Cias tov kaz mas ntux nas hiav, têx đồng chí thơưx car huyện tưz muk cxênhz yuôx thax tsav, chox car côngz xưv đơưk têx cêr phiv liv, cxênhz têx zav mas hiav; paz pêx xênhv yaik chuôz zênhx muk trâu qơư nhaz xênhz. 12 lênhx tơưv tsik tâu ntơưv tus đêx sông Mã thax tsav xã Mường Hung, Nà Nghịu, Ban chox car phax tar ntux nas hiav thiaz nriar chơưv tiz nênhs huyện Sông Mã tưz chox car chơưv nênhs. Ban CHQS huyện, Công an huyện gruô hu yax 100 cán bộ, chiến sĩ, dân quân, chuôz zênhx paz têx nênhs tơưv tsik tâu. Tov kaz 2 six hơưv, têx nênhs muôx vax huôv tưz chơưv yênhx côngz 12 lênhx nênhs tơưv tsik tâu muk trâu qơư nhaz xênhz.

Xã Nậm Ty mas hiav saz yax hâur jias ntux lok nas no, muôx 5 luz tsêr mas hiav; 11 tus qox mas đêx yôngz, piav; liax, pak njêk mas đêx yôngz tas. Zơưs Lò Văn Hạch, Chủ tịch UBPX xã, haik pâuz: Xã tưz gruô hu pêx xênhv, dân quân tự vệ paz pêx xênhv yaik chuôz tav. Haik txos têx zis tsêr piav lok sik nziv zuôr poz, xã tưz zok qơư trâu nhoz. Iz chas ntơư, tsênhv gruô hu tiz nênhs, yêz câuk ar huk ar poz ntơưv têx cêr muk trâu xã, jok cov yêz muk lok tâu.

Ntơưv thị trấn Sông Mã, txos hnuz 25/7, đros trâu cêr paz ntơưv têx công an, tuz lênhv, hluôs nênhs, pox niav, phênhv ntâu têx zis nênhs mas đêx nhaz tưz lês tiar hâux lưv thiaz têx cưx đêx tưz tâu huk hur si... Pos Phạm Thị Thanh, tổ dân phố 3, haik pâuz: Tas cik hnuz 24/7, đêx lok hâur tsêr, ntâu chuôz zênhx mas đêx nhaz. Viv tâu têx nênhs nhoz iz ndis, têx công an paz, cur zis nênhs tưz nhaz xênhz; têx chuôz tav cux tâu yaik muk trâu yôngx oz, li ntơư tsik hiav txos đaz tsi.

Zơưs Nguyễn Tiến Hải, Phó Chủ tịch UBPX huyện, haik pâuz: Ban chox car phax tar ntux nas hiav thiaz nriar chơưv tiz nênhs huyện chox car Ban chox car phax tar ntux nas hiav thiaz nriar chơưv tiz nênhs têx xã tror gruô hu cxuô paz pơưs, tus khênhx paz têx zis nênhs mas hiav; kriz jor uô hnuz uô hmo chia sox njôngr, muôx tsưr ziv tir tar thâuv muôx yưv têx hâux lưv tsik jông. Hiak txos têx qox đai, UBPX huyện thiaz têx xã tưz muôx ntâuz ntơưr fuô kria tsik puz hla qox.

Nhiv no, thax tsav huyện têx đêx tưz gris jux juk. Huyện tror chox car đơưk têx cêr phiv liv tov kaz ntux nas muk đhâu, cxênhz têx qơư nziv tox poz chia muôx tsưr ziv mênhx pêv trâu cxuô thax tsav. Đros ntơư, gruô hu cov pêx xênhv chênhr phax, yax hlo zos têx zis nhoz jê đêx, tsas tsêr siaz thâuv ntux lok nas. Fuô kria pêx xênhv tror chos têx liax mas hiav tov kaz đêx gris cov trơưk đraiv chaix.