Mường La zos huyện taz tov lês ntâu luz luôs hâux lưv chos yuôx trơưk cêr siz khov chos thiaz muôs têx yuôx. Lar haik mak: HTX Nam y dược Phú Tuệ - Mường La, xã Mường Chùm, tâu tsa yênhx trâu shông 2021, nhiv no muôx 15 lênhx, muôx 1,5 ha sâm bố chính. Công ty TNHH MTV Đăng Dương, xã Mường Bú nhiv no iz chas têx pax txir mâuv cuôz zos huv OCOP 3 luz pax hnuz kuz tưz đros têx ziv pêx xênhv chos sâm bố chính ntơưv Tạ Búng, xã Tạ Bú muôx cêr siz khov. Iz chas ntơư, muôx HTX Nam Sơn - Phú Lương, jok Nà Lốc, thị trấn Ít Ong, tsa yênhx shông 2021 uô têx yuôx, tưz uô luz vax vâuv zuz, đros têx ziv pêx xênhv chos yuôx siz khov, li: Cà gai leo, Kaz huz, pax cúc...

Ntơưv huyện Bắc Yên, ntơưv têx xã tox siaz: Háng Đồng, Hang Chú, Tà Xùa taz tov chos thiaz huôv tsar têx têz chos hơưk yax 1.000 ha, têx zuz: Hơưk, suôz jênhx, ciav fix. Lar haik ntơưv xã Háng Đồng, shông 2024, tưz đros Phòng Kôngz lông thiaz Huôv tsar jêx jok huyện phaiz 14.000 tsoz zuz hơưk, yax 23.200 tsoz zuz ciav fix trâu pêx xênhv chos. Txos nhiv no, xã muôx yax 100 ha hơưk, suôz jênhx thiaz ciav fix. Ntâu kror qơư chos sâu tâu yax 100 triệu nhiax/shông, cxuz tâu cêr yaiz pluôs, huôv tsar nhiax txiax - xã hội.

Hok ntơưv huyện Vân Hồ, muôx yax 146 ha yuôx, zos 16 zav, chos ntâu trâu têx xã Liên Hòa, Lóng Luông, Chiềng Xuân thiaz Tô Múa... Zơưs Nguyễn Mạnh Cường, Thơưx phòng Dân tộc huyện Vân Hồ, haik: Thôngz huyện yuôr 400 ha tsênhv zuôr chos yuôx. Shông 2024, huyện tưz kria hâux lưv xair đơn vị chox car siz khov lês Dự án cxơưx nhiax huôv tsar yuôr ntơưv huyện.

Dự án tuôr xav zuôr sir jos chos cov tâu 210 ha yuôx, uô tâu qơư tu yuôx tsês, zôngv chuôz zênhx GMP thiaz GSP uô yuôx; uô tâu tsơưs yax 2 zav yuôx truôx njês muôx ntơưr nriar tâu qơư uô jông; paz 300 tus pêx xênhv muôx hâux lưv uô, sâu tâu nhiax txiax truôx njês, hâur ntơư 50% têx nênhs uô hâux lưv zos pêx xênhv hair nênhs tsơưs. Tuôr xav qơư ntơưv têx xã: Vân Hồ, Song Khủa, Liên Hòa, Lóng Luông. Dự án cxưx zuôr luôs 230 tỷ nhiax lok uô. Dự án tâu uô trâu ntu 2021-2025.

Pos Cầm Thị Phong, Phó Giám đốc Sở Kôngz lông thiaz Huôv tsar jêx jok, haik: Đề án huôv tsar kôngz lông thiaz tsiax đêx ntâu uô cê, truôx njês zôngv chuôz zênhx jông txos shông 2025, xav txos shông 2030 tỉnh Sơn La sir jos: Huôv tsar têx thax tsav chos yuôx cov ntâu  muôx qơư tu tsês, siz khov muôs trâu cêr lax luôv txos shông 2030, tỉnh Sơn La muôx 30.000 ha yuôx. Fuô lês siz luôs jok, txos nhiv no, thôngz tỉnh muôx yax 15.000 ha yuôx thiaz txir tuôz ziz.

Hâur ntu huôv tsar yuôx, tỉnh cxơưz paz cov huôv tsar 55 zav cov ntâu, zos: actisô, tâuv đaik đơưz, tâuv trọng, đương quy, txir tros tâuz txiax, hmaz njuôz, kriar, kok lâuv liaz, pax hòe, hoài sơn, kim tiền thảo, jâuz njưs buô, kriar đax, ciav fix, tâux đuz, suôz jênhx, sâm Ngọc Linh, tam thất, trinh nữ hoàng cung, kiz... thiaz iz cxia yuôx jông gri. Iz chas ntơư, puôz tiz cov siz khov chos thiaz muôs yuôx, huôv tsar yênhx thax tsav truôx njês muôx qơư uô jông tu, huôv tsar cov ntâu trơưk cêr siz khov cov muôs tâu gri, paz pêx xênhv sâu nju nhiax txiax.