Txix thâuv sơưr nzor xiaz 1, têx paz nênhs tâus cêr muôx 200 cưk txux, haik cưr cxiax, sênhr chêr jêx jok tuôx ntơưv têx phường Thảo Nguyên, Mộc Châu, Mộc Sơn, Vân Sơn tưz côngv tâus cêr thiaz ndox têx jax sênhr chêr jông ntơưv têx hair nênhs: Hmôngz, Cho, Poz Ziz, Maz sâuv iz cxia ntu cêr lox số 6, yar tiax UBPX phường Mộc Sơn, tiểu khu qơư uô si tổ dân phố 3 thiaz 7, phường Mộc Sơn; yar tiax lox 8/5. Têx tsôngk hnar hair nênhs tsơưs cênhz cưv muôx ntâu xiv jông jav, yaik truôv đhia đros luz suôz kênhx, suôz đruôk đax, đruôk nênhz..., hur si tưz xav tơưv iz đaiv đuôz txux chi jông nhoz hâur lax trôngz.

Têx hluôk gâux Poz Ziz tưz uô jông tuôr têk sênhr chêr; têx tuz nxaik hluôk Hmôngz kria pâuz têx txux chi jông đhâu jax đhia kênhx muôx đas jos thiaz yuôz kênhx jông hu txos fông zưs. Têx tuz nxaik hluôk Maz ndox zuk hair nênhs têx jax sênhr chêr jông; têx tuz nxaik hluôk Cho moz siaz cho tsưz lov jêv đrông ntưk...Tsik muôx sav fiax, tsik muôx cêr siz đrus đêz, têx jax sênhr chêr tâus cêr paz pêx xênhv thiaz kruô nuôv zax côngv nthuôr txux chi, cxaik zênhx zav thiaz siz njiz lov jêv ntưk.

Đros trâu têx cưk txux, côngv nthuôr cêr lov jêv zos jias chia kria têx txux chi kror muôx gri đhâu ntâu fâuv nênhs. Cưk txux Lưr Xênhv Muôk, paz nênhs tâus cêr Hmôngz phường Thảo Nguyên, kria pâuz: Zuôr luôs 15 shông đhâu, shông tưs cur cux tâu chơư tuôx txuv têx hâux lưv nthuôr cêr lov jêv jêx jok tâus cêr thâuv txos hnuz Tsiaz tsa tâu têz qơưk xiaz 2/9. Cur đros paz haik cưr cxiax đhia kênhx Hmôngz. Cur lok six jông siaz thâuv zuk hair nênhs txux chi tâu txuôs jông, kria trâu pêx xênhv thiaz kruô nuôv zax côngv đros pâuz. 

Niav lâuk Lường Thị Huân, Thơưx paz nênhs tâus cêr Poz Ziz, phường Mộc Sơn, thav tiak: Yênhx jias nthuôr cêr lov jêv zos jâus pêz cxaz nzir cêr kria sơưr đơưk pâuz zuk hair nênhs têx txux chi jông. Iz chas ndis tâus cêr têx txox cêr lox, pêz tsênhv ndox têx jax sênhr chêr fuôv txiax, sênhr chêr nzuôv...chia nthuôr trâu pêx xênhv tâu saiz.  

Muk đhâu yênhx txox cêr, têx paz nênhs tâus cêr gra tuôx cêr lov jêv đrông ntưk, gruô hu chôngz pêx xênhv thiaz kruô nuôv zax tuôx ndis shuôk. Ntâu tus kruô nuôv zax côngv đros têx cưk txux, cưk haik cưr cxiax, sênhr chêr jêx jok thav. 

Cê cơư đuôz thiaz cxaik zênhx zav têx paz nênhs tâus cêr, niav lâuk Nguyễn Thị Chanh, kruô nuôv zax tuôx ntơưv Thành phố Hà Nội, cê haik tiak: Ntơư zos jâus tiv 2 cur tuôx txos trâu Mộc Châu ndax têx hnuz so xiaz 2/9, cur lok six nhiav thax tsav no. Tâu saiz ntâu jax cưr cxiax, sênhr chêr jông, pâuz txos Mộc Châu muôx cxuô hair nênhs côngv nhoz uô cê, yênhx hair nênhs nưk muôx nưk têx tsôngk hnar thiaz txux chi tsik siz thôngx. Cxuô hâux lưv no tưz paz cur pâuz mênhx đuô thax tsav thiaz tiz nênhs Mộc Châu têx kror jông.

Đros têx hâux lưv tâus cêr, cxuô cêr uô si pêx xênhv tênhx tus ho xav tơưv kror siz chos uô hâur pêx xênhv thiaz kruô nuôv zax lov jêv ntưk. Lar haik, shông no, zos jâus xuz thơưx jax muôx chôngz nênhs côngv por poz tâu kriz, yênhx iz hâur têx đuôz jông hâur cxênhx xưv. Hâur yênhx cxênhz tus nênhs saiz, têx luz txir poz por muk por lok jông li iz txox hluô txuôk, muôz txux chi cênhz cưv hâur jêx jok huôv tsar đêz đar đuô.

Tix lâus Xênhz Xênhv Phax, jok Nậm Nghẹp, xã Ngọc Chiến, haik: Ndax têx hnuz so, grâuv pax, nox Tsiaz, cưr tix Hmôngz xã Ngọc Chiến tsênhv txuôs jông cêr uô si por poz. Hnuz no, cêr uô si cênhz cưv tưz tâu kriz ntơưv Mộc Châu uô trâu têx cưr tix Hmôngz jông li pêz lok six jông siaz. Pêz tror txuôs jông thiaz huôv tsar zuk hair nênhs txux chi chia kria têx kruô nuôv zax cxuô kror qơư côngv pâuz. 

Iz chas ntơư, ntơưv tsêr ntâuz txux chi, qơư têx paz nênhs tâus cêr côngv đros têx xã hâur tỉnh nthuôr  txux chi muôx ntâu xiv tsênhv kriz têx hâux lưv ndis shuôk txơưr li: Tuôr nduôr blêx, ntâuk ntir kaiz, đhia pak, tuôr têk sênhr chêr, cho tsưz... tưz paz têx hnuz so Tsa tâu têz qơưk ho lov jêv đuô.

Côngv siv tuôr nduôr blêx, tix lâus Bùi Văn Hiển, kruô nuôv zax tuôx ntơưv tỉnh Hưng Yên, shir phaz thav:  Pov tâu têx tuz hluôk Hmôngz txơưx tuôr nduôr blêx zôngx ziv, tov kaz siv tuôr cur pov tuôr nduôr mak tsik zos zôngx ziv. Hâux lưv tuôr nduôr tsuv tas ntâu đas jos thiaz kror uô jông tuôr hâur oz lênhx. Ntơư zos jias ndis shuôk nziv siaz hênhr trâu cur.

Nthuôr txux chi tâus cêr zos luôs hâux lưv lok six zov chênhr hâur Tuần Txux chi - Nuôv zax Mộc Châu shông 2026, paz huôv tsar kria pâuz đêz đar txux chi cênhz cưv jông txos hur si kruô nuôv zax côngv pâuz. Đhâu tsôngk hnar, cưr cxiax, sênhr chêr thiaz têx cêr uô si pêx xênhv tênhz tus, têx cưk txux đros cưk haik cưr cxiax, sênhr chêr jêx jok tsik zos txuôs jông, huôv tsar txux chi xưz mak tsênhv piar jax đaz nênhs thav txos zuk hair nênhs luz nênhx. Viv li, txux chi tưz muk đhâu jêx jok, côngv nhoz trơưr hâur ntu nênhx yiaz nhiv no.