Yar ntux chi ntuôk hnuz kaix Yên Sơn uô yar đax lik têx tox trôngz đriv têz trôngz siaz kil, Yar cơưv Phổ thông nội trú Tiểu học thiaz THCS Yên Sơn nhoz khaz sênhz lus, pênhr phênhv. Uô ntêx hnuz zuôr kriz zôngv, cưr Vì Thị Châu, tuz cơưv lớp 9A3 đros têx tuz cơưv ntơưv yar cơưv tuôx shuôk yar cơưv yiaz, mnôngs fuô kria chai thiaz cơưv shâuv cxiax cxênhv cưr cxiax hơưv tok. Txix têx qar tsêr cơưv yiaz khir tsư yuôx jak txos thax qơư nhoz nội trú khaz sênhz, cxix muôx cxuô zav, tưz paz têx tuz cơưv kaz siaz tok nrư txos hnuz kriz cơưv.Cưr Châu thav tiak: Cur vax tsê nhoz jok Chiềng On, đrav ntêx pêz puôr sơưr nzor tuôx tơư muk cơưv ntơưr hâur yar cơưv. Iz luz chaix ntux nas huôv, lok sik nyai. Shông cơưv no tuôx txos yar cơưv yiaz, muôx qơư nội trú khaz sênhz, qar cơưv jông, pêz lok sik jông siaz thiaz shênhr zuôr trâu siaz cơưv cov txơưx.

Hok cưr Vì Văn Chiến, tiz nênhs Maz nhoz jok Nà Cài, mak xav hnuz kriz cơưv shông yiaz zuôr txos zuôr jông yax hlo. Viv txox cêr muk yar cơưv tsik chor nhov, hlôngr trâu ntơư zos iz luz yar cơưv ntơưr, muôx cxix cxuô, nhaz xênhz. Cưr Vì Văn Chiến haik: Cur nhiav yax mak cơưv ntơưv qar cơưv STEM, viv ntơư muôx ntâu chuôz zênhx jông fiv, pêz zuôr tâu lês siv, uô siv thiaz txơưx xav tơưv. Đuô li tsênhv muôx tsêr ntâu tsar zav thiaz pak đêx uô luôv, cur tok nrư tâu lês ntâu zav nuv thể thao, cov đas jos, đros têx fôngx zưs zok nriar, cơưv shâuv thiaz muôx nzir ntâu cêr ndis siv trâu shông cơưv yiaz.Dự án Yar cơưv Phổ thông nội trú liên cấp Tiểu học - THCS Yên Sơn piz puôz thâuv luz 11/2025 trâu thax qơư đar 5 ha, xav nhiax cxiv tsa yax 265 tiv nhiax, muôx 30 lớp, muôx tsêr cơưv, tsêr bộ môn, thax qơư nội trú, tsêr nox mor, pak đêx uô luôv, yar tiax uô thể thao thiaz ntâu zav paz nzir, muôx qơư cơưv ntơưr, nox nhoz, cơưv txux trâu yax 1.000 tus tuz cơưv đriv têz. Đros cêr xav “Yar ntux, lok nas uô cov zênhx”, chok nxiak hnuz nhôngs uô tiar, hâur 9 luz hli đhâu, têx đơn vị nênhs ntiar tưz gruô hu tas nênhs, phaiz têx paz nênhs, sir jos hla đhâu cêr chor nhov ntux yar, ntux nas, uô luôx juk hmo ntux chia chok nxiak huv hnuz nhôngs trâu yênhx zav, truôx siaz uô tiar yar cơưv uô ntêx zuôr kriz trâu shông cơưv yiaz. Ntơưv no zos yar cơưv uô tiar nzor yax hâur 13 dự án yar cơưv nội trú đriv têz ntơưv tỉnh.

Tix lâus Vũ Đình Thắng, Công ty TNHH Cxiv puôz Ngọc Quyết, thơưx chox cxiv puôz yar cơưv, thav pâuz: Muôx kror ndo njôngr ntơưv nov hâu thax tsav paz yêv qơư đo li ntơư dự án uô tâu zôngx ziv. Muôx têx ntu, đơn vị cxiz yax 500 công nhân uô tsik tu, uô siz hlôngr njo cov tâu li cêr tuôr xav tso tơưv. Thâuv cxiv puôz, pêz zênhx saiz hloz cxênhz yuôx kror truôx khor yênhx zav, chok nxiak yar cơưv uô tâu li tuôr xav, nhaz xênhz thiaz tâu li cêr khov tsưr ziv jông yax. Tok nrư trâu shông cơưv yiaz, UBPX xã Yên Sơn tưz tso tơưv đề án tsa tơưv Yar cơưv Phổ thông nội trú Tiểu học thiaz THCS Yên Sơn, cxênhz cêr chox lês nuv, kho đuô, tuôr xav têx cán bộ saiz car, cưk kria, nhân viên tâuk nênhs, fiv huv cêr xav bộ môn, chok nxiak txơưx, zos chai thiaz lês tâu tsik tu, muôx liv thâuv yar cơưv uô tiar, zok choz.

Cưk kria Trần Văn Lâm, Hiệu trưởng Yar cơưv Phổ thông nội trú Tiểu học thiaz THCS Yên Sơn, haik tiak: Shông cơưv 2026-2027, yar cơưv zuôr muôx 1.050 tus tuz cơưv, hâur ntơư, cấp tiểu học muôx 12 lớp, 420 tus tuz cơưv, cấp THCS 18 lớp, 630 tus tuz cơưv; 1.036 tus tuz cơưv nội trú; 66 cán bộ saiz car, cưk kria, nhân viên. Chia bax cxuô zav tok tuz cơưv trâu shông cơưv yiaz, Ban Giám hiệu yar cơưv tưz cxiz tsa thiaz uô tiar têx chai kria thiaz cơưv ntơưr, nox nhoz, cơưv txux ntơưv qơư nội trú, tsêr nox mor thiaz qơư uô nuv têz qơư; đros ntơư, hu niav txir tuz cơưv tuôx cơưv, fuô, kria cxix cxuô têx cêr chai, nhiax txiax thiaz nhiax nox trâu tuz cơưvthâuv cơưv ntơưr, nox nhoz ntơưv yar cơưv.

Yar cơưv Phổ thông nội trú Tiểu học thiaz THCS Yên Sơn tưz kriz zôngv trâu hnuz 22/8, kriz tâu iz faz yiaz trâu xưv cxênhx choz kria ntơưr trâu tox siaz đriv têz. Ntơưv yar cơưv Đảng xar, huv pêx xênhv siaz, têx fâuv tuz cơưv đriv têz ntơưv no zuôr tâu cơưv nzir txux chi, cơưv shâuv pênhr xưv, chia tov kaz yênhx têx nênhs paz đas jos cxiv tsa thiaz por hưv jêx jok.