx jok huyện, haik pâuz: Tov kaz đê txir tas, têx cơ quan cik txos đros têx xã kria pêx xênhv nthuô đrox hâur iz ndis hâur pâuk txir chia cov ntông hloz jông thiaz txo tsơưs caz nox hiav; txiar têx chês, caz nox thiaz têx chês siaz, tso qir chia cov ntông hloz jông. Tov kaz ntơư, tso qir trâu têx blôngx chia hla cxix cxuô thiaz nzor tơưs pax, tsik so cxênhz yuôx pov têx caz nox chia phax tar.

Tu têx ntông nox txir tov kaz đê tas zos kror zov chênhr paz trâu chiv tov kaz txi ndư, sâu tâu nju. Đros trâu cêr cxơưz paz ntơưv cxuô ngành, thax tsav, pêx xênhv zuôr tsuv tu trơưk đraiv tsưr ziv chia cov têx ntông nox txir tror txi ndư.