Txơưv txox cêr yêz txix đrôngs xã tâu luôv trox ntôngk, taz sik tưz ntâu shông lơưv, ntux nas cuôr puôk tas ntâu, poz jêz uô cơưz uô cav tsik zôngx ziv muk thiaz lok. Tas yax 1 six hơưv thiax mul txos đrôngs xã.

Piar mênhx têx cêr txov nhêv ntơưv xã, đồng chí Trưs Xênhv Thox, Phó Chủ tịch UBPX xã, haik tiak: Suối Tọ muôx 11 luz jok, 1.056 ziv pêx xênhv, 100% zos Hmôngz. Zos xã tox siaz, tsênhv txov nhêv nhiax txiax - xã hội tsênhv tsik tâu huôv tsar, tỷ tsôngv ziv pluôs chôngz. Phênhv ntâu zos tox trôngz hâur pêk siaz, uô nox uô hâuk iz kro mê njik tsik tâu zôngv khoa học kỹ thuật paz max, nhiax txiax sâu tsik tâu nju. Iz phênhv pêx xênhv tsik tâu muôx chuôz car hlôngr tsưr ziv uô nox, tsênhv tok têz qơưk paz, li ntơư tsênhv tơưv tsik đhâu cêr pluôs truôx njês. Tsik muôx cêr yêz, cux tsik muôx đêx hur txâuk zôngv, têx tsêr cơưv ntơưr tsik tâu txâuk thiaz kux puôk tas…

Côngz xưv txo cêr pluôs zos phênhv shuôv lok six tsênhv chênhz zuôr tâu lês uô ntêx hlo, xã tưz trâu siaz fuô kria chai trâu pêx xênhv cov thôngz cêr chai txo cêr pluôs; cxiz nênhs lês côngz xưv, zok hâux lưv trâu têx đảng viên paz têx ziv pluôs. Iz chas ntơư, cxênhz ntov nti iz ziv jux juk, saiz tiv li chak pluôs cov pov kaz saz lax chia paz thiax fiv huv; zôngv siz luôs jok ntâu zav pênhr nhiax, paz cov pêx xênhv muôx hâux lưv uô. Xã chox car cxuô hội, đoàn thể têx paz nênhs txaik nhiax uô ntơưr paz pêx xênhv txaik pênhr tsav liv tsơưs chia uô nox uô hâuk, tơưv cov đhâu cêr pluôs truôx njês...

Muôx 1.207 ha têz uô kôngz lông, xã kria pêx xênhv huôv tsar têx kôngz, tsiax fiv huv đêx ar; muôz têx nôngz kôngz yiaz, sâu nju lok chos. Zok hâux lưv trâu cán bộ, công chức muk paz pêx xênhv huôv tsar nhiax txiax thiaz gruô hu têx pêx xênhv siz khov uô nox.

Nhoz siaz yax 1.000 thiar njuôk li blaiv đêx hiar txưr, ntux lax thơưv niax thơưv shông, ar nông, têx shông đhâu, pêx xênhv jok Suối Khang huôv tsar yax 1.000 tsoz yuôx zêx shan tuyết, hâur ntơư yax 600 tsoz yuôx zêx lâuk. Thâuv ntêx, phênhv ntâu pêx xênhv đê thiaz ciz yuôx zêx trơưk iz txưv sưv zôngv xưz, tsik nju. Txix thâuv HTX yuôx zêx shan lâuk Suối Khang tâu tsa yênhx tưz paz têx yuôx zêx muôs tâu gri đuô.

Niav lâuk Miv Xênhv Thox, Giám đốc HTX yuôx zêx shan tuyết lâuk Suối Khang, haik tiak: Hâu shông 2026, têx ziv pêx xênhv chos yuôx zêx tưz siz khov tsa HTX, kriz đar nzir têz chos yuôx zêx nto 4 ha, uô vax vâuv zuz yuôx zêx muôs trâu pêx xênhv chos. Têx nênhs siz chos côngv uô nox tâu paz nhiax zuôr máy ciz yuôx zêx, uô hnaz trâu yuôx zêx, huôv tsar nzir ntâu zav yuôx zêx muôs tâu gri, li: bạch trà 1 chiaz muôs tâu 1 triệu 500 cxênhz nhiax, hồng trà 1 chiaz muôs tâu 600 cxênhz nhiax, iz ziv sâu tâu txix 60 - 80 triệu nhiax/shông. Nhiv no, HTX taz tov đros têx phòng chuyên môn ntơưv xã cxiv tsa hax huv OCOP txix yuôx zêx shan tuyết, piar kria têx hax huv jông trâu cxuô qơư, paz pêx xênhv sâu nju nhiax txiax.

