Hâur zuôr luôs 10 shông fuô lês cêr chai ntơưv Tỉnh ủy lok sâuv huôv tsar ntông nox txir trâu têz tox nxaz, thị xã Mộc Châu tưz uô ntâu hâux lưv lar kruôk. Tâu kror chox car ntov nti ntơưv  cấp ủy, nov hâu thax tsav, đros kror jông siaz côngv đros uô ntơưv pêx xênhv, têx luz trôngz đrav ntêx chos poz cưk, kok ntông sâu tsik nju, nhiv no tưz tâu hlôngr chos zos têx têz chos ntông nox txir njuôz xiaz hloz mok nhôngk.

Thị xã Mộc Châu muôx 11.481 ha ntông nox txir, tsar 8.530 ha njuôk li shông 2015. Xav hur si sâu tâu zuôr luôs 56.000 tấn txir cxuô zav/shông, tsar yax 38.000 tấn njuôk li shông 2015. Hâux lưv muôz nhiax zuôr nôngz yiaz lok chos, tu trơưk tsưr ziv yiaz, zôngv chuôz zênhx jông, paz ntâu vax chos ntông nox txir sâu tâu txix 200 - 400 triệu nhiax/ha, lar haik tsênhv muôx têx qơư sâu tâu 800 triệu txos 1 tỷ nhiax/ha.

Zơưs Lê Trọng Bình, Chủ tịch UBPX thị xã Mộc Châu, kria pâuz: Đros trâu txox chai "Kôngz lông paz max nuôv zax", thị xã taz tov moz siaz cxiv tsa têx tsưr ziv huôv tsar nuôv zax jông. Têx luz trôngz txir khơưz, txir khơưz kâuz tơưs pax đơưz vos thâuv txos chaix ntux yiaz, têx  vax txir thênhx caz txi txir siar đax, txir hồng siar liaz vos... tsik zos sâu nju nhiax txiax txix chos kôngz, txir nox xưz, tsênhv yênhx têx qơư huôv tsar nuôv zax jông, tâu ntâu tus kruô đêz jê pâuz txos, tuôx shuôk thiaz nuôv zax trâu Mộc Châu.

Muk shuôk zơưs Trần Xuân Kha, tổ dân phố Pa Khen, phường Cờ Đỏ vax txir khơưz đar yax 2 ha. Shông tưs cux li, ndax trâu ntu txir khơưz tơưs pax, txir khơưz siar muôx lok six ntâu kruô tuôx ndis shuôk. Zơưs Kha shir phaz thav: Txix thâuv hlôngr chos txir khơưz trơưk faz VietGAP, đros trâu huôv tsar nuôv zax, paz cur ziv nênhs sâu tâu yax 1 tỷ nhiax/shông. Cur taz tov muôz nhiax txuôk chês cxiv kho hlôngr chos 2.000m² zuz txir khơưz siar lis, taz sik tsênhv sâu tâu txir siar nzor, txir lox thiaz jông gâux, zos qơư chia trâu têx kruô tuôx cxaik zênhx zav, cơư đuôz hâur chaix tơưs pax thiaz ndis đê txir khơưz trâu chiv txir lưv shông.

Ntơưv Tổ dân phố 68, phường Vân Sơn, tix lâus Hà Văn Chiến ziv nênhs vax txir thênhx caz ly txos chai txir siar tưz yênhx kror qơư nto mông, chơư tâu ntâu tus kruô đêz jê pâuz txos, tuôx shuôk thiaz nuôv zax. Tix lâus Chiến thav pâuz: Cur ziv nênhs, chos yax 1 ha thênhx caz trơưk faz hữu cơ. Chaix thênhx caz siar, têx hnuz kaz tuần, ziv nênhs tưz tok tâu yax 1.000 tus kruô. Ntâu kruô nuôv zax tov kaz ndis shuôk, nox txir thênhx caz hâur vax, tsênhv zuôr uô huv krưr trâu tsêr nênhs. Viv li, tsik cxơưx tsik muôx nênhs zuôr thênhx caz, ziv nênhs sâu tâu yax 3 tỷ nhiax/shông.

Chia kria cxuô kror qơư pâuz têx huv kôngz, txir nox jông, Mộc Châu tưz tsik so kriz têx hâux lưv, grâuv pax đros trâu nthuôr muôs têx huv kôngz txir nox li: Hnuz grâuv pax đê txir khơưz; jias tưr đhia Marathon ntiax têz đhâu têx txox cêr jông gâux chuôk li nhoz hâur đaiv đuôz đros trâu têx vok har pax txir khơưz, ntông nox txix cxuô zav, trôngz yuôx zêx...Kruô nuôv zax tuôx shuôk Mộc Châu tâu pâuz mênhx đuô tuz kôngz luz nênhx, tưx xuôk têk đê txir, ndis shuôk têx cxênhx cxênhv chos, por hưv, tâu nox cxuô zav txir cias hâur vax. Lar haik hâur jias so hnuz 30/4 thiaz xiaz 1/5 nhiv kruôr đhâu, thị xã tưz tok tâu yax 50.000 tus kruô tuôx ndis shuôk.

Tsik zos pâuz nzaz nzơưv txir nhôngk, tox trôngz hâur pês kror muôx liv, ntâu HTX, kror qơư chos kôngz txir nox tưz cxưx nhiax zuôr chuôz zênhx yiaz lok tu jông ntâu zav kôngz txir nox li: chơưr txir khơưz, cuô đêx hâuk txir khơưz kaz jiz, txir plâux kra kruôr, txir hồng kra kruôr, txir tsơưz kra kruôr...Nhiv no, Thị xã tưz muôx 39 hax huv OCOP tâu công nhav, paz yôngv siaz bê lax luôv kôngz txir nox Mộc Châu, xav tơưv têx huv jông muôx txiax njis zov chênhr muôs trâu kruô nuôv zax. 

Đros trâu nzaz nzơưv thax tsav xênhz txơưv, đros trâu têx cêr tsov xav huôv tsar mênhx pêv, Mộc Châu taz tov cxiv tsa têx trôngz, vok har yênhx têx vax txir, kror qơư nuôv zax jông, cok nzir trâu đaiv đuôz nhiax txiax- xã hội ntơưv lax trôngz Mộc Châu zênhv hnuz zênhv  jông gâux đuô.