Muk ntơưv txox cêr nhiv kruôr tâu yêz câuk ar đrâu thiaz kriz đar, tix lâus Lò Văn Sốm, cán bộ kria pêx xênhv chos caz tsiz Công ty cổ phần suôz thax caz tsiz Sơn La chox pêz muk trâu tix lâus Hà Văn Cường thax têz ntơưv jok Thàn, xã Chiềng Pằn, huyện Yên Châu. Yax 20 lênhx hâur paz pơưs taz tov pâur jos chia txiar caz tsiz, cưr caz tsiz lok trâu ntơưv yêz lox chia thâux muk trâu tsêr mair. Tix lâus Cường haik pâuz: Nưk zis muôx 1,5 ha têz, txix shông 2020 tror đrav ntêx chos iz cxia kôngz txơưr taz sik muôs tsik tâu gri, tov kaz ntơư đros trâu têx zis nênhs hâur jêx jok, zis nênhs chos luk chia chos caz tsiz muôs trâu Công ty cổ phần suôz thax caz tsiz Sơn La, tov kaz 3 chiv caz tsiz, tsik xav têx pênhr nhiax fênhx đraz 1,5 ha sâu tâu yax 100 triệu đaiv.

Chia cov sâu zuôr tas hur tiz si thiaz txâuk jov 5.000 tấn/hnuz, Công ty tưz muôz yênhx châuv tỷ nhiax chia kho, zuôr chuôz zênhx yiaz chuôz zênhx thiaz qơư tu đêx kiak nênhs. Shông 2023, Công ty tưz muôz nhiax zuôr chuôz zênhx zơưv yâur, chia cov sâu tas hur tiz si têx yâur thiaz sir zôngv uô đuô zav. Đros ntơư, đhok camera cxênhz yuôx ntơưv têx qơư tsês đêx kiak nênhs thiaz tso đêx muk txos ntuô ntơưv sở Tài nguyên thiaz Môi trường chia cơ quan saiz car têz qơưk cxênhz yuôx. Đros ntơư, tror lês njiaz luk “lês jông vax huôv txix li tsêr luôv thiaz tiz nênhs chos caz tsiz”, fuô lês ntâu têx cêr chai cxơưz paz tuz kôngz huôv tsar qơư chos caz tsiz; cxiv tsa qơư siz khov truôx njês txix li tsêr luôv thiaz tuz kôngz chos caz tsiz.

Muôx txâuk caz tsiz chia jov tâu 5.000 tấn/hnuz, Công ty tưz paz trâu zis nênhs chos caz tsiz têx mê nhuôv tâu côngv thâux caz tsiz. Hâu ntơư, ntâu zis nênhs muôx qơư chos đar thiaz ntâu tưz muôz nhiax zuôr yêz lox thâux caz tsiz, cê sâu nju nhiax txiax, cê paz muôx hâux lưv uô, caz tsiz tâu txiar trơưk chaix. Tix lâus Lò Văn Châu, xã Cò Nòi, huyện Mai Sơn, haik pâuz: Nưk zis muôx yax 2 ha caz tsiz, têx shông đrav ntêx, tưz muôz nhiax zuôr yêz lox thiaz chos luk thâux caz tsiz trâu Công ty thiaz chos luk lês trơưk đraiv cêr chai tsav yêz, tsik thâux hnhar đhâu chai, muôx ntâuz tax thair hur si, tsik chia caz tsiz pông trâu hâur cêr.

Iz chas ntơư, chia cov tsưx truôx têx qơư chos caz tsiz, Công ty tưz tsik so kriz têx jias saz lax, kria tsưr ziv chos, phax tar caz hmoz. Đros nov hâu têx xã, ban saiz car jêx jok zaz zâuv têx nênhs chos caz tsiz sir zôngv mair laix ar, tsa tơưv tổ pâur jos chia txo tsơưs têx nhiax ntiar nênhs uô hâux lưv, txo grik tsơưs nhiax uô hâux lưv, sâu nju nhiax txiax.

Haik txos têx qơư chos nhoz đêz, li: Chiềng Sại, Hua Nhàn, huyện Bắc Yên; thax tsav tox siaz Pá Hốc, huyện Yên Châu; Phiêng Pằn, Phiêng Cằm, huyện Mai Sơn, iz chas paz nhiax, chuôz zênhx trâu pêx xênhv txaik uô ntêx, Công ty tưz xair cán bộ muk txos trâu cxuô luz jêx jok chia kria tuz kôngz chos, zaz zâuv pêx xênhv chos têx zav caz tsiz lox thiaz kaz.

Zơưs Trần Ngọc Hiếu, Tổng Giám đốc Công ty cổ phần suôz thax caz tsiz Sơn La, haik pâuz: Cxuô shông Công ty tưz muôz yênhx châuv tỷ nhiax cxơưz paz tuz kôngz laix ar, uô cêr, zuôr qir. Caz tsiz tưz yênhx iz zav chos zov chênhr trâu saz uô kôngz lông, paz muôx hâux lưv uô, sâu nju nhiax txiax truôx njês trâu yax 10.000 zis nênhs thax tsav huyện Mai Sơn, Yên Châu, Bắc Yên thiaz Thành phố.

Nhiv no, 100% têx zis côngv siz khov chos caz tsiz đros Công ty cổ phần suôz thax caz tsiz Sơn La tưz tơưv đhâu cêr pluôs, ntâu zis bluô nux txix li chos caz tsiz. Đros ntơư, moz siaz muôz nhiax uô têx cêr yêz, vax tsê cxuô zav chia cov têx thax tsav tâu tuôr xav puôr lênhx tâu zôngv, tsưx truôx cêr siz khov txix li tsêr luôv thiaz têx nênhs chos caz tsiz.