Muk txos ntơưv thax qơư ntux nas hiav, pov tsik zos tus đêx Lax Muôk ntưk tuk zênhk li thâuv ntêx, mak luz six hơưv thâuv huôv mfâu mfưr, đax rur iz tos lok yôngz tas cxuô tsar zav. Thâuv 11 six hmo 31/7 txos 11 six tar su hnuz xiaz 1/8, ntux lok nas hloz ntơưv iz cxia xã hâur thax tsav tỉnh Sơn La thiaz Điện Biên, đêx huôv lox, uô trâu pak điện đêx Mường Luân 1+2 thiaz Sông Mã 3 pur zuôr fưx, thiax tâu tso zênhx max, uô trâu đêx Lax Muôk hax zav huôv lox. Đêx Lax Muôk ntu ntơưv (Trạm Xã Là) njuôk thâuv 3 six hnuz kaix 31/7, pur siaz 27.931 cm; nto 28.495 cm thâuv 4 six hnuz kaix xiaz 1/8, zâu mê njik đêx huôv shông 1975 33 cm. Lar haik mak, đêx huôv lox thâuv 8 six sơưr nzor hnuz xiaz 1/8, tưz nhaz thiaz cuôr, tox poz ntâu kror qơư ntơưv têx xã: Mường Lạn, Púng Bánh, Sông Mã, Chiềng Sơ, Bó Sinh, Mường Lầm, Sốp Cộp, Chiềng Khoong, Mường Hung, Chiềng Khương thiaz Huổi Một.

Trơưk cxênhz tâu, đêx nas tưz cuôr puôk 854 luz tsêr, hâur ntơư 64 ziv pêx xênhv tâu yêv khiar zênhx max; 5 luz tsêr mas đêx cuôr đu lus, đêx nhaz 772 luz tsêr, muôx 12 luz tsêr đêx nas hiav puôk 30%. Pêx xênhv têx chuôz tav pôngz lơưv ntâu thiaz puôk tas, saz yax mak hâur đrôngs xã Sông Mã. Đêx nas tsênhv cuôr tu 1 tus qox khor hla đêx; 3 tus qox đai; puôk 1 tus qox khor; ntâu ntu cêr yêz têz qơưk, cêr tỉnh, cêr muk trâu têx xã, jok cux poz puôk tas. Ndêx điện vâu, xor điện, xor tôngx tu tas, cêr muk tsik thôngz; têx liax blêx, kôngz lông mas đêx cuôr, cxuz tas ntâu, nhiv no taz tov cxênhz..., xav nhiax pôngz nto 365 tỷ.

Pov ntux nas hiav puôk tsuôx ntâu, hnuz xiaz 1/8, UBPX tỉnh Sơn La tưz fuô hâux lưv max chênhr zuôr tsuv lês sai chia phax tar ntux tror lok nas hloz, đêx huôv cuôr, tox poz thiaz ar sâuk ntơưv têx xã tâuk ntus đêx Lax Muôk. Cias thâuv ntux nas huôv nhaz, cuôr cxuô paz tuz lênhv, công an thiaz cxuô paz nênhs hâur tỉnh tưz muk ti gâuk qơư, tỉnh tưz tsa Sở Chox car jor cias ntơưv xã Sông Mã, zos đồng chí Nguyễn Thành Công, Phó Chủ tịch UBPX tỉnh uô Thơưx ban, chox carõcuô paz nênhs siz chos đơưk cêr phiv liv.

Ntơưv jok Anh Trung, xã Mường Hung đêx nhaz tas iz ndis đar, uô trâu 8 tus nênhs tơưv khiar tsik tâu. UBPX tỉnh tưz thor Bộ Quốc phòng cxiz yêz kar tâuz za tuôx paz chơưv tâu têx nênhs haik lok ntơưv jok Anh Trung, xã Mường Hung muk trâu qơư nhaz xênhz. Cux thâuv luz six hơưv ntơư, Phòng Cảnh sát Phax tar tuô hluôr tơưk cuz, chơưv nênhs, yêv chuôz tav, Công an tỉnh tưz gruô hu yêz, chuôz zênhx, yax 30 tus cán bộ, chiến sĩ muk paz ntơưv qơư, zôngv yax 200 thiar hluô, yo ntaz đêx chơưv 6 lênhx nhoz hâur plơưr đêx nhaz ntơưv jok Quyết Thắng, xã Chiềng Khương, por hưv tâu luôx juk nênhs, chuôz zênhx nhaz xênhz; paz 25 ziv pêx xênhv nhoz hâur plơưr đêx lox têx chuôz tav muk trâu jông qơư.

Chox car côngz xưv chơưv nênhs, huôv chuôz tav, paz pêx xênhv đơưk cêr phiv liv ntux nas hiav, Đại tá Nguyễn Khắc Ngọc, Thơưx chox phòng Cảnh sát phax tar, tuô hluôr tơưk thiaz chơưv nênhs, huôv chuôz tav, Công an tỉnh, haik: Phòng tưz gruô hu yax 100 lênhx cán bộ, chiến sĩ paz pêx xênhv têx xã nhoz tâus ntus đêx Lax Muôk đơưk cêr phiv liv ntux nas hiav. Cán bộ, chiến sĩ sir jos njok paz pêx xênhv cov nzor tror uô nênhx truôx njês.

