Trơưk cêr uô têz qơưk Đảng bộ xã Mường Chanh, hâu shông 1943, thâuv txâuk cêr uô têz qơư, Chi bộ Tsêr tux Sơn La bos tsa tơưv kriz uô têz qơư xuz thơưx ntơưv Sơn La, ntơư zos “Paz hluôs nênhs chơưv têz qơưk” muôx 2 paz: Tỉnh lỵ thiaz huyện Mường La. Tov kaz jâus hla tơưv đhâu tsêr cơư nênhs ntơưv têx nênhs mas cơưv tux chính trị ntơưv Tsêr tux Sơn La, Phaz Cir lês ntov chai, têx paz hluôs nênhs chơưv têz qơư thâuz muk uô nuv bos jông lok sik tso tsês uô nuv tok trâu ntu muôx cêr sơưv zênhx. Trơưk chox car ntơưv Chi bộ, đồng chí Chu Văn Thịnh tâu bos zok hâux lưv đros cưr  tix thax tsav no hlôngr nuv uô, zok qơư cxiv tsa cơ sở thiaz qơư uô têz qơư tov kaz no. Đhâu iz ntu njuôk tsov, zơưs fuô trâu Chi bộ Tsêr tux Sơn La xair thax tsav xã Mường Chanh (Châu Mai Sơn) chia cxiv tsa cêr siz tưr. Kaz shông 1943, Paz hluôs nênhs chơưv têz qơư Mường Chanh tsa tơưv muôx 12 tus nênhs thiaz ntâuz tus pêx xênhv njênhs siaz. Nuv uô ntơưv paz hluôs nênhs chơưv têz qơư tưz muôx kror kriz tâu cêr to tâuz muk đêz đar hâur tsôngv pêx xênhv, gruô hu pêx xênhv taix cov txo tsơưs thêv sê, kênh liax têz, haik tsênhz truôv lox hloz ntơưv cêr siz tưr cxiv tsa têz qơưk Mường Chanh cux li ntơưv Sơn La.

Hnuz 19/8/1945, Paz Poz Ziz chơưv têz qơư tưz gruô hu pêx xênhv côngv puôr ndis tsêr chánh phìa, zuôv lơưv uô tus sưz thiaz zok thưx, ntâuz ntơưr trâu cách mạng. Yênhx côngz ntơưv jâus txênhz, yênhx jos lox hloz trâu pêx xênhv Sơn La txênhz tâu nov hâu haur hur si tỉnh. Txix têx cêr paz lox hloz ntơư, shông 1998, Mường Chanh tâu Chủ tịch têz qơư puz côngz Anh hùng Lực lượng vũ trang pêx xênhv ntu ntâuk tros Phaz Cir. Hnuz 28/4/2006, thax qơư uô têz qơư cách mạng Mường Chanh tâu UBPX tỉnh xair sơưr hov txuôs tsês cêr uô têz qơư.

Yax 80 shông đhâu, têx nux gri tâu cxiv tsa txix cênhz cưv uô cách mạng taz tov yênhx jos cxơưz chia Đảng bộ, nov hâu thiaz pêx xênhv Mường Chanh côngv đas jos cxiv kho jêx jok zênhv hnuz zênhv bluô nux jông jav. Mường Chanh têx hnuz no taz tov muôx mênhx mov yiaz.

