Thôn 2 nhoz cias hâur tơư trôngz Chiềng Pấc. Shông 1975, mnôngs trơưk Đảng luk gruô hu, yax 70 lênhx tuz nxaik hluôk zos têx đảng viên, đoàn viên gruôs nhoz têx tỉnh Thái Bình, Hưng Yên, Hà Tây (kuz), tưz uô ntêx hlo tuôx cxiv tsa thax tsav huôv tsar nhiax txiax yiaz trâu ntơưv no.

Têx hnuz thâuv nhiv kruôr tuôx trâu Thuận Châu, cêr muk lok tsênhv njiz ntâu cêr txov nhêv, hla đhâu ntâu kror phiv liv, tâu kror jông siaz sir jos huôv tsar nhiax txiax, đros kror Đảng, Têz qơưk moz siaz, muôz nhiax uô ntâu zav hâux lưv; txox cêr lox số 6, cêr lox muk lok hâur tỉnh 107 tưz tâu cxiv kho, pêx xênhv hâur thôn tưz yêv lok nhoz trâu oz saz ntus cêr chia zôngx ziv muk lok pâur muôs hax huv, viv li pêx xênhv luz nênhx zênhv hnuz zênhv tâu jông.

Nhiv no, thôn 2 tưz yênhx kror qơư lês jông hâux lưv txơưx huôv tsar nhiax txiax thiaz cxiv tsa jêx jok yiaz hov lông trâu sơưr đơưk cơưv shâuv. Thôn muôx yax 70% ziv nênhs uô lax luôv li: Muôs hax huv, kho yêz; têx chuôz zênhx điện tử, tủ txiak lâux câuz điện, yêz mair; chuôz zênhx cxiv puôz, muôs jâuz mor… Thôn muôx 3 hợp tác xã, tsêr luôv, sâu tâu txix 700 triệu nhiax txos 2 tỷ nhiax/shông; xav sâu fênhx đraz tâu yax 72 triệu nhiax/lênhx/shông; tsuôk zos yuôr 4 ziv pluôs zos têx nênhs lâuk tsik muôx nênhs tu zus, ziv nênhs muôx moz; têx ziv tâu jông, bluô nux txênhz yax 60%; 100% ziv tâu tơưk điện nhaz xênhz, sir zôngv đêx hur; thôn tsik muôx ziv nênhs tưs nhoz tsêr khâuz hlaz; 80% ziv nênhs tâu công nhav muôx txux chi 3 shông siz lơư lias.

Nhiax txiax huôv tsar, 189 ziv hâur thôn tưz moz siaz côngv nhiax, hnuz jos cxiv tsa jêx jok yiaz. Txix li 1,2 tỉ nhiax zos Têz qơưk paz, đros 400 triệu nhiax thiaz yax 1.000 hnuz côngv đas jos, thôn tưz muôz nhiax uô tiar vax tsêr, cêr muk lok. Txos nhiv no, 100% cêr muk lok hâur thôn tưz lênhv tas bê tông; 100% ziv puôr lênhx lês jông hâux lưv qêz khơưs khâuz nhaz qơư nhoz đu lus, hur si, muôx 5 kror qơư sâu hlơưr por tsês khâuz nhaz nhoz uô cê. Tsưx truôx cêr nox nhoz njias to, thôn tsik muôx nênhs uô luôv zênhz, kuôr zênhz thiaz têx nênhs zuôv chai. Cêr sik tưr thể dục thể thao, haik cưr cxiax tâu txuôs jông thiaz huôv tsar, đros trâu 6 paz haik cưr cxiax, sênhr chêr đros muôx yax 60 lênhx.

Luz kaz hli 9 nhiv kruôr đhâu, xã Tông Lạnh tưz fuô thôn 2 tâu côngz jêx jok yiaz, jêx jok yiaz hov lông trâu sơưr đơưk cơưv shâuv lok sâuv txux chi jêx jok, tưz chuôz jos trâu pêx xênhv sik tưr huôv tsar kôngz lông, txuôs jông têx tiêu chí jêx jok yiaz hov lông trâu sơưr đơưk cơưv shâuv. Têx ziv hâur thôn taz tov sik tưr txơưx huôv tsar kôngz lông, nhiax txiax ziv nênhs, cxiv tsa thax tsav zênhv hnuz zênhv bluô nux, jông jav./.