Ciaz chaix Ntux lax shông 2025 muôx zuôr luôs 3.000 qar huv tuv hâur thax qơư đar yax130.000 m², phaiz uô 5 thax tsav. Ntơư zos hâux lưv huôv tsar nhiax txiax - txux chi hâur têz qơưk, muôx 34 tỉnh, thành thiaz têx bộ ngành, tsêr luôv hâur têz qơưk thiaz oz chas têz siz chos côngv. Jias kriz ciaz chia paz gruô hu tâu têx nênhs zuôr hax huv, chia huôv tsar nhiax txiax tâu yax 8% trâu shông 2025, đros ntơư fuô kria têx txux chi hâur têz qơưk Việt Nam.

Nhoz hâur 3.000 qar huv, qar huv ntơưv tỉnh Sơn La jông zav li đaiv đuôz jông txơưr hlo ntơưv thax tsav Tây Bắc. Qar huv ntơưv Sơn La đar yax 200 m² jông zav li Tà Xùa, chaix txir hồng gis ntơưv Mộc Châu…đros trâu têx hâux lưv txơưr hlo ntơưv thax tsav Kâuv têz hnuz pôngz. Kruô nuôv zax tâu côngv têx cêr uô si ntơưv hair nênhs Poz ziz; tâu côngv tuôr nduôr ntơưv hair nênhs Hmôngz...tâu hâuk cà phê, yuôx zêx thiaz zuôr têx hax huv kôngz, txir nox txơưr hlo ntơưv tỉnh tâu tuv ntơưv têx qar huv.

Pos Lê Thị Hồng Anh, Giám đốc Trung tâm fuô kria hax huv thiaz Nuôv zax tỉnh Sơn La, haik pâuz: Cias thâuv hâu hli 10, Trung tâm tưz saz lax trâu UBPX tỉnh cxiv tsa cêr tuôr xav thiaz siz chos fuô kria trâu têx tsêr luôv, HTX côngv luôs hâux lưv. Ntơư zos jias chia tỉnh Sơn La fuô kria têx hax huv nuôv zax, txux chi txos trâu kruô nuôv zax. Viv li, iz chas thax tsav fuô kria hax huv kôngz, txir nox, pêz tsênhv uô tsêr tsar lơưx, mascot hair nênhs Poz ziz thiaz Hmôngz…chia paz trâu qơư nthuôr txux chi jông jav đuô. Njênhs tiak đhâu jias kriz ciaz no, zuôr muôx nzir ntâu tsêr luôv muôz nhiax chia lês hâux lưv trâu thax tsav tỉnh Sơn La.

Tsi njênhk tâu qơư sơưr zos "thax qơư chos txir ntâu yax" ntơưv saz Kâuv têz, qar huv ntơưv tỉnh Sơn La tưz gruô hu tâu yênhx cxênhz lênhx kruô tuôx ndis shuôk, zuôr têx hax huv, li: Yuôx zêx Shan tuyết lâuk Mộc Châu, jiz mur har jôngr, cà phê thiaz cxuô zav jâuz hur.

Ntơưv qar huv thax tsav tỉnh, tưz tsik zos thax qơư muôs hax huv xưz, mak tsênhv zos têx jax luk thav txos txux chi, cênhz cưv đhâu têx jax video fuô kria. Pir txưr li, yuôx zêx Shan tuyết tâu chos ntơưv xã Chiềng Sơn, tưz tsik zos zav yuôx zêx kaz xưz, mak tsênhv zis jax luk thav txos cưr tix nênhx tsa Hmôngz nhoz trâu Pha Luông. Trơưk ntơư, têx kruô nuôv zax thiaz pêx xênhv têx tỉnh, thành phố côngv jias kriz ciaz cê tâu zuôr têx hax huv, cê tâu mnôngs têx jax luk thav txos têx zav huv tuv hâur thax tsav no.

Txux chi, cênhz cưv tâu lês nto mông đêz đar đhâu têx jias nthuôr txux chi ntơưv qar huv. Cxuô hnuz, txix thâuv 9 six tas cik txos trâu 10 hmo ntux, kruô nuôv zax zuôr tâu saiz têx jax tuôr têk sênhr chêr thiaz ntâuk đruôk lov jêv. Yax hlo, thax qơư no tso chai côngv lês têx hâux lưv tâu kriz hâur jias kriz ciaz. Têx poz tơưz cxuô zav zos muôz shôngz hiaz tưz tsik zos huv zuôr lok sir zôngv xưz, mak tsênhv zos têx jax luk thav txos pêx xênhv cxuô hair nênhs tỉnh Sơn La luz nênhx.

Đros pêz thav luk hâur Jias kriz ciaz, pos Lò Thị Mai, cưk txux hair nênhs Poz zoz nhoz trâu xã Thuận Châu, haik pâuz: Đhâu jias kriz ciaz, pêz xar cov txux chi Sơn La zuôr jê đuô trâu cxuô lênhx, cxuô tus. Đhâu têx jax tuôr têk sênhr chêr, ntâuk đruôk lov jêv ntơưv hair nênhs Poz ziz nhoz trâu Sơn La, cur tus khênhx xar cov têx hax huv nuôv zax txux chi ntơưv tỉnh thiaz xã tâu moz siaz txos. Txix ntơư, zok tâu têx đơn vị nuôv zax cxiv tsa têx tour nuôv zax đhâu xã Thuận Châu, cxơưz paz por hưv tâu jông hair nênhs Poz ziz têx txux chi jông.

Ciaz chaix Ntux lax shông 2025 zos qơư "fuô kria hax huv jông hâur têz qơưk Việt", hâur thax tsav ntơưv Sơn La tưz tsik zos fuô kria têx hax huv txơưr hlo xưz, mak tsênhv paz fuô kria cxuô hair nênhs têx txux chi, kria txos têx tsưr ziv uô nox, uô hâuk. Txix li kror moz siaz côngv têk, tỉnh Sơn La taz tov lês jông hâux lưv "Nênhs Việt sir zôngv hax huv Việt Nam", đros ntơư kriz đar tsưr ziv chia đros oz chas têz siz khov thiaz huôv tsar.