Hâur xuz jôngr Xím Vàng, qơư chos sâm Ngọc Linh siv ntơưv HTX Sâm Xím Vàng taz tov pov muôx cêr khov vav. Tsa tơưv luz 12/2025 đros 8 thành viên, HTX tưz truôx siaz muôz yuôx njuôz sâm txix 1 - 4 shông chos ntơưv no, tsi njênhk têx muôx tsik siz thôngx thax chos sâm Lai Châu uô ntêx ntơư. Txos nhiv no, têx qơư chos tâu yax 1 ha sâm puôr lênhx hloz huôv jông, huv đêx ar huôz chuôz. Ntơưv no zos qơư chuôz chia HTX tsik tsês kriz đar qơư chos, đros đraiv pêx xênhv thax tsav huôv tsar nhiax txiax đhâu paz nôngz, tsưr ziv thiaz chos luk zuôr têx yuôx.      

Thav txos tsưr ziv chos sâm, zơưs Đinh Bá Thi, Giám đốc HTX, thav pâuz: Chos sâm taix khov truôx siaz thiaz muôx tsưr ziv tu saiz ntov nti. Thax tsav chos tsuv muôx nzôngr nzông, nông thiaz muôx khâuz lưx hâur xuz jôngr. Viv li, HTX tsik khênhr suô txos ar, sir zôngv shôngz, ntông, jêz ntơưv chia uô caz; muôz blôngx chiaz vor ar cov nông.Tsi njênhk trâu har jông tuôz siz, iz cxia qơư tâu cxaz nzir vak vor cov yar cxoz cuz. Iz mét xưv phaz tâu chos 16 tsoz. Thâuv tu saiz tâu kho đuô trơưk hnuz nhôngs thiaz kror hloz ntơưv yuôx njuôz, xuz chos trâu têx qơư muôx khâuz blôngx lưx. Trơưk tsov xav, yuôx njuôz sâm chos ntơưv no muôx kror khơưz zuôr kol muôs thâuv muôx 8 shông.

Kror gas siaz ntơưv yuôx njuôz nhuôv kruôr chos tưz muôx ntâu ziv chos, txos nhiv no, xã Xím Vàng muôx 55 ziv ntơưv têx jok Pa Cư Sáng thiaz Hang Chú chos yuôx njuôz sâm. Zơưs Câuz Xênhv Muôk ziv nênhs, jok Pa Cư Sáng, thav pâuz: Kaz shông 2022, tov kaz tâu nus txos, kria tsưr ziv chos yuôx sâm, cur tưz zuôr nzir nôngz lok chos siv hâur xuz jôngr. Nhiv no tưz chos tâu yax 3.000 thiar xưv phaz sâm. Tov kaz 4 shông tu saiz, yuôx hloz jông li ntơư vax tsê hax zav njênhs thiaz muôx jos tu saiz.

Zok nriar têx zav muôs tâu nhiax, fiv huv huôz chuô đêx ar tâu xã Xím Vàng moz siaz. Uô ntêx chos yuôx njuôz sâm Ngọc Linh tưz pov jông fiv hâur xuz jôngr. Taz sik, sâm Ngọc Linh yuôx njuôz chos ntêr shông, pênhr nhiax cxiv tsa ntâu, khov muôx tsưr ziv tu saiz. Têx qơư chos siv nhiv no, tsik tâu txos chaix khơưz zuôr kol. Viv li, đros trâu sox njôngr kror lox hloz, cxênhz sêz pok jông, pok muôx liv nhiax txiax, xair tsov thax tsav chos fiv huv thiaz cxiv tsa siz khov muôs tsuv lês ntov nti uô ntêx zuôr chos muk đêz đar.

Zơưs Đruôk Xênhv Hơưx, Phó Chủ tịch UBPX xã Xím Vàng, thav pâuz: Chos yuôx sâm Ngọc Linh zos faz huôv tsar yiaz tâu xã moz siaz, tok nrư zuôr cxaz nzir cêr nox nhoz trâu pêx xênhv. Ntu no muk, xã zuôr paz trâu HTX thiaz têx ziv nênhs chos; đros têx cơ quan chuyên môn kria tsưr ziv, cxênhz saiz txiax njis. Txix ntơư, zuôr xair tsov têx thax tsav fiv huv chia iz thênhv jux juk kriz đar qơư chos, chok nxiak por hưv tâu har jôngr.Đros ntơư, tsik so txuôk chuôs têx đơn vị sâu zuôr, uô tsês, tok txos truôx njês trâu têx yuôx uô tâu.

Muôx têx txơưv zênhx đros kror ndo njôngr ntơưv HTX thiaz pêx xênhv, yuôx njuôz sâm taz tov kriz tâu cêr khov vav trâu ntơưv Xím Vàng. Ntơư tâu saiz zos faz tsưr ziv paz cêr nox nhoz truôx njês, cê muôs tâu nhiax trâu pêx xênhv, cê lês đraiv txos cêr muôx liv nhiax txiax por hưv jôngr.