Hmo xiaz 1/8, đồng chí Nguyễn Thành Công, Phó Chủ tịch UBPX tỉnh tưz chox car cơưv zênhx max chia zok mênhx hâux lưv trâu yênhx paz nênhs trâu siaz gruô hu sơưr đơưk côngv chơưv nênhs. Uô ntêx hlo, cxiz nênhs ntơưv cxuô xã nhoz tâus ntus đêx Lax Muôk. Hâur ntơư, ntơưv têx xã đêx nhaz, cxuô đơn vị sâu khâuz nhaz, thoz ar gok, tsưx hưv cêr nyiaz hur, hâur ntơư kho cov txâuk đêx hur trâu pêx xênhv zôngv.

Txix thâuv đêx gris, cxuô txox cêr hâur đrôngs xã Sông Mã ar gok, kiak nênhs njuôr, yênhx puô lênhx cán bộ chiến sĩ, công an, tuz lênhv, têx hluôs nênhs thiaz pêx xênhv tưz siz chos paz yax 400 ziv pêx xênhv nhoz đrôngs xã thiaz yax 350 ziv nênhs uô lax luôv ntơưv ciaz Sông Mã, sâu khâuz nhaz, thoz cưx đêx, nzuôr plơưr cêr cov hur; huk ar, poz jêz ntơưv têx qơư tox poz. Iz chas ntơư, gruô hu máy, yêz thâux đra, yêz chơưv nênhs, câuk ar, sâu khâuz nhaz, tso đêx nzuôr cêr.

Chiến sĩ Hà Anh Tuấn, Trung đoàn 754, Bộ CHQS tỉnh, haik: Cias thâuv lênhk hâux lưv, cxuô lênhx hâur đơn vị tưz zênhx max chox tuz lênhv muk txos kror qơư đêx nhaz. Ntơưv têx qơư pêx xênhv mas ntux hiav, luz nênhx taz tov phiv liv, hax zav uô trâu têx chiến sĩ sir jos âpz cov pêx xênhv nzor tror uô nênhx truôx njês.

Tsênhv nyai coz nas lox yax thâuv ntêx txos nhiv no, niav lâuk Phạm Thúy Vinh, tổ 4, xã Sông Mã, haik: Txơưv zênhx pâuz zuôr sir jos tu cxuô cêr puôk tsuôx, yêv cxuô zav tsês trâu qơư siaz chia por hưv chuôz tav, taz sik tiv đêx huôv sai đhâu, njais tsik zênhx têx hax huv, chuôz zêhx, cxuô zav puôr lênhx mas đêx cuôr cxuz tas. Têx hnuz no, tâu cxuô paz nênhs tuôx paz cur qêz, paz cov pêx xênhv luz nênhx nzor tror truôx njês, uô tsâus ntâu hênhr.

Muk cxênhz yuôx ntơưv qơư, cxiv kho đuô têx zav ntux hiav ntơưv cxuô luz xã, đồng chí Nguyễn Đình Việt, Phó Bí thư Tỉnh ủy, Chủ tịch UBPX tỉnh, Thơưx paz đại biểu Quốc hội tỉnh cxiz cov cxênhz yuôx cxuô zav puôk tsuôx chia bax cxuô zav paz pêx xênhv cov nzor uô nênhx truôx njês. Cxuô paz nênhs tưz tror paz pêx xênhv đơưk cêr phiv liv ntux nas hiav; cxiz nênhs jor đruôz hnuz hmo ntux; zênhx max tu cxuô zav yưv; lês côngz xưv por hưv cêr nyiaz hur, phax tar moz trâu pêx xênhv thax tsav đêx nas hiav...

Tâu tas nro cxuô paz nênhs, cxuô ngành, thôngz cxuô qơư siz chos côngv sir jos, txos nhiv no tưz thoz thôngz cêr yêz, tu tâu vax tsê trâu pêx xênhv ntux nas hiav; kho thôngz têx ndêx, xor điện, tsênhv yuôr kror mê njik, zuôr sir jos cov nzor kho tiar đêx hur trâu pêx xênhv zôngv. Tỉnh Sơn La tưz gruô hu tiz nênhs zôngv máy, chuôz zênhx chia kho cxuô txox cêr yêz. Têx luz jok cêr tsênhv tsik tâu thôngz, tỉnh gruô hu cov cxuô paz nênhs xa têx hax huv zov chênhr yar, kar hno, mỳ tôm, cxur, đêx hur muk cov txos pêx xênhv. Iz chas ntơư, tỉnh tror bax cxuô zav tok iz lưv ntux nas hnuz txix hniz xiaz 4 - 7/8; hâur ntơư, gruô hu cxuô paz nênhs lês hâux lưv trơưk “4 cias ntơưv qơư”, cxiz nênhs jor đruôz hnuz, hmo ntux chia phax tar ntux nas lox.

Ntux nas hiav lok six saz, chia đơưk têx cêr phiv liv ntux hiav, uô ntêx, zuôr tsuv cxơưz paz cov pêx xênhv thax tsav mas ntux nas hiav nzor tror uô nênhx truôx njês. Ntêr muk zuôr tror tâu sơưr đơưk côngv têk viv pêx xênhv luz nênhx thiaz cxưx nhiax kho vax tsê, cêr puôk tsar zav cov jông siz luôs, luôx juk ar nhoz, liax têz uô nox.