Trơưk tsov xav, chiv kôngz ntux yiaz shông 2026, hur si tỉnh tsêz chos yax 13.100 ha blêx. Trơưk đêx ar huôz chuô thiaz cêr uô kôngz, ngành Kôngz lông tưz kria pâuz mênhx pêv hov nông thiaz chaix tsêz chos kôngz trâu yênhx thax tsav. Mênhx pêv mak, đros trâu têx thax tsav ntux sor, tưx bax tâu đêx zưs li: Phù Yên, Yên Châu, Quỳnh Nhai, Sông Mã... tưz zaz zâuv tuz kôngz tsêz chos chiv kôngz ntux yiaz châux thiaz ntux yiaz zov chênhr, sir jos tsêz chos cov tas kôngz uô ntêx hnuz xiaz 1/3/2026. Đros trâu têx xã tox siaz Sốp Cộp, Bắc Yên, Vân Hồ... chiv tsêz chos kôngz tâu bax lis đuô, moz siaz tsêz chos chiv kôngz ntux yiaz lis thiaz suôx câuv uô ntêx hnuz 31/3/2026. Ngành chuyên môn zaz zâuv tsêz chos têx nôngz blêx lur hnuz nhôngs, chưx tâuk ntux no, nziv chos ntux kruôr; đros ntơư tsik so tso tơưv têx tsưr ziv vor thair hnaz zak zưr tir tar no trâu zuz blêx, uô jông laix hair, txuôs jông đêx fiv huv chia por hưv jông chor zuz blêx nhiv kruôr tsêz chos tâu. Tsov xav tsik tsês tsêz chos têx nôngz blêx hloz jông, sâu nju thiaz muôx gri, muôx tsơưs caz hmoz hiav, chưx tâuk ntux kruôr; lur hnuz nhôngs nziv chos đêx ar huôz chuô yênhx thax tsav.

Đros trâu hâux lưv bax nôngz kôngz chos huv chaix, côngz xưv bax chuôz zênhx uô liax têz uz no cux tâu tsov xav zos luôs hâux lưv lok six zov chênhr paz chos chiv kôngz ntux yiaz huv chaix. Têx tsêr luôv, đơn vị uô luôv chuôz zênhx uô liax têz hâur thax tsav tỉnh tưz cxiv tsa tsưr ziv huôv tsar, txuôs jông, bax txưv nôngz kôngz chos, qir mfông, yuôx tsuôs por hưv kôngz lông cxix cxuô chia muôs trâu tuz kôngz.

Nhiv no, hur si tỉnh muôx yax 600 kror qơư, tsêr thaz nzưr uô luôv chuôz zênhx uô liax têz nhoz cxuô xã, phường; hâur ntơư, ntâu kror qơư muôs huv cấp 1 tưz đros têx tsêr luôv sâu bê siz chos uô nox, paz bax txâuk hax huv muôs, tsik chia tsik muôx huv muôs, ndê gri hâur ntu huôv tsar kôngz lông. Zơưs Nguyễn Như Hùng, Chủ tịch HĐQT Công ty cổ phần Qir mfông Sông Lam Tây Bắc, thav pâuz: Chiv chos kôngz ntux nyiaz shông no, Công ty tsov xav zuôr sir jos muôs cov tas 15.000 tấn qir hữu cơ thiaz vô cơ. Chia têx huv nzor txos têk tuz kôngz, gri nhiax fiv huv, Công ty tưz đros 11 kror qơư muôs huv cấp 1 hâur thax tsav tỉnh sâu bê chos luk muôs têx hax huv pâuz mênhx qơư uô, gri nhiax fiv huv, paz por hưv gri nhiax chuôz zênhx uô liax têz uz no truôx njês.