Iz chas huôv tsar yuôx zêx, nhiv no, pêx xênhv xã Suối Tọ cux kriz tâu 116 ha liax kiz ntai, chos zuôr luôs 500 ha poz cưk txuôv, 215 ha kok ntông thiaz kok blôngx njê; iz shông têx kôngz muôx njiaz sâu tâu 2.276 tấn. Zus trơưr 6.620 tus tsiax lox, yax 18.000 tus kaiz ok, chos zuôr luôs 50 ha tâux puz tsiax. Xã xair iz cxia jok fiv huv kriz 8 luz yar tsiax, huôv tsar nênhk thiaz nhux. Côngz xưv por hưv thiaz saiz car har jôngr ntơưv Suối Tọ tâu zok saiz car yax 11.250 ha har jôngr, yênhx shông tâu paz 500 triệu nhiax hưv jôngr, paz ntâu ziv pêx xênhv muôx nhiax txiax cxơưz cxiv luz nênhx; tỷ tsôngv jôngr nzôngr nto 40%. 

Tsik zos huôv tsar nhiax txiax xưz, xã Suối Tọ tưz gruô hu cxuô zav pênhr txix li nhiax têz qơưk paz lês cxuô luz luôs hâux lưv chia uô cêr puô tsar zav. Txix shông 2025 txos nhiv no, xã tưz paz 41 ziv pluôs uô tâu tsêr nhoz, xav yax 2 tỷ 600 triệu nhiax; lês siz luôs jok cxuô zav pênhr uô cêr bê tông txix ntơưv jok Suối Dinh txos jok Bắc Bẹ A, Bắc Bẹ B; Suối Tọ muk trâu Suối Ngang; kho txox cêr Suối Gióng, Suối Ó, Suối Dinh, tas nro yax 31 tỷ nhiax. Đros Viettel Sơn La siz chos uô têx ndêx txaik huôz chuô ntơưv têx jok: Suối Gióng, Suối Ó, Suối Ngang; chaz xor tôngx wifi muk txos 4 luz jok Suối Dinh, Bắc Bẹ A, Pắc Bẹ B, Pắc Bẹ C.

Zơưs Sa Đức Toàn, Chủ tịch UBPX xã Suối Tọ, haik tiak: Suối Tọ sir jos txo tỷ tsôngv ziv pluôs trơưk chai yiaz yênhx shông grik tsơưs đuô 3%; fênhx đraz pêx xênhv xênhv sâu nhiax txiax txos shông 2030 njuôk li shông 2025 cov tsar 15%. Xã tror gruô hu cxuô zav pênhr, hâur ntơư cxưx nhiax uô txox cêr txix xã Phù Yên muk txos đrôngs xã Suối Tọ, uô txox cêr txix xã Suối Tọ - Tà Xùa, uô cxuô txox cêr yêz jêx jok, cêr xã cov jông pêx xênhv thiax zôngx ziv thâux hax huv. Iz chas ntơư, car shênhv têx zav muôx txơưv, txux chi thiaz têx hax huv jông, huôv tsar kôngz lông truôx njês đros đraiv por hưv har jôngr thiaz huôv tsar nuôv zax jêx jok, ndis uô si. Xã chia siaz zuôr tror tâu cxuô cấp, cxuô ngành paz chia huôv tsar nzir, cov pêx xênhv muôx hâux lưv uô truôx njês.

Txix iz luz xã pluôs, Suối Tọ taz tov iz thênhv jux juk huôv tsar cov truôx njês hâur ntu hlôngr yiaz. Shông 2025, tỷ tsôngv ziv pluôs ntơưv xã grik 4% njuôk li shông 2024, tsênhv yuôr yax 26%. Txơưv tiak tov hâur ntêx tsênhv yuôr ntâu cêr phiv liv, taz sik tas nro cấp ủy, nov hâu thôngx siaz siz chos jos sir jos njok, chia siaz xã zuôr nzor tơưv đhâu cêr txov nhêv chia huôv tsar.