Đhâu cxênhz hâur thax tsav xã Thuận Châu muôx 67 zis pluôs nhoz tsêr khâuz hlaz, tsêr ntuôs, muôx nzir tov kaz hnuz 15/5/2025, txâuk chai chia paz trơưk cêr chai. Txix li kror moz siaz chox car ntơưv tỉnh thiaz cêr côngv têk ntơưv nov hâu thax tsav, 67/67 zis tưz piz lês hâux lưv uô tsêr, kho đuô tsêr txix li đraz hli 11/2025 thiaz lês tiar trơưk đraiv cêr tuôr xav, tâu 100% cêr tuôr xav tso tơưv. Hur si nhiax lês hâux lưv tas 3,96 tỷ đaiv. Hâur ntơư, Pênhr nhiax “Viv nênhs pluôs” tỉnh Sơn La paz 3,9 tỷ đaiv trâu 66 zis, muôx 64 luz tsêr uô yiaz thiaz kho đuô 2 luz tsêr; 1 zis nênhs muôx côngz tâu paz 60 triệu đaiv chia uô tsêr. Têx tsêr tov kaz uô tiar puôr lênhx txâuk chai tiêu chí “3 khor”.

Hâur jias zok tsêr, thơưx car tỉnh thiaz têx sở, ngành tưz puz huv pir txưr nhiax paz trâu têx zis pluôs, jê cêr pluôs hâur thax tsav xã Thuận Châu. 

Muôx luk jias no, đồng chí Đặng Ngọc Hậu tưz kruôk txos kror moz siaz lês hâux lưv ntơưv xã Thuận Châu hâur ntu lês hâux lưv paz uô tsêr nhoz. Đros ntơư, cxiz cov thax tsav tror cxênhz têx zis pluôs nhoz tsêr khâuz hlaz, tsêr ntuôs; moz siaz cxiv tsa cêr tuôr xav mênhx pêv hâur shông 2026 chia tror fuô lês hâux lưv, cxơưz paz huôv tsar nhiax txiax - xã hội hâur thax tsav. Đồng chí xar cov têx zis nênhs tâu paz nhiax zuôr saiz hloz têx tsêr tâu paz; sir jos uô kôngz lông cov truôx njês thiaz huôv tsar nhiax txiax zis nênhs.

Hâur jias no, têx đại biểu tưz txiar ntâuz uô tiar thiaz đhok fiax tsêr trâu pos Lò Thị Thoan, nhoz trâu jok Mòn zis nênhs; muk shuôk iz cxia zis nênhs tâu paz nhiax chia uô tsêr nhoz hâur thax tsav.

Têx tsêr tâu uô tiar tưz tsik zos paz trâu zis nênhs muôx qơư nhoz truôx njês xưz, mak tsênhv chuôz jos trâu têx zis nênhs uô ntêx Tsiaz têz qơưk Nênhk shông 2026, paz trâu zis nênhs muôx nzir cêr shir phaz, tso siaz uô nox, uô hâuk, iz thênhv jux juk cxiv tsa luz nênhx tâu jông.