Phường Chiềng An nhiv no muôx yax 1.600 ha cà phê. Têx shông đhâu, pêx xênhv tưz huôv tsar nhiax txiax chos ntâu yênhx thax tsav, zôngv tsưr ziv tu cov sâu tâu nju, jông gri, muôs tâu truôx njês, cxuz tâu cêr yaiz pluôs, pêx xênhv muôx hâux lưv uô truôx njês. Taz sik, iz chas têx hâux lưv lês tâu, pêx xênhv tsênhv tu cà phê hâur nhiak tsêr, tsik tâu saiz car ntov. Uô jông hâux lưv liv têx đêx kiak nênhs, ntâu kror qơư tso têx đêx tsik tâu liv uô kiak nênhs cxuô qơư, hiav têx hâur đêx.

Lar haik, mak iz ndis thax tsav đêx Hốc, jok Đông Hưng, xã Muổi Nọi đêx ntưk đhâu jok Phiêng Tam, tổ 3, tổ 5 thiaz gas trâu hâur kror tsuô Thẳm Tát Tòng, phường Chiềng An. Ntơưv no, zos iz ndis por hưv hâur đêx gruk đêx trâu tsêr máy gruk đêx số 1 Công ty Cổ phần gruk đêx Sơn La, trâu yênhx châuv cxênhz ziv pêx xênhv hâur thành phố Sơn La kuz. Muôx têx ntu, uô trâu hâur đêx tsêr máy số 1 kiak nênhs, đơn vị cơư kror trôngx so tok liv đêx hur mav gruk trâu pêx xênhv zôngv, uô trâu pêx xênhv luz nênhx cxuô hnuz njiz ntâu cêr phiv liv.

Ntơưv jias cơưv, têx đại biểu tưz phênhz mênhx têx zav hiav txos cêr nyiaz hur hâur thax tsav phường Chiềng An, li: Têx nzuôr đêx, luôv flâuz cà phê hâur ntu tu tsik tâu liv; iz cxia ziv pêx xênhv tsênhv tso kênhk đêx kiak nênhs muk yuôv trâu têx har đêx, hiav têx hâur đêx tsik hur. Đros ntơư, khâuz nhaz cux tsik tâu xair nhiak trâu nhiak, têx khâuz, kuôr tsiax cxu tsik tâu uô jông tu trơưk chai, hiav txos pêx xênhv luz nênhx.

Muôx luk saz lax ntơưv jias cơưv, thơưx car phường Chiềng An cxiz cov phường Chiềng Cơi, xã Muổi Nọi siz chos đros cxênhz yuôx, sox car ntov; cxuô tổ, jok, tsêr luôv thiaz yênhx ziv zuôr tsuv zôngs ntov têx njiaz luk tưz saz lax thôngz; tsik tsênhr chia kiak nênhs hiav txos cêr nyiaz hur. Phường zuôr tsuv chos luk zôngs ntov chai siz tưr lês jông hâux lưv yênhx shông, zos kror tưs zuôv chai bluô ntov nti. Cxuô lênhx pêx xênhv zuôr tsuv nhiak pâuz nhiak phênhv shuôv, siz chos côngv têk tsưx hưv cêr nyiaz hur, por hưv hâur đêx cov hur thiaz huôv tsar cà phê truôx njês.