Đros cán bộ xã Lóng Sập muk cxênhz yuôx hâux lưv cxiv kho tsêr đos đis, xâu nas, pêz tưz pov tâu têx ziv pluôs cêr shir phaz viv yuôr tsik ntêr sâuv no zuôr tâu nhoz hâur luz tsêr jông truôx khor. Tix lâus Hoàng Văn Nam, jok A Má 1, xã Lóng Sập, shir phaz thav: Tiv coz chuô hloz số 10 ruôr hiav, ar poz cxuz tưz uô piav cur ziv nênhs luz tsêr. Cấp ủy, nov hâu xã tưz zênhx max muk shuôk, paz nhiax thiaz gruô hu pêx xênhv hâur jok côngv hnuz jos cxiv puôz luz tsêr yiaz truôx khor đuô, paz cur ziv nênhs tso siaz uô nênhx, huôv tsar kôngz lông.

Đros trâu njiaz luk “tsik chia lênhx tưs pôngz kaz”, xã Lóng Sập tưz cxênhz yuôx têx ziv nênhs mas coz chuô hloz ruôr hiav, tsêr đos đis, xâu nas hâur thax tsav chia cxiv tsa tsưr ziv paz. Zơưs Trần Xuân Thành, Chủ tịch UBPX xã Lóng Sập, haik tiak: Hâur shông 2025, đros têx nhiax Têz qơưk paz, xã tưz gruô hu têx tổ chức xã hội, đoàn thể thiaz pêx xênhv côngv hnuz jos, chuôz zênhx uô vax tsêr cias ntơưv qơư...paz 14 ziv pluôs cxiv kho, uô yiaz tsêr nhoz. Têx luz tsêr truôx khor tâu cxiv puôz tưz cxaz nzir đas jos trâu têx ziv nênhs txov nhêv lok sâuv tsêr nhoz tso siaz huôv tsar kôngz lông, cxiv tsa luz nênhx tâu jông, cxuz cêr yaiz pluôs truôx njês.

Đros ntơư, xã tsênhv tsik tsês đros têx đơn vị chuyên môn kria pâuz tsưr ziv uô nox yiaz, paz nôngz kôngz chos, nôngz tsiax cxu zus, chuôz zênhx uô liax têz đhâu têx hâux lưv, dự án paz huôv tsar kôngz lông jêx jok, cxơưz ziv pluôs, jê cêr pluôs, nhiv kruôr hla đhâu cêr pluôs zos hair nênhs tsơưs muôx hâux lưv, sâu nzir nhiax zôngv. Shông 2025, xã tưz fuô lês yênhx công ntâu tsưr ziv huôv tsar kôngz lông muôx kaz hâu, li chos txir lê ntơưv jok Phiêng Cài thiaz ntông mắc ca ntơưv jok A Má. Iz chas ntơư, trôngz yuôx zêx ntơưv têx jok Mường Bó, A Má 1, A Má 2 cux tâu txuôs jông thiaz kria pâuz tsưr ziv chos hur. Txos nhiv no, hur si xã muôx yax 920 ha ntông nox txir; 178 ha yuôx zêx; tu zus tsiax cxu huôv vav đros trâu muôx yax 11.000 tus tsiax cxu thiaz 68.000 tus kaiz ok. Cêr muk lok, vax tsêr tâu moz siaz cxưx nhiax cxiv puôz, pêx xênhv luz nênhx zênhv hnuz zênhv hlôngr yiaz.

Tix lâus Thox Xênhv Vax, jok Phiêng Cài, nênhs tâu paz fuô lês tsưr ziv chos ntông txir lê, thav kria: Đrav ntêx, cur ziv nênhs tsuôk zos chos poz cưk, khưr txov nhêv njuôr mak gri nhiax ho tsênhv tsik truôx njês. Tâu xã tso muk shuôk, cơưv shâuv tsưr ziv ntơưv xã Chiềng Sơn thiaz paz tsưr ziv chos ntông txir lê, shông 2025, cur tưz muôx pênhr xưv hlôngr chos ntông txir lê trâu zuôr luôs 1 ha têz, ntông txir hloz jông, xuz thơưx pov tâu lok six fiv huv đêx ar huôz chuô thax tsav. Tsik tas li, cur tsênhv cơưv shâuv têx lớp kria pâuz tsưr ziv huôv tsar nuôv zax jêx jok zos xã kriz chia tov kaz no tok kruô nuôv zax tuôx ndis shuôk, đê txir lê cias hâur vax.

Iz chas paz tsưr ziv chos, xã tsênhv paz pêx xênhv tâu txaik têx nhiax pênhr thêv tsav liv tsơưs uô nox uô hâuk; đros Tsêr nhiax Chính sách xã hội, têx paz nênhs tuôr nhiax muôz nhiax trâu ziv pluôs, jê cêr pluôs txaik huôv tsar thiaz kriz đar têx tsưr ziv huôv tsar kôngz lông muôz kaz hâu. Txos nhiv no, hur si xã muôx yax 400 ziv nênhs tâu Tsêr nhiax Chính sách xã hội muôz txaik yax 61 tỷ nhiax. Txix nhiax txaik, ntâu ziv nênhs hâur thax tsav tưz hla đhâu cêr pluôs, cxiv tsa luz nênhx truôx njês, paz grêk tsơưs têx ziv pluôs hâur xã tsuôk zos yuôr 12,02%; xã tưz uô tiar 11/19 tiêu chí jêx jok yiaz.

Saz lax lok sâuv tsov xav por hưv pêx xênhv luz nênhx tâu jông trâu ntu zuôr txos, zơưs Trần Xuân Thành, Chủ tịch UBPX xã Lóng Sập, thav kria: Shông 2026, xã sir jos xav fênhx đraz iz toz hâu nênhs sâu tâu 28 triệu nhiax/shông thiaz grêk tsơưs têx ziv pluôs tsuôk zos yuôr 10%. Xã tror moz siaz fuô lês têx tsưr ziv zov chênhr li cxơưz kror muôx Trôngx lôngs ntiax têz Lóng Sập chia huôv tsar cêr lax luôv thiaz nuôv zax; paz nhiax pênhr lês uô ntêx hâux lưv kriz cêr muk lok jêx jok thiaz uô kror đêx hur sir zôngv.

Tâu kror jông siaz côngv đros uô ntơưv nov hâu thiaz pêx xênhv, njênhs njôngr tiak Lóng Sập zuôr nzor uô tiar têx tiêu chí jêx jok yiaz, por hưv pêx xênhv cxuô hair nênhs thax tsav luz nênhx zênhv hnuz zênhv nox tsâu hnar sor, uô nênhx shir phaz; côngz xưv tsưx truôx têx jok đriv têz nox nhoz njias to tror tâu txuôs jông, chia Lóng Sập zênhx zos “kror qơư” por hưv Têz qơưk nox nhoz njias to, tsik tsês huôv tsar.