Pêz mul shuôk jok Mòng, xã Tà Tộc, ntơưv tsêr txux chi nhiv kruôr tâu uô tiar truôx khor, jông jav txix nhiax pênhr hâur Hâux lưv huôv tsar nhiax txiax-xã hội thax tsav hair nênhs tsơưs (Hâux lưv 1719), ndax jias kriz Hnuz grâuv pax pêx xênhv cxuô hair nênhs thôngx siaz lov jêv ntưk, shir phaz lus. Jok Mòng muôx 153 ziv đros 774 toz hâu nênhs, 100% zos hair nênhs Poz Ziz. Đrav ntêx, jok luz tsêr txux chi tsêr xor txias, tưz puôk lơưv ntâu, yênhx jâus cơưv tsik txâuk qơư trâu pêx xênhv jâuv li ntơư tưz tuôr thênhv txos hâux lưv nthuôr txux chi, haik cưr cxiax. Hâu shông 2024, txix nhiax pênhr Hâux lưv 1719, jok tưz tâu cxưx zuôs luôs 1 tỷ nhiax cxiv puôz tsêr txux chi đar 125 m². Zơưs Lò Văn Tân, Bí thư Chi bộ, Hâu jok Mòng, shir phaz thav: Txix thâuv muôx tsêr txux chi yiaz, pêx xênhv tưz muôx qơư cơưv shâuv cêr chai đar pho, jông jav, uô nênhx shir phaz đuô. Nhiv kruôr đhâu, jok tsênhv kênh 50 triệu nhiax txix pênhr por hưv jôngr chia lênhv yar tiax bê tông, zuôr chuôz zênhx uz no trâu tsêr txux chi.

Txos jok Kéo Bó, muôx 42 ziv đros yax 200 toz hâu nênhs, 100% zos Hmôngz, zôngx ziv pov tâu kror hlôngr yiaz. Txox cêr yêz muk txos ti ntuô đrôngs lox, tsêr nhoz khor kho zênhv hnuz zênhv muôx ntâu, nhoz sâuv têx đaiv têz cưr tix Hmôngz taz tov sir jos ntaik cov tas poz cưk chiv ntux tsâus, chos txir plâux chiv yiaz. Têx shông đhâu, Ban saiz car jok tưz moz siaz zaz zâuv, gruô hu cxuô lênhx cxuô tus huôv tsar kôngz lông trơưk tsưr ziv yiaz, chos 41 ha poz cưk, 5 ha txir plâux, tu zus yax 200 tus nhux, tưv. Têx ziv pluôs, jê cêr pluôs tâu paz nôngz, tsưr ziv chos thiaz cxưx nhiax cxiv puôz vax tsêr, cêr muk lok txix Hâux lưv 1719 thiaz Hâux lưv têz qơưk cxiv tsa jêx jok yiaz. Tsov xav tas shông 2025, jok muôx 8 zis hla đhâu cêr pluôs, grêk têx ziv pluôs hâur jok yuôr 2 ziv.

Xã Tà Hộc muôx 20 jok, cxuô hair nênhs Poz Ziz, Hmôngz, Poz Thơưx, La Ha, Choz Tsiz nhoz uô cê. Ntu 2021 - 2025, xã tưz sir zôngv muôx kaz hâu nhiax pênhr Hâux lưv 1719, moz siaz pax ziv pluôs, jê cêr pluôs, ziv nênhs nhiv kruôr hla đhâu cêr pluôs; cxưx nhiax uô kror đêx hur sir zôngv; huôv tsar kôngz lông; cxiv kho tsêr cơưv, tsêr txux chi, cêr muk hâur jêx jok. Zơưs Ngô Minh Tuấn, Chủ tịch UBPX xã Tà Hộc, thav pâuz: Txix shông 2021 txos nhiv no, fuô lês Hâux lưv 1719, xã tâu paz zuôr luôs 24 tỷ đaiv cxưx nhiax cxiv puôz têx hâux lưv: Cêr muk lok hâur jok Pù Tền, Pá Hốc, cêr muk trâu liax têz jok Kéo Bó; uô kror đêx hur trâu jok Pá Nó sir zôngv; tsêr txux chi têx jok: Hộc, Bơ, Mòn, Mường; qox hla đêx txix jok Hộc-khu Xóm Cháu, jok Mường, qox hla đêx Hạc - jok Pơn; paz nôngz tsiax cxu zus trâu jok Kéo Bó. Xã cxơưz vax huôv cxênhz yuôx ntơưv MTTQ, têx đoàn thể, tsik so zaz zâuv, gruô hu pêx xênhv jông siaz côngv đros uô, cxênhz yuôx, por hưv têx kror uô tâu. Viv li, têx dự án tâu fuô lês zôngx ziv, sir zôngv muôx kaz hâu tov kaz tâu lês tiar.

Tsik tok Têz qơưk paz, pêx xênhv Tà Hộc tưz đrơưv đrôngk hlôngr yiaz nôngz kôngz chos sâu nju, hloz jông thiaz muôx gri cux li kriz đar trâu cxuô luz jok. Nhiv no, pêx xênhv hâur xã chos 73 ha liax 2 chiv; yax 1.700 ha poz cưk nôngz yiaz; 664 ha ntông nox txir, hâur ntơư, zuôr luôs 142 ha chos trơưk faz hữu cơ; 458 ha caz tsiz; 57 ha cà phê; 57 ha txir plâux; 73 ha jâuz; tu zus yax 70.500 tus nhux tưv, kaiz ok. Shông 2025, xav fênhx đraz iz toz hâu nênhs sâu tâu zuôr luôs 35 triệu nhiax/shông; têx ziv pluôs grêk tsuôk zos yuôr txix 44,9% shông 2021 yuôr 27,51% shông 2025 (fênhx đraz yênhx shông grêk 3,49%).

Hâux lưv 1719 tâu fuô lês ntơưv Tà Hộc tưz zos qơư chuôz zov chênhr por hưv pêx xênhv luz nênhx hlôngr yiaz. Txos nhiv no hâur thax tsav xã muôx 4 yar cơưv txix mầm non txos THCS đros 120 nhóm, lớp, yax 5.000 shuv xênhz; 3/4 yar cơưv txâuk chai têz qơưk hov I; 100% txox cêr tâu uô jông, zuôr luôs 75% cêr muk lok hâur jok, ntâu luz jok tâu lênhv tas bê tông; 99,7% ziv nênhs sir zôngv điện têz qơưk, 99% ziv tâu sir zôngv đêx hur...Têx hâux lưv uô tâu no, paz cxơưz nhiax txiax- xã hội thax tsav hair nênhs tsơưs tsik tsês huôv tsar truôx njês.