Đhâu ntâu hnuz ntux lok nas lox tsik tu, thâuv sơưr nzor hnuz xiaz 9/7, tix lâus Lò Văn Quân, nhoz tiểu khu Chiềng Bằng, xã Quỳnh Nhai luz tsêr tox tưz poz yênhx châuv cxênhz khối ar, poz jêz pêv trôngz lok cxuz tas nro.

Njia têx xuz nja tsêr nhiv kruôr puôz yiaz khir, tơưs jov jơưk shơư ar, poz jêz, tix lâus Lò Văn Quân nyâuk nyo, haik tiak: Luz tsêr no, nhiv kruôr uô tâu yax 3 shông xưz, nhiv no tưz tsik tâu thêv nux gri tas. Thâuv tox poz, oz niav txir puôr lênhx tsik nhoz tsêr, tsuôk yuôr tus tuz muôx 14 shông nhoz tsêr xưz, hmôngr cux jông khiar zênhx. Cias thâuv sơưr nzor hnuz ntơư, têx tuz lênhv thiaz pêx xênhv hâur jok tưz yuôx paz đơưk cêr phiv liv, yêv iz cxia chuôz tav muk trâu qơư nhaz xênhz. Nhiv no, taz tov muk đros cxênhz jê nhoz. Chia siaz nov hâu zuôr nzor muôx chai paz cov tror uô nênhx truôx njês.

Hok ntơưv jok Chiềng Lề, xã Mường Giôn, coz nas hnuz xiaz 9/7 tưz hiav 10 luz tsêr poz. Hâur ntơư, pos Lò Thị Păn luz tsêr tsar lơưx, tưz poz yax yênhx châuv khối ar, poz jêz poz pêv trôngz ntưk lok cxuz lor 2 tus ndêx, tsik pâuz zuôr vâu thâuv tưs. Pos Lò Thị Păn, haik: Thâuv 5 six sơưr nzor, tsênhv pư, hnor ar thiaz poz jêz ntos đis đơưs pêv kâuv tsêr, thiax hu chor mê nhuôv sơưr tơưv khiar. Uô kaz ntơư, têx nênhs muôx vax huôv tưz tuôx paz yêv đra muk trâu ntơưv tsêr txux chi jok. Thâuv tưs ntux tu nas mav li lok thoz thiaz kho đuô tsêr nhoz

Xav tas hnuz xiaz 10/7, pêz luz xã: Quỳnh Nhai, Mường Giôn, Mường Sại tưz muôx 43 ziv pêx xênhv ntux nas hiav tsêr puôk tsuôx ntơưv 15 luz jok, hâur ntơư muôx 2 luz tsêr tox poz cxuz tas nro; đêx cuôr ar cxuz thiaz nhaz tas yax 10 ha blêx liax, poz cưk thiaz pak njêk. Xav tas nro pôngz lơưv yax 2 tỷ nhiax. Uô kaz cias  thâuv ntux nas hiav, nov hâu cxuô qơư tưz muk cxênhz yuôx, chox car lês hâux lưv đơưk cêr phiv liv ntux hiav, gruô hu tas nro cxuô paz công an, tuz lênhv thiaz têx nênhs ntơưv qơư zênhx max paz pêx xênhv yênhv đra muk nhoz trâu qơư nhaz xênhz, cov nzor tror uô nênhx truôx njês.

Zơưs Nguyễn Ngọc Tú, Chủ tịch UBPX xã Quỳnh Nhai, haik mak: Trơưk “4 cias ntơưv qơư”, Ban chỉ huy Phax tar têx zav tsik jông xã tưz txiz têx paz nênhs uô côngz xưv muk cxênhz yuôx cias ntơưv cxuô qơư, chia njuôk tsov cov mênhx têx zav puôk tsuôx. Hok ntơưv tiểu khu Chiềng Bằng muôx 5 ziv pêx xênhv ntux hiav tsêr puôk tsuôx, xã tưz gruô hu cxuô paz nênhs muk paz pêx xênhv yêv đra, nriar qơư trâu pêx xênhv nhoz cov nhaz xênhz uô ntêx no. Chox car cxuô luz jok cov chênhr phax cxênhz yuôx tas nro têx thax tsav nziv zuôr poz, cxiz nênhs jor đruôz hnuz hmo ntux, bax nênhs, chuôz zênhx chia đơưk cêr phiv liv ntux nas hiav.

Lês cxuô zav paz pêx xênhv cov tror kho đuô têx liax têz uô kôngz lông. Cxuô qơư tưz gruô hu cxuô paz nênhs, đoàn thể cov muk paz pêx xênhv tror chos đuô têx liax blêx đêx cuôr cov huv chaix. Iz chas ntơư, UBPX cxuô luz xã cux chox car Trạm Y tế bax txâuk yuôx phax tar moz, đros cxuô paz nênhs lês côngz xưv tu cêr nyiaz hur, kria pêx xênhv nhoz thax tsav ntux nas hiav cov tsưx hưv cêr nyiaz hur, tsuôs yuôx trâu têx hâur đêx, phax tar tsik tsênhr cik tâu moz.

Tiv ntux lok nas lox, ntêr uô trâu tox poz, puôk tas 18 ntu txox cêr yêz têz qơưk 279 thiaz cêr tỉnh 107 hâur thax tsav xã Quỳnh Nhai, Mường Giôn. Chia cov cêr muk tâu thôngz plơưk, cxuô qơư tưz đros đơn vị saiz car cêr yêz, cxiz nênhs, chuôz zênhx zênhx max thoz ar, huk cêr cov thôngz sai yax; txiz công an jor trơưr kria cêr trâu têx yêz muk đhâu têx thax tsav tox poz cov nhaz xênhz.

Hâur ntu ntux tsênhv lok nas tsik tu nhiv no, cxuô qơư tror cxiz nênhs jor đruôz hnuz hmo ntux, sox trơưr ntux nas, chênhr phax lês cxuô faz tsưr ziv phax tar ntux nas, gruô hu cxuô paz nênhs đros đơưk têx cêr phiv liv ntux hiav, paz pêx xênhv cov nzor uô nênhx truôx njês tror uô đuô kôngz lông./.