Kar nox Poz Ziz tsik zos saiz hloz tiz uô tâu jông, mak zos kror kaz tsư ha ntơưv têx zav uô tơưv. Viv li, iz ntu pâuz đros trâu xav tơưv tsưr ziv. Kror no pov njôngr chuz mor txix muôz blôngx jak xiar, khênhr pov hâur pluôk mor Poz Ziz hâur têx hnuz uô đaz kruô, Tsiaz lok sik tok kruô tsênhv chênhz.

Muôv Lò Thị Thủy, ntâu shông uô mor jak xiar nhoz xã Thuận Châu, tỉnh Sơn La, thav: Chia uô tâu mor xiar, nênhs Poz Ziz zôngv blôngx jak mor, iz zav đrox chos nhoz kaz vas tsiz tâus. Thâuv tsênhv nhôngk, blôngx njuôz taz sik râuz bâu muôx cuô xiar, zôngv tsâu cxur blâuv mav chuz. Sơưr nzor chuz, cur zênhx uô trơưr viv zos kar nox cênhz cưv Poz Ziz, cê muôs, cê tsưx tsês txux chi ntơưv jêx jok.

Zos mor jak xiar pov njôngr cxaik têk txơưx ntơưv pox niav Poz Ziz hâur cêr uô nox muôx xiv mak graix tsuôr krưr blôngx cxiaz ho haik txos kror txơưx siz tor cxuô zav chia cov kaz tsư ha txơưr hlo. Têx zav uô tơưv zos graix buô, jâuz njuôz, đok, kix, cuô txoz, shaz txoz, hưx txoz… Muôz graix tsuôr mok, shơưk jâuz njuôz thiaz txux lov, mav krưr blôngx tsơưz, chuôv pak shôngz cxiaz ndais. Uô zôngx ziv, taz sik cxênhx blôngx tsơưz thiaz hluôr tơưk cxiaz tưz uô trâu graix kaz tsư ha ntơưv pluôk nox.

Pos Hoàng Thị Mai, uô jâuz mor Tsêr huv Phố núi, phường Chiềng Cơi, thav pâuz: Graix tsuôr krưr blôngx tsơưz cxiaz mak muôs muôx ntâu tus nênhs zuôr ntơưv tsêr huv. Tus kruô tưs cux hu graix tsuôr cxiaz Poz Ziz lok nox, khênhr nox đros mor blâuv chuz lok sik kaz ndâux. Nhiv no muôs li 120.000-150.000 đaiv nhiax/poz.

Zos mor jak xiar, graix tsuôr krưr blôngx cxiaz nhoz sâuv trôngx hno hair nênhs Poz Ziz mak tsuv muôx cuô txoz njưk đros đraiv. Muôx njik njiv kri, tsư ha txơưr hlo ntơưv têx txux lov, cuô txoz zôngv njưk tas cxuô zav kar nox, txix li hâu, cxiaz lok sik cxuô txir trơưk chaix. Têx zav khênhr uô li njêr, cuô txoz, kix, txux lov, blôngx caz nzưr đros iz cxia jâuz tsư ha, nênhs Poz Ziz uô yênhx oz zav njưk zos kruôr thiaz uô cuô. Tuôr cuô txoz kruôr, cxuô zav uô tâu ciz lok sik chi cov tsư ha, tas ntơư xuôk têk tuôr lok sik jov mok, cov siz shơư têx txux lov chia tsês, khênhr zôngv chia njưk cxuô zav txir nox li trâuv nhux, txir nkhơưz kaz jiz, lok sik uô zav njưk cxuô kar nox. Hok cuô njưk ntuz mak uô ntơưv têx zav nhôngk tsiak lok, tuôr cov lưx nzơưk txix taik jêz cov siz shơư tas, yênhx zav kaz, tsư ha ntơưv cxuô zav txux lov, zôngv njưk mor chuz, njêk đêx cxiaz, kaiz hâu, cxuô zav jâuz har jôngr.  

Cê zos kar nox sưv hâur pluôk mor nênhs Poz Ziz, cuô njưk nhiv no tsênhv ho yênhx zav kaz tâu ntâu tus xair zuôr uô huv krưr thâuv iz jâus txos Sơn La. Nhiv no, cuô txoz kruôr tâu ntiv uô ntâu poz, muôs li 30.000 - 60.000  đaiv nhiax/poz 200 phiaz. Hâur ntơư, cuô njưk ntuz tâu uô trơưk cêr sir ntơưv têx kruô lok sik paz max cias ntơưv qơư tiv tsês tsik tâu ntêr hnuz nhôngs.

Tix lâus Trần Văn Nam, kruô nuôv zax nhoz Hải Phòng tuôx, thav pâuz: Cur zênhx hnor ntâu txos cuô txoz txux lov taz sik hnuz no thiax tâu nox. Njưk zav đaz tsi cux fiv huv, yax hlo mak graix cxiaz thiaz mor chuz. Tsư kaz txơưr cxuô zav cuô njư đrav tiax đras li ntơư cur zuôr muk uô huv puz fôngx zưs.

Iz zav kar nox ntơưv nênhs Poz Ziz tsik zos tsư ha txơưr xưz mak tsênhv zos txux chi kria cêr nhiav kruô ntơưv zav nênhs no. Sâuv tsuv mor taz kruô tsênhv chênhz, txix mor chuz jak xiar, graix tsuôr krưr blôngx tsơưz txos cuô txoz njưk puôr lênhx zos têx kar nox muôx cêr saiz hloz ntơưv tus tsưr. Ntơư zos kror kar nox kâuv têz (Tây Bắc) tsik zos chơư tâu têx kruô tsês txix têx kar nox tsư ha, mak tsênhv muôx nux gri txux chi tâu tsưx tsês thiaz kria trâu cxuô fâuv hâur ntâu tiav nênhx.