Zơưs Bạc Cầm Khuyên, Phó Chủ tịch Thường trực Hội Tuz kôngz, Thơưx Ban Côngz xưv tuz kôngz tỉnh, thav pâuz: Yênhx shông, Ban đros têx ngành tâu chai fuô kria, zaz zâuv hội viên tsa tơưv HTX, gruô hu tuz kôngz đros côngv lês. Đros ntơư, kria têx HTX huôv tsar trơưk zav muôx gri, sir zôngv chuôz zênhx jông, uô kôngz hur, hữu cơ, yôngv siaz cêr siz tưr, muôx hâux lưv uô thiaz sâu tâu nhiax truôx njês trâu thành viên thiaz tuz kôngz thax tsav.

Iz chas ntơư, Ban Côngz xưv tuz kôngz tỉnh tsênhv đros ngành chuyên môn kriz kria nzir trâu cán bộ thơưx chox têx HTX zos tuz kôngz uô tsưr lok sâuv kriz lês, txox chai uô nuv; kria cxiv tsa bê lax luôv, tu kôngz chos, ntiv uô poz, thâux huv. Đros ntơư, sir jos yâu mông, cxơưz cêr lax luôv, kriz cêr zuôr muôs; tso luk siz tưr “Uô tơưv, uô luôv coz”, kriz muk đêz đar têx uô tâu nto côngz “Tuz kôngz Việt Nam txơưx yax”, “Nênhs txơưx xav ntơưv têx tuz kôngz”, cxơưz paz hội viên piz uô nox uô luôv, txơưx fiv, huôv vav nhiax txiax.

Hâur ntu uô nuv, têx HTX zos tuz kôngz uô tsưr tưz paz max huôv vav nhiax txiax ziv nênhs, paz nov hâu qơư nhoz kria tuz kôngz sir zôngv txơưx fiv tsưr ziv, kriz đar uô hâux lưv, tsik so nzir siz khov uô tơưv, uô luôv.Ntâu HTX cxiv tsa trơưk faz siz khov thax tsav, uô tơưv trơưk zav muôx gri, sir zôngv lưv ciz VietGAP, GlobalGAP, uô hữu cơ. Têx huv muôx ntơưr lo, hnaz ntiv, kria qơư uô tơưv, kria qơư chos; ntâu huv tâu chai OCOP txix 3 hnuz kuz tror sâuv. Xav sâu nju nhiax tâu txix 150-200 triệu đaiv/HTX/shông; têx thành viên sâu tâu txix 4-4,5 triệu đaiv nhiax/nênhs/hli.

Zơưs Nguyễn Văn Tiến, Giám đốc HTX Uô kôngz lông Tiến Thành, xã Chiềng Sơn, thav tiak: HTX chos yax 60 ha txir thênhx caz, txir lưk jôngr, quýt thiaz lưv tsiz, đê têx txir yênhx shông tâu txix 800 tấn tror sâuv. HTX tưz nhav tâu kror paz max ntơưv têx cấp hội tuz kôngz hâur cêr siz côngv chos ntông nox txir đros nhiax txiax jôngr chia uô tas cêr uô nox thiaz sâu tâu nhiax trâu têx thành viên.

Hok ntơưv HTX Uô tơưv uô luôv thiaz uô cxuô zav Bình Thuận, xã Bình Thuận, tâu têx cấp Hội Tuz kôngz paz muk cơưv tsưr ziv ntơưv iz cxia HTX uô tâu muôx liv hâur tỉnh, HTX tưz yôngv txiax njis uô tơưv, uô luôv trơưk faz tsênhz mênhx zuk thax tsav. Pos Nguyễn Thị Bình, Phó Giám đốc HTX, thav pâuz: HTX siz khov zuôr têx njik yuôx zêx nhôngk trâu li 400 ziv pêx xênhv, uô tâu 400-500 tấn yuôx zêx kruôr/shông, muôs trâu cêr luôv têz qơư Đài Loan đhâu têx công ty ntơưv Hà Nội.Yuôx zêx Trọng Nguyên ntơưv HTX tâu côngk nhav OCOP 4 hnuz kuz txix shông 2019, cxênhz đuô shông 2023, siz chos yôngv siaz sâu nju nhiax txiax, txo tsơưs cêr pluôs truôx njês trâu pêx xênhv.

Sir jos paz têx HTX zos tuz kôngz uô tsưr, Ban Côngz xưv tuz kôngz tỉnh tror đros têx ngành chuyên môn kriz kria, cxaz nzir tiz nênhs trâu têx HTX, côngv muk ndis saiz cơưv shâuv hâur zuk thiaz luôs tỉnh. Kriz têx jâus siz thav cêr chai nhiax txiax chia pâuz tâu cêr khov vav, đơưk chor nhov thiaz cxơưz paz hâux lưv uô muôx liv ntơưv têx HTX. Sir jos yâu mông, cxơưz paz cêr luôv chia kriz đar cêr pâur muôs huv. Sox nyik qơư, côngv fuô kria, zaz zâuv tuz kôngz siz khov tsa  tơưv HTX, kriz têx zav zuk thax tsav txơưv zênhx chia huôv tsar uô tơưv, muôx hâux lưv uô, siz chos cxơưz paz huôv vav nhiax txiax - xã hội zuk thax tsav.