Nhiv no, xã Mường Bú muôx zuôr luôs 33 ha txir lưv tsiz lox, chos ntâu ntơưv têx jok: Ta Mo, Hua Bó, Tiểu khu 2, Búng Diến, Mường Bú, Nang Phai, Đông Luông... Shông no, tâu jông ntux, têx txir xav đê tâu 380 tấn, tsar zuôr luôs 130 tấn njuôk li chaix no tsaiz no. Txir lưv tsiz lox jông gâux, kaz jiz, viv li tưz tâu têx tuz luôv tuôx zuôr cias ntơưv vax txir, tus gri txix 20.000-35.000 đaiv/chiaz.

Tix lâus Lò Văn Thâng, jok Đông Luông zis nênhs, nhiv no muôx zuôr luôs 1 ha đros trâu yax 200 tsoz txir taz tov txos chaix siar. Têx hnuz no, nưk zis nênhs tưz ntiar nzir 10 lênhx nênhs hâur thax tsav chia đê txir thiaz ntiv hnaz, đros trâu tus gri fênhx đraz txix 300 - 350 cxênhz đaiv/nênhs/hnuz.

Tix lâus Thâng thav pâuz: Thâuv ntêx cur zis nênhs tsuôk zos chos poz cưk, kok ntông, viv li sâu tsik tâu nju nhiax. Shông 2016, tov kaz muk cơưv tsưr ziv chos txir lưv tsiz lox ntơưv têx zis nênhs hâur xã, cur zis nênhs tưz hlôngr chia chos txir lưv tsiz lox. Thâuv hâu chiv txos nhiv no, tưz sâu tâu yax 5 tấn txir lưv tsiz lox, muôs tâu zuôr luôs 150 triệu đaiv. Iz chas muôs trâu têx tuz luôv, zis nênhs tsênhv muôs sâuv Facebook, Zalo, tưz muôx ntâu lênhx tuôx ndis shuôk, cơưv shâuv tsưr ziv chos txir ntơưv no.

HTX Đoàn Kết, tiểu khu 2 zos iz hâur têx qơư sâu zuôr txir lưv tsiz lox trâu tuz kôngz thax tsav xã Mường Bú thiaz têx qơư nhoz jê iz ndis. Thâuv txos chaix sâu txir, yênhx hnuz HTX tưz sâu zuôr luôs 5 tấn txir lưv tsiz lox chia muôs trâu têx tuz luôv hâur tỉnh thiaz oz chas tỉnh. HTX paz muôx hâux lưv uô iz ntu trâu 15-20 lênhx hâur thax tsav đros trâu tus gri txix 250-300 cxênhz đaiv/nênhs/shông. 

Pos Lò Thị Thủy, Giám đốc HTX Đoàn Kết, haik pâuz: Têx shông lok no, HTX tưz zaz zâuv tuz kôngz tu txir trơưk faz hur, tsik sir zôngv yuôx tuô caz, tuô đrox ntâu, moz siaz tso qir hữu cơ chia cov têx txir kaz jiz, jông gâux. HTX cux siz khov đros têx nênhs chos txir lưv tsiz lox chia paz zuôr tas hur si têx txir. Chiv shông no siar nzor đuô 10 - 15 hnuz njuôk li cxia shông, viv li muôs cux zôngx ziv đuô.

Txir lưv tsiz lox tưz iz thênhv jux juk yênhx zav txir chos zov chênhr paz trâu tuz kôngz xã Mường Bú sâu nju nhiax txiax sir zôngv. Zơưs Lù Văn Quí, Chủ tịch UBPX xã Mường Bú, thav pâuz: Hâur ntu zuôr txos, xã zuôr tror zaz zâuv pêx xênhv kriz đar qơư chos trơưk faz fiv huv đêx ar, huôz chuô hâur thax tsav. Đros ntơư, kria tuz kôngz tu trơưk tsưr ziv hur, moz siaz siz khov đros têx hợp tác xã, tsêr luôv hâur muôs hax huv, iz thênhv jux juk cxiv tsa thax qơư chos uô cê thiaz paz trâu txir lưv tsiz lox ntơưv Mường Bú muôs tâu gri đuô.

Txir lưv tsiz lox ntơưv Mường Bú tưz iz thênhv jux juk paz trâu têx tuz kôngz sâu nju nhiax txiax sir zôngv, kriz đar tsưr ziv huôv tsar ntông nox txir trơưk faz hax huv, paz trâu pêx xênhv hâur thax tsav luz nênhx tâu jông đuô.