HTX kôngz lông Hoàng Hải nhoz tiểu khu 34, zos đơn vị uô ntêx lông chos jâuz hur ntơưv xã Tân Lập. Tâu cxiv tsa shông 2016, txos nhiv no, HTX muôx 7 thành viên đros trâu qơư chos đar 40 ha chia chos jâuz hur. Sâu tâu 2.000 tấn/shông, chia muôs trâu têx ciaz khư, yar cơưv, thaz nzưr hâur tỉnh thiaz oz chas tỉnh; fênhx đraz HTX sâu tâu 5 tỷ nhiax/shông, têx thành viên sâu tâu 300 - 500 triệu nhiax/shông.

Tix lâus Nguyễn Văn Hải, Giám đốc HTX kôngz lông Hoàng Hải, haik pâuz: Pâuz têx nênhs zuôr zôngv nhiav, HTX tưz zaz zâuv thành viên moz siaz chos, tu trơưk tsưr ziv yiaz, tu, kriz đar car gruk đêx lol zưs cov tsik xuôv đêx, chos jâuz trơưk chai VietGAP, chia cov hur; viv li têx jâuz hur ntơưv HTX puôr lênhx tâu muôs trâu cêr luôv thiaz tâu têx nênhs sir zôngv njênhs.

Qơư chos jâuz ntơưv zơưs Nguyễn Cảnh Đảng zis nênhs nhoz tiểu khu 9, xã Tân Lập tưz muôz nhiax uô tsêr vor vak chia chos lưk suôr. Zơưs Đảng haik pâuz: Hâu shông no, cur zis nênhs tưz đros iz cxia zis pêx xênhv chos tâu 1,6 ha tsêr vor vak thiaz uô car đêx tưx zưs chia chos jâuz, txir. Nhiv no pêz taz tov đê txir lưk suôr, tuôr xav đê tâu zuôr luôs 200 tấn txir. Đros trâu tus gri muôs fênhx đraz tâu 10 cxênhz/chiaz, tuôr xav sâu tâu 2 tỷ nhiax. Njuôk li chos poz cưk thâuv ntêx mak chos jâuz sâu tâu nju nhiax đuô, hâux lưv hâur cxuô hnuz cux tsik phiv liv.

Huôv tsar chos jâuz truôx njês, xã Tân Lập gruô hu cxuô zis nênhs siz chos tsa HTX; moz siaz đros têx cơ quan cik txos ntơưv huyện kria pêx xênhv huôv tsar chos jâuz trơưk faz hax huv; đros têx paz pơưs kriz kria nzir tsưr chos, tu jâuz cxuô zav, tsưr ziv chos jâuz hur trơưk VietGAP; moz siaz chos jâuz cov muôs tâu gri, sâu tâu nju nhiax.

Nhiv no, Tân Lập muôx zuôr luôs 80 ha têz chos jâuz, fênhx đraz cxuô shông uô tâu 3 chiv jâuz; fênhx đraz 1 ha đê tâu 25 - 30 tấn/chiv; 1 ha têz chos jâuz sâu tâu yax 200 triệu nhiax/shông. Thôngz xã muôx 7 HTX chos jâuz, muôx chôngz nênhs côngv nhoz trâu HTX, têx thành viên tâu kria tsưr ziv chos, tu jâuz trơưk faz VietGAP thiaz chos luk zuôr têx hax huv; siz khov đros têx zis chos jâuz chia zuôr nôngz thiaz zuôr tuz kôngz têx nôngz jâuz.

Zơưs Thox Xênhv Vax, Chủ tịch UBPX xã Tân Lập, haik pâuz: Jâuz tưz yênhx iz hâur têx zav chos zov chênhr, paz pêx xênhv sâu tâu nju nhiax. Nhiv no, fênhx đraz pêx xênhv thax tsav xã sâu tâu 40 triệu nhiax /shông, txo grik tsơưs têx zis pluôs txos 1,9%, cxơưz paz tsưx truôx xã txâuk chai jêx jok yiaz.

Txix li têx jâuz chos muôs tâu gri, xã Tân Lập taz tov zaz zâuv pêx xênhv hlôngr chos jâuz hur trơưk VietGAP, huôv tsar chos jâuz hur đros trâu huôv tsar nuôv zax, cxơưz paz pêx xênhv hâur thax tsav muôx hâux lưv uô, sâu tâu nju nhiax txiax./.