Lưk pax zos iz hâur têx hov txir tâu ntâu lênhx nhiav zuôr hâur luz Tsiaz. Pâuz tâu tiz nênhs siaz nhiav, tuz kôngz chos txir lưk pax ntơưv Yên Châu taz tov moz siaz por hưv ntông txir lưk pax hloz jông, txi txir ndư, paz bax txâuk muôs trâu ciaz khư.

Zơưs Đào Xuân Dũng, jok Thồng Phiêng, xã Chiềng Pằn ziv nênhs chos zuôr luôs 1 ha lưk pax Diễn. Tov kaz iz shông moz siaz por hưv, zơưs ziv nênhs têx luz txir lưk pax tưz siar đax vos thiaz piz tâu sâu txir. Chia muôx txir lưk pax muôs hâur luz Tsiaz, zơưs tưz txiar chês txix luz 7 hli, moz siaz trâu qir, zưs đêx trâu ntông txir lưk pax trơưk yênhx ntu, nhav nxiak tơưs pax, txi txir zos chaix. Thâuv ntông piz txi txir, tsuôk zos xair têx luz txir jông gâux, đê por tsês têx luz txir đaz tuôs, trâu têx hov qir paz txir hloz jông, sâu nju, nox lok six kaz jiz. Lar haik yax, tsuv tsuôs yuôx tir tar têx zav caz hmoz hiav, zơưs ziv nênhs tưz pâuz lôngx txir, tsuôs yuôx tuô caz hmoz hur nhaz xênhz, li ntơư njia luz txir tưs cux lok six jông gâux, tâu tuz luôv njênhs njôngr chos luk zuôr thâuv txir tsênhv mê.

Zơưs Dũng thav kria: Nhiv no, cur ziv nênhs taz tov xair đê têx luz txir mê chia muôs uô ntêx, xav iz chiaz muôs tâu txix 12.000-15.000 nhiax hov I thiaz txix 8.000- 10.000 nhiax/chiaz hov 2; yuôr têx luz txir lox, jông gâux mak hnuz 18 luz 12 hli ntux thiax piz đê muôs. Xav iz luz txir hnhar txix 1 chia 2 – 1 chiaz ntâu, tsov xav đê tâu zuôr luôs 6 tấn txir, sâu tâu 90 triệu nhiax.

Txir plâux cux zos hov txir tâu ntâu tiz nênhs nhiav zuôr lok nox hâur têx hnuz ti Tsiaz. Pâuz tâu tiz nênhs siaz nhiav, niav lâuk Nguyễn Thị Thắm, jok Yên Thi, xã Lóng Phiêng tưz piz chos hâu luz 9 hli, txos đraz luz 12 hli, nưk ziv nênhs vax txir plâux piz tâu đê tsik muôx chaix tas luz 4 hli shông tov kaz.

Niav lâuk Thắm haik pâuz: Shông no, cur ziv nênhs chos tâu 3 ha txir plâux, đhos chuôz zênhx zưs đêx nông, vor tax ni-lông chia paz ar nông thiaz trâu qir  hữu cơ. Đros ntơư, tsênhv tsuôs yuôx por hưv kôngz lông trơưk đraiv njiaz luk “4 zos”, chia txir plâux nox kaz jiz, hur, por hưv jông tiz nênhs đas jos. Nhiv no, xav iz hnuz cur ziv nênhs đê tâu 1 puô txir; xav iz chiaz muôs tâu txix 150.000-170.000 nhiax. Txos têx hnuz ti Tsiaz, zuôr zos chaix sâu txir, xav hur si zuôr đê tâu txix 9-10 tấn txir, sâu tâu 500 triệu nhiax.

Txos Tsiaz, têx hov txir nox tâu ntâu tiz nênhs xair zuôr tsar txix 20 - 30%, gri muôs têx hov txir cux tsar txix 10-20% trơưk yênhx hov. Hâux lưv por hưv ntông nox txir trơưk tsưr ziv muôs trâu ciaz tov têx hax huv hur, paz tiz nênhs chos txir huôv tsar ntông nox txir sâu nju, muôs tâu nhiax ntâu.

Zơưs Vũ Hải Yến, Lưv thơưx Phòng Kôngz lông thiaz Huôv tsar jêx jok huyện Yên Châu, thav tiak: Por hưv ntông nox txir chia muôx muôs hâur têx ciaz luz Tsiaz zos jias chia tuz kôngz sâu nju nhiax txiax. Đros trâu kror tưx tsov xav tsưr ziv uô ntơưv tuz kôngz, Phòng cux tưz moz siaz kria têx tsưr ziv uô nox yiaz, paz pêx xênhv pâuz sir têx tsưr ziv cơưv tâu lok zôngv hâur luz nênhx; tsik so tuôr xav têx tsưr ziv por hưv ntông nox txir thâuv pov yưv ntux yar ntux nas txơưr txar, chia nhav nxiak txir nox hloz jông, sâu nju thiaz muôx gri; tso tơưv tsưr ziv siz chos muôs; nhav nxiak muôs têx huv hur trâu tiz nênhs hâur kaz shông.

Xar zuôr txir lok nox hâur luz Tsiaz lok six ntâu, tsuv jông gâux, nox kaz jiz; kror no taix nus têx nênhs chos txir tsuv uô jông tu txir. Zos uô jông chos, mak tuz kôngz zuôr muôs tâu gri siaz đuô, lar haik têx hli kaz shông, gri nhiax muôs huv txir nox tâu tsov xav tror tsar siaz. Ntơư zuôr zos cêr shir phaz, paz têx nênhs chos txir cxaz nzir đas jos chia chos tâu ntâu hov txir jông trâu têx chiv tov kaz.