Pos Hoàng Thị Ngọc Ngân, Chủ tịch Hội Liên hiệp Pox niav huyện, haik mênhx: Hâur thax tsav huyện muôx 5 hair nênhs Poz Ziz, Hmôngz, Mêx Jênhx, Poz Thơưx thiaz Choz Tsiz nhoz uô cê. Yênhx hair nênhs nhiak muôx nhiak têx txux chi tsik siz thôngx, tsiv nux gri đhâu tsôngk hnar, luk ntơưr, têx hâux lưv, gruôv pax, txox chai… Paz txuôs jông thiaz huôv tsar pêx xênhv cxuô hair nênhs têx txux chi, têx cơ sở hội tưz cxiv tsa têx paz nênhs, câu lạc bộ haik cưr cxiax; txuôs jông, huôv tsar hâux lưv ntok ntâuz; kria fâuv hluôk pâuz têx txux chi cênhz cưv, cxuô cêr uô si zos pêx xênhv tênhx tus.

Txos nhiv no, hâur thax tsav huyện muôx 364 câu lạc bộ thiaz paz haik cưr cxiax jêx jok, zov chênhr zos hội viên pox niav, tsik so nthuôr txux chi, haik cưr cxiax trâu sơưr đơưk tâu saiz hâur têx hnuz nox tsiaz, saiz hloz, lar tsuv ndo hâur têz qơưk, thax tsav, paz txuôs jông, kria cxuô kror qơư pâuz pêx xênhv cxuô hair nênhs têx txux chi jông.

Iz chas ntơư, Hội Pox niav huyện tsênhv moz siaz cxiv tsa thiaz fuô kria têx tsưr ziv huôv tsar nhiax txiax, nuôv zax đros trâu txuôs jông, huôv tsar têx nux gri txux chi cênhz cưv. Siz chos kriz têx jias kria pâuz pêx xênhv cxuô hair nênhs têx txux chi trâu cxuô tus hội viên pox niav. Paz pox niav tâu cơưv uô hâux lưv; txaik pênhr uô nox txix têx hâux lưv iz txưv muôx lok.

Txix shông 2020 txos nhiv no, Hội Pox niav xã Phiêng Cằm tưz cxiv tsa paz nênhs tơưv lâus ntâuz pas hair nênhs Poz Ziz, paz nênhs tơưv lâus, uô pax ntâuz trâu Hmôngz tsôngk hnar thiaz paz pox niav haik cưr cxiax, yuôz trax, ntâuk ndak nhoz têx jok Nôngk Tâuz Poz Ziz, Nôngk Tâuz Hmôngz thiaz Hua Nà. Têx paz nênhs muôx txix 10 - 20 hội viên, tsik tsês txuôs jông, huôv tsar pêx xênhv cxuô hair nênhs têx txux chi li: Tsik so hnar zuk hair nênhs tsôngk hnar hâur yênhx hnuz; txuôs jông hair nênhs Poz Thơưx, Poz Ziz, Hmôngz têx luk haik thiaz txox chai. Đros ntơư, tsênhv zok nriar, khơưs tsês têx jax cưr cxiax, sênhr chêr, têx kênhx, traz, ndak nziv zuôr pôngz plox, kria tsưr ziv tơưv lâus, xơưk zuk hair nênhs têx tsôngk hnar trâu hội viên pox niav thiaz mê nhuôv.

Niav lâuk Nzơưv X Hav, Chi hội trưởng Chi hội pox niav jok Nôngs Tâuz Hmôngz, xã Phiêng Cằm, kria pâuz: Thâuv tsênhv zâu têx nxaik Hmôngz tưz tâu têx niav, pos kria chos ntuôs chia sơưk ntuôs; tơưv lâus taz tiaz, xơưk tiaz, baz yo trâu zuk tus khênhx thiaz tsêr nênhs hnar. Ntos ntâuz, tơưv lâus tưz yênhx txux chi cênhz cưv tâu txuôs jông đhâu ntâu tiav thiaz thâuv tus nxaik ntơư xơưk tâu jông mal zos lênhx nxaik Hmôngz ntơư tưz hloz tiar niav. Têx shông đhâu, pêz tưz đros têx hội viên siz chos cxiv tsa tâu kror qơư tơưv lâus, xơưk Hmôngz têx tsôngk hnar chia muôs trâu têx kruô nuôv zax.

Txos jok Mé, xã Mường Bon, iz chas sơưr tâu tâu mul nur njêk, nox hair nênhs Poz Ziz têx jâuz mor kaz, tsênhv tâu tuôr têk sênhr chêr…ntơưv têx thành viên paz haik cưr cxiax zos pox niav hâur thax tsav cxiv tsa. Niav lâuk Tòng Thị Hồng, thơưx paz haik cưr cxiax jok Mé, thav pâuz: Jok tưz cxiv tsa tâu 2 paz haik cưr cxiax, tsik so cơưv shâuv hâur yênhx hnuz, chia nthuôr trâu têx kruô nuôv zax tâu saiz thiaz paz txuôs jông hair nênhs Poz Ziz hâur thax tsav têx kuz chas txux.

Đros trâu têx hâux lưv uô tâu, Hội Liên hiệp Pox niav huyện Mai Sơn tưz lês jông côngz xưv txuôs jông thiaz huôv tsar yênhx hair nênhs têx txux chi, paz cxơưz pêx xênhv cxuô hair nênhs hâur thax tsav têx txux chi zênhv hnuz zênhv muôx nux gri truôx njês./.