Hội LHPN xã Chiềng Hoa muôx 35 chi hội pox niav jok, 2.557 lênhx hội viên. Hâur ntơư, 21 chi hội pox niav nhoz têx jok tox siaz thiaz 14 chi hội pox niav nhoz thax tsav ntus đêx Đà. Hội LHPN xã tưz fuô cêr siz tưr, cxơưz nhiax txiax huôv tsar, txux chi, xã hội. Iz chas ntơư, cxiz đuô cán bộ muôx txâuk pênhr xưv, chuôz jos trâu cán bộ cuz siaz lês cêr siz tưr pox niav txix cias hâur têx jêx jok; kria nzir tsưr ziv lês hâux lưv trâu cán bộ hội. Hâur 5 shông đhâu, thôngz xã tưz muôx 84 lưv cán bộ hội thiaz hội trưởng muk cơưv lớp nzir tsưr ziv lês côngz xưv hội.

Pos Thanh Xênhv Zax, Chủ tịch Hội LHPN xã, haik: Cxuô lênhx vir ndâuk thôngz xã 100% zos hair nênhs tsơưs, hâur ntơư, zuôr tsuv sir jos khưr. Taz sik, tsik txơưx ntơưr, tsênhv sưv zôngv cêr chai kuz ntâu, li ntơư tỷ tsôngv hội viên côngv tổ chức hội tsênhv tsơưs. Chia cov sơưr pâuz mênhx txiax njis thâuv côngv tổ chức hội pox niav muôx liv, Hội LHPN xã tưz kria cxuô zav hâux lưv paz hội viên. Kria cxuô chi hội cxênhz tsik so saiz tsôngv vir ndâuk uô nênhx li chak, têx pox niav nhoz tsêr, pox niav muk uô hâux lưv đêz thiaz pox niav tsik tâu côngv hội bâuv li chak lênhx chia njuôk tsov saiz lơưr chia siaz đaz tsi, gruô hu têx vir ndâuk côngv Hội.

Sir jos njok hla đhâu cêr phiv liv, ntu 2021-2025, cxuô cơ sở hội thôngz xã tưz muôx nzir 254 lênhx hội viên yiaz; tỷ tsôngv pox niav côngv hội txênhz 75%/shông. Hâur ntơư, muôx hội viên hluôk, hội viên txơưx ntơưr. Lar haik, tưz muôx ntâu lênhx vir ndâuk njênhs cêr chai yiaz ntơưv jok Đin Lanh, Hán Cá Thệnh côngv lês hâux lưv thiaz cêr siz tưr hội.

Lês cêr siz tưr huôv tsar nhiax txiax, Hội tưz trâu siaz njo gruô hu hội viên hlôngr nôngz kôngz yiaz lok chos, cov nju nhiax txiax. Tsik tas li, tsênhv đros tsêr Nhiax CSXH thax tsav Mường La paz 422 ziv hội viên txaik hur tiz si nto 17 tỷ 100 triệu nhiax pênhr. Iz chas ntơư, Hội siz chos kria trâu tsôngv hội viên cơưv têx jias kria tsưr ziv nriar hâux lưv ntơưv xã chia xair hâux lưv uô fiv huv thiaz muk uô hâux lưv trâu oz chas têz qơưk. Nhiv no, xã muôx yax 200 lênhx pox niav muk uô hâux lưv ntơưv têx qơư công nghiệp oz chas tỉnh, iz hli, iz tus nênhs sâu tâu txix 7 - 9 triệu nhiax.

Lês cxuô cêr siz tưr, Hội muôx têx hâux lưv “Ziv nênhs 5 tsik muôx 3 hur” đros đraiv cxiv tsa jêx jok yiaz. Yênhx shông, muôx yax 50% ziv hội viên lês jông hâux lưv “5 tsik muôx 3 hur”. Muôx 1 kror qơư lês jông “3 hur” ntơưv jok Mạo; muôx 15 txox cêr pox niav tưx saiz car thiaz uô yiaz 1 “Ntu cêr pox niav tưx saiz car” ntơưv jok Hát Lay. Txix thâuv hâu shông txos nhiv no, cxuô chi hội tưz gruô hu zuôr luôs 300 lưv pox niav tu cêr nyiaz hur. Iz chas ntơư, Hội tsênhv siz chos fuô kria siz luôs jok cxuô cêr chai cov hội viên thiaz nhiak vax tsê tsik zuôv chai toz hâu nênhs, tsik siz chês siz ntâuk; kria cov hội viên thôngz chai.

Lês trơưk cêr gruô hu “5 tsik tsik muôx 3 hur”, Chi hội pox niav jok Mạo tưz trâu siaz fuô chai, gruô hu hội viên siz chos lês hâux lưv “Jok 3 hur” (tsêr hur, tsêr mor hur, tos vax tos tsêr hur). Niav lâuk Hoa X Lâux, Chi hội pox niav jok Mạo haik: Chi hội muôx 31 lênhx hội viên. Pêz tưz fuô chai, gruô hu tsik so cov têx hội viên pox niav shâuv tu vax tsê cov hur, qêz tsik so cêr jok, kaz vas tsiz tâus cov đu lus. Đhâu ntơư, nthuôr huôv phênhv shuôv pox niav por hưv cêr nyiaz hur.

Côngz xưv cxơưz hội viên pox niav luz nênhx, Hội LHPN xã tưz shuôk, nthuôk 24 lênhx hội viên ntux hiav; siz chos côngv tâu 2.200 hnuz jos paz yêv vax tsê, uô đuô tsêr yiaz. Txix cxuô zav tâu paz tưz puz 1.040 luz kror chuz txuôs tơưk, 1.010 luz thôngz liv đêx mini, paz hội viên tâu jông đuô. Iz chcas ntơư, cux paz pox niav hair nênhs tsơưs tu mê nhuôv nhaz xênhz, tsưx hưv đas jos trâu mê nhuôv zâu, Hội tưz fuô chai, gruô hu tsôngv pox niav hâur thax tsav xã xênhz mê nhuôv muk zus ntơưv têx tsêr kho moz cov tâu zôngv têz qơưk têx chai paz tu mê nhuôv nhaz xênhz.

Iz chas têx hâux lưv tưz lês tâu, côngz xưv hội thiaz cêr siz tưr pox niav ntơưv xã Chiềng Hoa tsênhv yuôr ntâu cêr phiv liv. Đros trâu Hội LHPN xã Chiềng Hoa thiaz cxuô chi hội siz chos sir tas đas jos, cxuô cấp, cxuô ngành, đoàn thể paz hội viên pox niav tâu cơưv hâur pâuk ntơưr; tâu txaik pênhr, nôngz kôngz, nôngz tsiax cxu thiaz kria kỹ thuật trâu hội viên pox niav cov tơưx tơưv đhâu cêr pluôs. Tror uô jông lês luôs hâux lưv fuô kria chai pox niav txir nênhx vax huôv siz luôs, phax tar ziv nênhs siz ntâuk, cxênhz jê tsik chia tuz nxaik siz zuôr, tsik tâu txưv shông tsik siz zuôr... Txix ntơư, paz tsôngv vir ndâuk thôngz chai jux juk, paz pox niav tox siaz chuôs tâu cêr vav mênhx, truôx siaz, shuôv xiv hâur ntu yiaz.