Shông 2025, Thax qơư nuôv zax têz qơư Mộc Châu tror tâu Kriz muôx Zênhx puz nuôv zax Ntiax têz (World Travel Awards - WTA) jâus tiv 3 tâu côngz zos “ Qơư tuôx saiz tox trôngz thax tsav jông uô thơưx hlo ntiax têz ” thiaz 4 shông siz txuôk jưk tâu côngk nhav “ Qơư tuôx ndis tox trôngz thax tsav jông uô thơưx hlo châu Á”. Têx nuv gas siaz no, tênhv trơưr paz têx kruô tuôx nuôv zax thax tsav no têx “ uô tâu yax ” yiaz hâur cêr chơư kruô nuôv zax thiaz yâu mông tias txos trôngx têz Mộc Châu chia trâu kruô nuôv zax hâur zuk thiaz luôs têz qơư pâuz. Têx thax qơư, kror qơư nuôv zax ntơưv no tsik so hlôngr yiaz, kho jông têx huv, cxuô zav, jông nzir cêr ndis chia trâus siaz nhiav ntơưv têx kruô, muôx cêr siz tưr thiaz tok txos huôv tsar truôx njês.

Zos qơư nto mông ntơưv Thax qơư nuôv zax têz qơư Mộc Châu, Mộc Châu Island muôx cxuô zav ndis saiz, lês siv, so txuôs jos, uô si lov jêv, kriz têx cxênhx xưv tưz muôx cêr bax nzơưk. Tix lâus Hoàng Mạnh Duy, Phó Giám đốc chox lês Thax qơư nuôv zax Mộc Châu Island, kria pâuz: Jâus so hnuz tsiv gri zuôr txos no, pêz tưz muôx têx nuv jông yiaz, li cxiax cxênhv Workshop chia ndis saiz siv gas siaz, uô tưx handmade, cok mov blôngx, uô câuk đai zuôv six... muôx têx hâux lưv đros trâu kruô nuôv zax, paz nuôv zax pâuz thiaz to tâuz toz đuô txos tiz nênhs, trôngx têz Mộc Châu. Têx zav pêz xav txos, kruô nuôv zax tuôx txos Mộc Châu Island  zuôr zos cêr gas siaz, muôx ntâu cêr sir ndis txâuk siaz, muôx txiax njis, fiv huv cêr khov ntơưv têx kruô niax shông tsik siz thôngx.

Ntơưv thax tsav đêx tênhs Quỳnh Nhai, Mường Chiên, Mường Giôn lok sik tox siaz Ngọc Chiến, Tà Xùa, têx thax, qơư nuôv zax, qơư nhoz so đhâu hnuz hmo cux taz tov sir jos bax tok kruô jâus so hnuz tsiv gri. Zơưs Nguyễn Thăng Phúc, tsưr qơư Mùa Homestay Tà Xùa, thav: Pêz muôx 16 qar tsêr so txâuk 40 tus kruô/pưs. Njuôk li cxuô shông, têx kruô tênhv qar tsêr uô ntêx tsơưs mê njik taz sik pêz cux ndo njôngr têx faz bax jông qơư, qar tsêr so, kar nox nhaz xênhz chia paz max têx kruô nuôv zax jông yax hâur jâus so hnuz tsiv gri no.

Nhiv no, hur si tỉnh muôx 644 luz qơư so nuôv zax, hâur ntơư, 29 luz tsêr kruô,  resort tưz xair sơưr hov txix 1-5 hnuz kuz. Muôx 15 thax, qơư nuôv zax tưz tâu côngk nhav, li: 1 thax tsav nuôv zax têz qơư, 1 thax tsav nuôv zax cấp tỉnh thiaz 13 kror qơư nuôv zax cấp tỉnh. Ntâu qơư tuôx ndis tâu cxiv tsa cxix cxuô, vax tsê jông, đros têx zav gas siaz, jông fiv, muôx chôngz kruô nuôv zax, li: Qox tsov iar Bạch Long, Ciaz hmo ntux- phố muk tơư Mộc Châu, đêx tsơưk tsas Dải Yếm, Thax tsav nuôv zax so txuôs jos thiaz uô si lov jêv jông jôngr chiaz jok Áng... ntơưv Thax tsav nuôv zax têz qơư Mộc Châu; Thax qơư nuôv zax Pá Uôn Ecolake, thax đêx tênhs Bình Yên, Por trôngz Plơưr, Quỳnh Long Riverland ntơưv xã Quỳnh Nhai; huôz pư har jông saiz Tà Xùa,“ trôngx têz đaz nênhs đrav ntêx” Ngọc Chiến...

Jâus so hnuz tsiv gri cux zos ntu lax trôngz Mộc Châu hla trâu chaix txir nkhơưz kaz jiz siar thiaz zos ntu saiz huôz pư har jông ntơưv Tà Xùa, huôz chuô lax txiak, ntux nas tsơưs, muk luk zôngx ziv zos jâus chia têx kruô nuôv zax tuôx txos trâu  Sơn La. 

Pos Lê Thị Hồng Anh, Phó Giám đốc Sở Txux chi, Thể thao thiaz Nuôv zax, thav pâuz: Luz đraz hli 4/2026, Sở tưz muôx ntơưr gruôv trâu têx ban, ngành, thax tsav lok sâuv bax têx  zav paz max kruô nuôv zax jâus txi huôz taik Hùng Vương, 30/4-1/5 thiaz chaix nuôv zax ntux sor 2026. Hâur ntơư, tsênhv chênhz zos côngv yôngv siaz txiax njis côngz xưv saiz car Têz qơư txos nuôv zax, tsik tsês kria, fuô txos têx tsêr luôv lês jông têx zav vax tsê, chuôz zênhx thiaz tiz nênhs, fiv huv cêr khov vav ntơưv têx kruô nuôv zax; lês ntov nuv lo ntơưr kria thiaz muôs zos gri, tsik zuôv zuôr, tsik ndê gri, nzaz nzơưv ntu chôngz nênhs chia yôngv gri nhiax; muôx huv, cxuô  zav chok nxiak jông; yôngv siaz cêr to tâuz, phênhv shuôv hâur côngz  xưv por  hưv qơư nhoz nyiaz hur, chok nxiak kar nox hur, njias to tưx zưv... paz txos têx kruô nuôv zax muôx cêr gas siaz jông txos nuôv zax Sơn La.

Txix li bax cxix cxuô đros siaz nhiav ntơưv têx tsêr luôv, đros cêr chox car ntov nti ntơưv nov hâu thax tsav, Sơn La tsik zos kriz trôngx lus tok kruô nuôv zax xưz tsênhv kriz tâu qơư nthuôr txux chi txâuk siaz. Tsư ha nzias têx txir nkhơưz kaz jiz siar trâu lax trôngz thiaz huôz pư har zux zênhk têx ntar har, kruô nuôv zax zuôr zok pov iz trôngx têz Sơn La cê ndơưs sưv, cê txơưx nuv. Jâus so hnuz tsiv gri no, txưv car tuôx trâu trôngx têz Kâuv Têz hnuz pôngz chia muôx cêr jông txâuk siaz trâu têx nênhs tuôx ndis têx cêr ndo njôngr jông tsik plox txos iz kro qơư tuôx nhaz xênhz, gas siaz thiaz muôx ntâu cêr xav jông txux trâu tiz nênhs./.