Tuôx shuôk HTX Kôngz lông uô luôv nuôv zax jok Phiêng Quài, tưz pov tâu ntâu tiz nênhs uô nuv đrông ntưk sâuv têx đaiv têz txir cà phê njuôz xiaz, shơư ntông txir lưv tsiz taz tov tâu đê txir. HTX tâu cxiv tsa shông 2022, nhiv no muôx 14 thành viên, chos 40 ha ntông cà phê, shơư ntông txir lưv tsiz thiaz 3,5 ha xaz lênhx tsar. Shông 2024, xav hur si têz chos cà phê ntơưv HTX sâu tâu 800 tấn txir; 200 tấn txir lưv tsiz; 150 tấn txir xaz lênhx tsar, tâu muôs trâu têx siêu thị lox ntơưv Hà Nội, cxuô luz ciaz. Xav hur si chor nhiax sâu tâu ntơưv HTX nto yax 18,5 tỷ nhiax, xav fênhx đraz iz thành viên sâu tâu txix 1- 1,5 tỷ nhiax/shông.

Tix lâus Hoàng Văn Kiên, thành viên HTX Kôngz lông uô luôv nuôv zax jok Phiêng Quài, kria pâuz: Cur ziv nênhs chos 2,5 ha cà phê shơư lưv tsiz thiaz 8.000 m² xaz lênhx tsar. Viv pâuz por hưv jông zos li tsưr ziv tso tơưv, li ntơư ntông txir lok six hloz jông, sâu nju, txir lox, jông gâux. Yênhx shông sâu tâu 40 tấn txir cà phê; 10 tấn txir lưv tsiz; 35 tấn txir xaz lênhx tsar, xav hur si sâu tâu yax 1,3 tỷ nhiax. Ndax chaix sâu txir, yênhx thành viên tsênhv paz txix 3- 4 tus nênhs thax tsav muôx hâux lưv uô tsik tsês, sâu tâu txix 300- 500 cxênhz nhiax/hnuz.

Lok sâuv HTX Kôngz lông jok Sàng Nà Tre, tâu kror moz siaz paz ntơưv nov hâu thax tsav, têx thành viên HTX tưz moz siaz cơưv shâuv têx kror yiaz txix ntâu tsưr ziv uô nox muôx kaz hâu hâur xã thiaz oz chas xã. HTX muôx 18 thành viên, chos 30 ha cà phê hur, mfông qir hữu cơ thiaz tsuôk zos đê têx luz txir siar. Xav hur si sâu tâu zuôr luôs 8 tỷ nhiax/shông, xav yênhx tus thành viên sâu tâu txix 400-600 triệu nhiax.

Tix lâus Cầm Văn Hoàng, Giám đốc HTX Kôngz lông jok Sàng Nà Tre, thav tiak: HTX taz tov cxiv tsa huv cà phê OCOP, moz siaz uô tiar cxênhx cxênhv huôv tsar kôngz lông hur, zok nriar qơư chos mênhx pêv, cxưx nhiax tu jông, ntiv huv hâur hnaz, xav tơưv hnaz ntiv huv jông gâux. Đros ntơư, HTX tsênhv kria cxuô kror qơư pâuz, kriz đar tsưr ziv uô nox thiaz tik bê lax luôv, nhav nxiak cà phê thax tsav qơư sơưr.

Chia huôv tsar truôx njês, xã Chiềng Mai tưz zaz zâuv pêx xênhv siz chos cxiv tsa HTX, huôv tsar lôngz lông trơưk cxênhx cxênhv hur, VietGAP, hữu cơ đros trâu uô luôv hax huv, paz kôngz txir nox muôx gri, muôx hâux lưv uô tsik tsês thiaz cxơưz nhiax txiax thax tsav tsik tsês huôv tsar. Yênhx shông, xã tưz siz chos kriz têx jias kria tsưr ziv uô nox yiaz trâu thành viên HTX thiaz tuz kôngz; paz tik bê lax luôv paz pơưs; tâu nthuôr muôs hax huv trâu têx jias kriz ciaz, kria pâuz hax huv. Đros ntơư, tsênhv muôz lok zôngv ntâu zav pênhr txix hâux lưv cxiv tsa jêx jok yiaz chia cxiv kho cêr muk lok hâur liax têz, kriz đar tsưr ziv uô nox thiaz uô luôv kôngz txir nox zôngx ziv.

Zơưs Nguyễn Hải Sơn, Chủ tịch UBPX xã, thav: Ntu zuôr txos, xã moz siaz paz têx HTX, tsêr luôv lok sâuv kror txâuk chai, lês trơưk chai VietGAP, cxiv tsa thax tsav chos kôngz lông hur; zaz zâuv cxiv tsa tsưr ziv HTX yiaz; paz cxơưz cêr lax luôv thiaz kriz đar tsưr ziv uô nox; sir jos cxiv tsa têx HTX huôv tsar kôngz lông njuôz, truôx njês, tâu tik bê lax luôv, paz tâu tiz nênhs hâur têz qơưk thiaz oz chas têz siaz nhiav. 

Nhiax txiax HTX zênhv hnuz zênhv nhav nxiak muôx vax huôv lok six zov chênhr hâur huôv tsar nhiax txiax-xã hội ntơưv Chiềng Mai, paz huôv tsar siz chos nhoz uô cê trâu tsik uô cê; paz kôngz txir nox muôx gri, kriz đar tsưr ziv uô nox, muôx hâux lưv uô, sâu nju nhiax, cxơưz huôv tsar kôngz lông truôx njês thiaz mênhx mov jêx jok muôx ntâu hlôngr yiaz.