Công ty TNHH iz thành viên Njêk tầm Việt Nam - Sơn La tâu cxiv tsa kaz shông 2012, zos đơn vị tsuôk zos zus njêk tầm hâur pak đêx tênhz điện Sơn La. Yax 10 shông đrav ntêx, tsik muôx tus tưs zuôr xar tiak thax tsav pak đêx tênhz điện Sơn La zuôr zus tâu njêk tầm, viv hov njêk no tsuôk zos nziv zus trâu thax tsav đêx txiak li têz qơưk Nga, Belarus... Tập đoàn Njêk tầm Việt Nam tưz uô tâu têx kror tsik zôngx ziv lês tâu.

Sơn La muôx thax tsav pak đêx tênhz điện Sơn La toz đar, muôx ntâu zav nox tâu, đêx sor, đêx txiak fiv huv nziv zus njêk tầm hloz jông thiaz huôv tsar. Shông 2012, Công ty zus siv 20 luz guôx, muôx yax 20.000 tus njêk tầm Beluga thiaz Russian. Hâur ntơư, phênhv ntâu zos nôngz njêk Beluga - ntơư zos hov njêk tầm tâu Tập đoàn njêk tầm Việt Nam zuôr oz chas têz lok zus. Hov njêk no, zos suô tâu kê, mak 1 chiaz muôs tâu txix 7.000-8.000 nhiax đô la thiaz 1 chiaz graix muôs tâu txix 15-20 cxênhz nhiax đô la.

Tov kaz 2 shông zus siv, fâuv njêk zus muôs xuz thơưx, xav fênhx đraz iz tus hnhar 1,5 chiaz tror sâuv. Kriz đar tsưr ziv zus, hli 11/ 2015, Công ty yaik hur si guôx njêk tầm muk trâu thax tsav jok Lả Mường, xã Mường Trai. Kror qơư no tsik nhoz hâur kưx đêx zov chênhr hâur tus đêx Đà, zôngx ziv muk lok puz njêk nox lok sik thâux muk muôs.

Đros trâu tsưr ziv zus njêk tầm ntâu shông ntơưv Tập đoàn Njêk tầm Việt Nam thiaz cơưv shâuv tsưr ziv txix têx cưk oz chas têz, Công ty tưz iz phênhv tưs hlôngr yiaz tsưr ziv, uô tiar cxênhx cxênhv zus njêk txâuk chai VietGAP. Txix 1000 tus njêk tầm thiaz 20 luz guôx xuz thơưx, txos nhiv no Công ty cổ phần Njêk tầm Sơn La tưz huôv tsar zuôr luôs 265 luz guôx njêk cxuô zav, 70 luz kror đêx vâuv mê nhuôv njêk, yôngv hur si sir zôngv yax 40.000 m² blaiv đêx. Nhiv no, muôx 200.000 tus njêk tầm, hâur ntơư, 3.000 tus zus chia zuôr kê, đuô li zus graix muôs, hnhar txos 300 tấn.

Zơưs Nguyễn Văn Lan, Quản đốc Công ty TNHH iz thành viên Njêk tầm Việt Nam - Sơn La, kria nzir: Txix hâu shông txos nhiv no, Công ty tưz muôs 10 tấn njêk hâur thax tsav tỉnh thiaz têx tỉnh nhoz jê li: Điện Biên, Lào Cai, Sa Pa, Hòa Bình... đros trâu 250 cxênhz nhiax/chiaz hov njêk muôx 1-3 chiaz; 350 cxênhz nhiax/chiaz hov njêk muôx 5-7 chiaz; hov njêk yax 3 chov tâu muôs txix 900 cxênhz nhiax-1 triệu nhiax/chiaz. Công ty tưz paz 15 lênhx muôx hâux lưv uô tsik tsês, 6-10 lênhx uô hâux lưv trơưk chaix, đros trâu nhiax hli txix 7-40 triệu nhiax/lênhx/hli.

Zos iz hâur têx qơư uô luôv njêk tầm ntơưv Công ty TNHH iz thành viên Njêk tầm Việt Nam - Sơn La hâur thax tsav tỉnh, tix lâus Bùi Anh Hưng, Tsưr Tsêr muôs njêk Sam Síp, tiểu khu 5, thị trấn Ít Ong, huyện Mường La, thav pâuz: Njêk tầm zus hâur pak đêx tênhz điện Sơn La tâu ntâu tus kruô pâuz txos, nhiav zuôr lok nox. Lar haik cur ziv nênhs kror qơư muôs njêk tưz muôs tas yênhx tấn njêk/hli. Tsik tas li, tsênhv muôs njêk trâu têx tsêr thaz nzưr hâur, oz chas huyện.

Trơưk nênhs hlôngr njêx muôs công ty, nhiv no, têx tỉnh Ninh Bình, Thái Bình, Thanh Hóa, Vĩnh Phúc thiaz thành phố Hà Nội lok six xar thiaz nhiav nox njêk tầm. Chia paz tâu zênhx max tiz nênhs siaz nhiav, Công ty tror huôv tsar kriz đar tsưr ziv zus njêk. Tsov xav shông 2026, Công ty sir jos muôs cov tâu txix 300.000 txos 500.000 tus njêk nôngz, txos kaz shông, tsar 500 tấn njêk zus muôs. Tsưr ziv huôv tsar ntơưv Công ty tsik zos zus njêk chia muôs graix xưz, mak zus njêk chia zuôr kê chia paz njêk tầm zênhv hnuz zênhv muôx gri.

Zơưs Dương Văn Biểng, Chi cục phó Chi cục Tu zus, kho moz tsiax cxu, tsiax đêx tỉnh, haik pâuz: Zus njêk tầm hâur pak đêx tênhz điện zos faz tsưr ziv uô nox muôx kaz hâu, sâu nju nhiax txiax. Chi cục xar cov Công ty tsuv tsik tsês cxiv tsa tsưr ziv đros têx HTX, ziv nênhs siz chos huôv tsar njêk tầm. Thâuv ntơư, Công ty zuôr zos qơư muôs njêk nôngz, kria pâuz tsưr ziv zus njêk thiaz chos luk zuôr tas pêx xênhv chor njêk zov chênhr.

Đros trâu xênhz txơưv, cêr muôx liv hâur pak đêx tênhz điện Sơn La, Công ty TNHH iz thành viên Njêk tầm Việt Nam - Sơn La tror cxưx nhiax uô, kriz đar tsưr ziv zus njêk chia bax txâuk njêk muôs trâu ciaz khư, paz thax tsav tsik tsês huôv tsar nhiax txiax.