Chi nhánh Thành phố - Mường La zos nhiax por hưv thiaz huôv tsar jôngr Sơn La saiz car tưz đros nov hâu cxuô xã, ban saiz car cxuô jok fuô kria cêr chai trâu pêx xênhv pâuz mênhx zuk hâux lưv por hưv, huôv tsar jôngr thiaz sir zôngv muôx txiax njis têx nhiax por hưv jôngr. Iz chas ntơư, cxênhz yuôx nzir têx har jôngr txâuk chai chia muôz nhiax cok ntơưr njuôk đuô têx har jôngr tâu thêv nhiax hưv jôngr.

4 shông no, Chi nhánh tưz đros qơư zok nhiax Tsêr nhiax Chinhs sách xã hội huyện Mường La thêv nhiax por hưv har jôngr đhâu tài khoản. Shông 2023, tưz thêv tas yax 34 tỷ 100 triệu đaiv nhiax por hưv har jôngr trâu 2.861 tus tsưr jôngr, 62.530 ha jôngr tâu thêv nhiax hưv đhâu tài khoản tsêr nhiax, tsik tas six hơưv, nhiax txiax ntâu, mênhx pêv thiaz nhaz xênhz đuô ro nhiax thiaz zôngx ziv trâu têx tsưr jôngr thâuv tâu thêv nhiax por hưv har jôngr.

Zơưs Tòng Văn Dần, Thơưx chox Chi nhánh, haik: Mường La muôx jôngr nhoz iz ndis pak đêx Đà muôx ntâu tsêr máy điện đêx, tâu thêv nhiax por hưv ntâu. Chi nhánh tưz cơưv ntâu jias chia fuô kria pêx xênhv nhoz têx thax tsav muôx jôngr cov pâuz saiz car thiaz sir zôngv têx nhiax por hưv har jôngr trơưk chai. Txix li pênhr nhiax no, têx jêx jok tưz uô tâu ntâu zav paz cxơưz pêx xênhv luz nênhx, li: Uô cêr yêz, tsêr txux chi jok, tok đêx hur sir zôngv, yar tiax thể thao...

Xã Chiềng Ân taz tov saiz car, por hưv zuôr luôs 4.494 ha har jôngr, fênhx đraz yênhx shông, Chiềng Ân tâu thêv yax 4 tỷ đaiv nhiax por hưv har jôngr. Cấp ủy, nov hâu xã tưz chox car ban saiz car cxuô jok bax cxuô tsưr ziv zôngv nhiax thiaz tâu xã cir, chos luk sir zôngv mênhx pêv têx nhiax.

Zơưs Tủa Xênhv Shôngx, Chủ tịch UBPX xã, haik pâuz: Phênhv ntâu têx nhiax zôngv uô têx cêr bê tông, tok đêx hur, uô cưx lias, kho tsêr txux chi thiaz lês jông côngz xưv saiz car, por hưv, huôv tsar har jôngr. Txix li nhiax por hưv har jôngr tưz paz pêx xênhv muôx nhiax sir zôngv, hâur têx xuz har jôngr xênhz txơưv, pêx xênhv tưz chos 50 ha hơưk, txix ntơư paz pêx xênhv sâu tâu nju nhiax txiax, muôx têx ziv sâu tâu yênhx puô triệu nhiax/shông.

Jok Cát Lình, xã Chiềng Muôn, muôx yax 1.000 ha har jôngr, iz shông tâu muôz txix 600-800 triệu nhiax por hưv jôngr. Chia saiz car, sir zôngv têx nhiax por hưv jôngr thiaz lês trơưk txox chai “pêx xênhv pâuz, pêx xênhv saz lax, pêx xênhv lês, pêx xênhv cxênhz yuôx, pêx xênhv saiz car thiaz pêx xênhv sir zôngv”, jok Cát Lình tưz hu pêx xênhv côngv saz lax cxiv tsa cêr chai saiz car, sir zôngv têx har jôngr, saz lax thôngz cxuô zav nhiax muôz lês hâux lưv cxênhz yuôx por hưv har jôngr, kho cêr, puô tsar zav paz cxơưz pêx xênhv luz nênhx, tưz tâu px zênhv. Shông 2022, jok tưz muôz 34% nhiax por hưv jôngr uô tâu 1 caik cêr bê tông jok thiaz lênhv plas tsêr trâu 14 ziv pêx xênhv.

Zơưs Ký Xênhv Hav, Bí thư Chi bộ, Hâu jok Cát Lình, haik: Txix li tâu têx nhiax por hưv har jôngr, ntâu shông lok no, pêx xênhv hâur jok tưz tsik chia hluôr tơưk cuz har jôngr, cux tsik muôx nênhs luôx har jôngr, têx jôngr nzôngr tox trôngz tưz tsar ntâu đuô. Yênhx shông, jok Cát Lình tưz cxiv kho nzir chai saiz car, sir zôngv têx nhiax cov fiv huv jok.

Pov tiak, cêr chai muôz nhiax por hưv har jôngr ntơưv Mường La tưz paz pêx xênhv muôx nhiax txiax cxơưz cxiv luz nênhx, cuz siaz por hưv har jôngr, txo tsơưs têx txuz plâuz zuôv chai por hưv, huôv tsar har jôngr, cxuô luz jôngr tâu por hưv, saiz car jông, njuôz xiaz.