Bê lax luôv “Njêk đêx Đà Sơn La” tưz tâu Cục Saiz car cêr txơưx njê puz ntơưr công nhav por hưv bê lax luôv shông 2018 taz sik tsênhv tsik sir zôngv tas zuk luz bê lax luôv. Shông 2022, tỉnh Sơn La tưz fuô lês hâux lưv cxiv tsa tsưr ziv sir zôngv muôx kaz hâu bê lax luôv "Njêk đêx Đà Sơn La" paz max trâu hâux lưv cxiv tsa jêx jok yiaz, nhoz hâur Hâux lưv huôv tsar chuôz tav cêr txơưx njê txos shông 2030.

Paz nênhs fuô lês hâux lưv tưz cxiv tsa yênhx côngz tsưr ziv sir zôngv bê lax luôv công nhav “Njêk đêx Đà Sơn La”, puz vax huôv sir zôngv bê lax luôv công nhav trâu 5 HTX zus njêk cơư tơưz hâur pak đêx tsêr máy tênhz điện txâuk chai; hâur ntơư tưz xair xair tâu 3 HTX ntơưv huyện Quỳnh Nhai côngv nhoz hâur tsưr ziv li: HTX zus tsiax đêx Hồ Quỳnh, xã Chiềng Ơn; HTX zus tsiax đêx xã Chiềng Khoang thiaz HTX zus tsiax đêx An Bình, xã Chiềng Bằng. Hâux lưv cxiv tsa tsưr ziv sir zôngv muôx kaz hâu bê lax luôv "Njêk đêx Đà Sơn La” tưz tâu Hội đồng cxênhz yuôx muôz zok sir zôngv hâux lưv txơưx fiv cêr uô nênhx thiaz chuôz zênhx jông cấp tỉnh công nhav zos hov txơưx kaz shông 2024.

Nhiv no Sơn La muôx yax 84.000 ha ntông nox txir, shông 2024, xav nhiax muôs txir trâu oz chas têz sâu tâu 200 triệu nhiax đô la. Kôngz, txir nox zov chênhr ntơưv tỉnh zos huv txir mo môngk thiaz lưv tsiz tưz tâu puz ntơưr por hưv bê lax luôv công nhav "mor môngk Sơn La" thiaz “lưv tsiz Sơn La” ntơưv Việt Nam, tâu xair chia sâu bê por hưv bê lax luôv công nhav ntơưv Suôr têz, zos qơư chuôz muôx jos lox chia paz kôngz, txir nox Sơn La tâu muôs trâu cxuô luz têz qơưk. Đros têx kôngz, txir nox zov chênhr, hâu shông 2025, Sơn La muôx nzir 3 zav huv li mắc ca Sơn La, txir pôngr lux Sơn La thiaz yuôx zêx Tà Xùa Bắc Yên tâu puz ntơưr por hưv bê lax luôv công nhav.

Tov kaz huv “Yuôx zêx Tà Xùa Bắc Yên” tâu Cục Saiz car cêr txơưx njê puz ntơưr công nhav sâu bê por hưv bê lax luôv, UBPX huyện Bắc Yên  tưz puz vax huôv sir zôngv bê lax luôv trâu têx paz pơưs, tus khênhx, li: HTX Kôngz lông thiaz Por hưv txux chi hair nênhs tsơưs PLA; HTX kôngz lông A Châu thiaz ziv nênhs huôv tsar kôngz lông Dênh Xênhv Shôngx.

Nhiv no hur si tỉnh muôx 31 zav huv kôngz, txir nox, tu zus tsiax đêx gra thax tsav Sơn La luz bê tâu Cục Saiz car cêr txơưx njê puz ntơưr por hưv bê lax luôv thiaz 2 zav huv tâu puz ntơưr por hưv bê lax luôv ntơưv oz chas têz. Lar haik li têx huv: Cà phê Sơn La; yuôx zêx Shan tuyết Mộc Châu; txir mo môngk khênhx ntơưv huyện Yên Châu; yuôx zêx Tà Xùa Bắc Yên; jiz mur Sơn La; kok tsưx ha Thuận Châu; xaz lênhx tsar Sơn La; mắc ca Sơn La; txir pôngr lux Sơn La; njêk đêx Đà Sơn La,...

Đhâu sox njôngr thiaz cxênhz yuôx ntơưv têx cơ quan muôx vax huôv trâu têx paz pơưs, tus khênhx puôr lênhx fuô lês ntov nti têx cêr chai saiz car thiaz sir zôngv bê lax luôv, muôz ntơưr ntâuk chiv, hax huv jông, por hưv kar nox hur. Têx hax huv tâu puz ntơưr por hưv bê lax luôv zos chênhv chưr mênhx pêv trâu kror sir jos ntơưv tỉnh hâur ntu cxiv tsa thiaz huôv tsar bê lax luôv trâu huv kôngz, txir nox txơưr đuô kror qơư, paz cxiv tsa kôngz lông Sơn La tsik tsês sâu nju nhiax txiax, iz phênhv tưs cxiv tsa bê lax luôv thiaz qơư sơưr kôngz, txir nox Sơn La zênhv hnuz zênhv nto mông trâu cxuô kror qơư hâur têz qơưk thiaz oz chas têz.