Zơưs Nguyễn Biên Cương, Chủ tịch UBPX xã, thav pâuz: Lês nov hâu thax tsav 2 cấp, txix luz 7/2025, xã Mường Chanh tsa tơưv txix sâu uô cê oz xã Mường Chanh thiaz Chiềng Chung. Tov kaz sâu uô cê, xã Mường Chanh muôx 14 jok, lox đar 101,47 caik xưv phaz, toz hâu nênhs 11.275 tus. Xã tưz xav huôv tsar nhiax txiax trơưk faz muôx liv trâu yênhx thax tsav. Zov chênhr, chos nzir cà phê, xã tưz zaz zâuv pêx xênhv txar qơư nhoz, txuôk kho yax 500 ha têz nôngz yiaz sâu nju, jông kaz. Kriz ntâu paz c ơưv tsưr ziv, kria sir zôngv qir trâu hữu cơ. Txos nhiv no, tas nro xã muôx 2.800 ha cà phê ntơưv cxuô jêx jok, đê tâu txir yênhx shông jê 40.000 tấn, zos 1 hâur têx xã muôx ntâu cà phê ntơưv tỉnh.

Đros muk hâur têx lênhx cà phê njuôz xiaz, zơưs Lò Mạnh Quyết, jok Cang Mường, thav tiak: Shông 2009, cur muôz 2 ha têz chos poz cưk, kol ntông hlôngr chos cà phê. Txos nhiv no, cur ziv nênhs muôx 7 ha cà phê chos txir nkhơưz kaz jiz, txir lưv tsiz thiaz txir mắc ca; khơưz tâu 4.000 thiar xưv phaz đêx zus njêk. Cur ziv nênhs cxiv tsa têx car gruk đêx zus tưx nông ntuz, zôngv đêx tsơưs, tsơưs nênhs uô nuv, cê chok nxiak ntông hloz huôv truôx njês trâu chaix ntux kruô. Txix li qơư uô tơưv nhiax cxuô zav uô cê, shông 2025, tsik xav têx nhiax sir tas, cur ziv nênhs tsênhv tâu nhiax tsav liv yax 1 tiv đaiv.

Mường Chanh tsênhv nto mông zos trôngx têz muôx nôngz blêx kaz tan nhe jôngx, tsư ha, yênhx kôngz txơưr hlo trâu zuk thax tsav. Pêx xênhv hâur xã tưz siz khov yênhx thax tsav uô tơưv hax huv uô cê, cxiv tsa bê lax luôv huv. Zơưs Hà Văn Hè, Giám đốc HTX uô kôngz lông Mường Chanh, jok Đen, thav pâuz: HTX tsa tơưv shông 2022, zaz zâuv 20 ziv hâur jok đros chos 5 ha blêx blâuv tan nhe. HTX kria têx thành viên uô trơưk faz hữu cơ. Shông 2025, blêx blâuv tan nhe ntơưv HTX tưz tâu côngk nhav zos huv OCOP 3 hnuz kuz, gri muôs 55 cxênhz nhiax /chiaz.

Đuô li, xã tsênhv chos siz hlôngr jê 300 ha blêx liax; zus trơưr yax 5.800 tus tsiax lox, yax 55.800 tus kaiz ok, chos 100 ha tâux puz tsiax. Tas nro xã muôx yax 400 luz tsêr muôs huv, qơư uô luôv, cxuô zav. Nhiax txiax huôv tsar, pêx xênhv ntu nênhx truôx njês, trâu siaz paz jos, paz cxuô zav lês cxiax cxênhv cxiv kho jêx jok yiaz. Đros trâu têz qơư paz, ntâu tsêr txux chi jêx jok, cêr yêz, yar cơưv tâu cxiv tsa jông khaz sênhz lus.

Huôv nzir cênhz cưv trôngx têz uô cách mạng đrav ntêx, pêx xênhv cxuô zav nênhs xã Mường Chanh tror thôngx siaz, cxiv kho jêx jok zênhv hnuz zênhv bluô nux jông jav. Sir jos cov txos shông 2030, sâu siz bâus trơưk toz hâu nênhs tâu 55 triệu nhiax/shông; ziv pluôs tsơưs yuôr kil đuô 3%; nênhs uô nuv tâu cơưv choz kria tâu 10%; sâu nhiax txiax tsar siz bâus 6%/shông; huôv tsar nuôv zax tsôngv nênhs đros đraiv tsưx tsês têx jông txux chi.