Đros bax txưv chuôz zênhx uô liax têz uz no chia muôs, hâux lưv bax txâuk đêx zưs cux tâu tsov xav lok six zov chênhr paz chiv kôngz ntux nyiaz sâu tâu nju. Nhiv no hur si tỉnh muôx 111 luz pak đêx tâur; 132 tus njưs tâur đêx thiaz yax 2.400 cưx đêx, cưx lias. Công ty TNHH iz thành viên Saiz car, sir zôngv njưs tâur đêx Sơn La - đơn vị tâu zok saiz car têx njưs tâur đêx, pak đêx tâur, cưx đêx, cưx lias tưz đros têx cơ quan, đơn vị cik txos, nov hâu thax tsav kror qơư muôx njưs tâur đêx, pak đêx tâur fuô lês têx tsưr ziv por hưv jông njưs tâur đêx, pak đêx tâur.

Zơưs An Đức Hậu, Phó Giám đốc Công ty, haik tiak: Chia bax txâuk đêx zưs trâu chiv kôngz ntux yiaz, Công ty tưz tưx tsov xav tsưr ziv cxênhz yuôx têx cưx đêx, cưx lias, pak đêx tâur, njưs tâur đêx; gruk đêx fiv huv yênhx thax tsav; tsik so cxênhz yuôx, cxov, bluô têx nênhs nav oz saz cưx đêx, cưx lias, njưs tâur đêx, pak đêx tâur cxiv puôz vax tsêr, uô uz no tsik zos chai, paz hlôngr yiaz muôx kaz hâu hâux lưv saiz car, sir zôngv têx njưs tâur đêx. Đros ntơư, chox car têx chi nhánh tâu saiz car tsik tsês zênhx max thoz huk, cxiv kho têx cưx đêx, cưx lias, njưs tâur đêx tưz puôk; tso đêx fiv huv. Shông 2025, đơn vị tưz cxiv kho thiaz uô yiaz 67 hâux lưv, xav hur si yax 37,5 tỷ nhiax. Têx dự án zuôr uô tiar hâur shông 2025.

Iz chas ntơư, ngành Kôngz lông tsênhv tsik so chox car, kria pâuz tsưr ziv, đros thax tsav thiaz pêx xênhv siz chos tsêz chos chiv kôngz ntux yiaz huv chaix. Zơưs Trần Dũng Tiến, Phó Giám đốc Sở Kôngz lông thiaz Por hưv cêr nyiaz hur thav kria: Sở tưz chox car têx phòng chuyên môn, đơn vị tâu saiz car đros UBPX cxuô xã, phường kria pâuz mênhx pêv têx hov nôngz, chiv tsêz chos kôngz fiv huv yênhx thax tsav đêx ar huôz chuô. Đros ntơư, ngành Kôngz lông tsênhv tsik so zaz zâuv, kriz jias kria tuz kôngz pâuz têx tsưr ziv por hưv jông kôngz lông; tưx tsov xav tsưr ziv tir tar no trâu zuz blêx thiaz têx jêk liax nhiv kruôr chos tâu; sox njôngr ntov nti caz hmoz hiav chia zênhx max nzor pâuz, tsuôs yuôx tuôx caz hmoz cias hâu chiv, tsik chia caz hmoz cik pur pêk ntiax. Têx thax tsav cux tâu cxiz cov đros têx đơn vị saiz car njưs tâur đêx siz chos tso đêx, uô jông txuôs sir zôngv đêx muôx kaz hâu, gruk đêx zưs uô ntêx trâu têx liax têz tsêz chos kôngz huv chaix.

Tâu kror siz chos uô siz luôs jok ntơưv ngành kôngz lông, têx thax tsav, tsêr luôv uô luôv chuôz zênhx uô liax têz uz no, đơn vị saiz car njưs tâur đêx, đros kror tưx tsov xav tsưr ziv uô ntơưv pêx xênhv, chiv kôngz ntux yiaz 2026 hâur thax tsav tỉnh chia siaz zuôr tâu fuô lês muôx kaz hâu. Ntơư zos qơư chuôz zov chênhr chia bax txâuk cxur nox, paz huôv tsar kôngz lông truôx njês, tuz kôngz sâu nzir nhiax zôngv, cxiv tsa luz nênhx zênhv hnuz zênhv tâu jông.