Tỉnh đoàn thiaz têx tổ chức đoàn saiz car tưz tso yar ntâu têx cêr siz tưr muôx txiax njis li: “Hluôs nênhs tưx zênhv lês hâux lưv”; “Hluôs nênhs lês tâu hâux lưv jông”; “Hluôs nênhs côngv têk cxiv tsa jêx jok yiaz”; “Hluôs nênhs đros trâu txux chi tsav yêz tâus cêr nhaz xênhz”; “Viv têx shuv xênhz hmor yuô”; hluôs hâux lưv “Tưx zênhv lês hâux lưv chaix ntux tsâus”, “Tưx zênhv lês hâux lưv chaix ntux yiaz”... Chia paz muôx qơư lês hâux lưv nhaz xênhz trâu hluôs nênhs, moz siaz cơưv shâuv, lês hâux lưv thiaz nthuôr huôv jông vax huôv uô ntêx lông lês hâux lưv.

Zov chênhr zos cêr siz tưr “Cur nhiav cur luz têz qơưk” đros trâu hâux lưv “Hluôs nênhs tưx zênhv lês hâux lưv chaix ntux sor”, tưz paz trâu têx hluôs nênhs nhiav têz nhiav qơư đuô, cxơưz paz trâu têx hluôs muôx nzir phênhv shuôv trâu tus khênhx, zis nênhs thiaz xã hội. Hâur shông 2024, têx tổ chức đoàn tưz siz chos kriz 1.365 jias tưx zênhv lês hâux lưv, gruô hu yax 46.000 lưv hluôs nênhs, tuz lênhv, công an côngv cxiv tsa jêx jok yiaz, đrôngs vav mênhx, têx hâux lưv paz têx nênhs txov nhêv hla đhâu cêr phiv liv... Gruô hu tâu zuôr luôs 15,5 tỷ đaiv chia uô qox, tsêr nhoz, yar tiax trâu mê nhuôv zâuk uô si…

Lês trơưk jias Gruô hu “Viv têx shuv xênhz hmor yuô”, têx tổ chức đoàn hâur tỉnh tưz fuô lês 117 hâux lưv, xav nhiax yax 3,8 tỷ đaiv chia paz trâu 42.506 lênhx mê nhuôv zâuk; puz 1.636 poz huv zos nhiax trâu têx mê nhuôv zâuk njiz cêr phiv liv, xav nhiax yax 684 triệu đaiv…

Tix lâus Vi Tuấn Bảo, Phó Bí thư Thường trực Tỉnh đoàn, haik pâuz: Chia gruô hu tâu chôngz lênhx hluôs nênhs côngv lês têx cêr siz tưr, Tỉnh đoàn tưz moz siaz hlôngr yiaz têx njiaz luk, tsưr ziv siz tưr kruôk; moz siaz kruôk têx nênhs lês tâu hâux lưv jông, moz siaz xar tơưv, uô tâu, paz trâu fâuv hluôs moz siaz cơưv shâuv, uô hâux lưv thiaz cxơưz paz cxiv tsa Sơn La zênhv hnuz zênhv bluô nux.

Hâur shông 2024, Tỉnh đoàn tưz kruôk 14 “Hluôs nênhs lês tâu hâux lưv coz”; 57 “Cưk kria hluôs lês tâu hâux lưv jông”; 7 “Cán bộ, công chức, viên chức hluôs lês hâux lưv coz”; 104 “Shuv xênhz 3 jông”, “Shuv xênhz 3 tsiv txiax”; 24 lênhx hluôs nênhs hair nênhs tsơưs lês tâu hâux lưv jông hâur fuô lês cêr siz tưr “Cur nhiav cur luz têz qơưk” ntu 2019-2024…

Ban Thanh niên Công an tỉnh Sơn La puôr lênhx uô ntêx lông lês têx hâux lưv, zov chênhr li Dự án “Paz tu zus têx mê nhuôv Mộc Châu” tâu fuô lês txix shông 2021. Txos nhiv no, tưz gruô hu tâu 112.000 lênhx nênhs đros lês hâux lưv, paz 7,9 triệu pluôk mor, xav nhiax nto 39 tỷ đaiv, paz yênhx cxênhz lênhx shuv xênhz njiz ntâu cêr phiv liv hâur thax tsav tỉnh. Yax hlo, Dự án tưz huôv tsar yênhx 10 zav hâux lưv zâu, li: “Đêx hur trâu têx mê nhuôv”, “Paz yo pax trâu mê nhuôv”, “Cêr shir phaz trâu mê nhuôv”, “Paz mair tính trâu mê nhuôv”... tâu lês zênhv hnuz zênhv nto mông đêz đar.

Thượng úy Dương Hải Anh, Thơưx ban Thanh niên Công an tỉnh, haik pâuz: Hâur shông cơưv 2024-2025, Dự án zuôr tror paz pluôk mor su trâu yax 12.000 lênhx mê nhuôv hâur 8 huyện thax tsav tỉnh thiaz iz cxia huyện njiz cêr phiv liv hâur tỉnh Hủa Phăn thiaz Luông Pha Băng têz qơưk Lok Tsuôk; cxiv puôz 15 luz tsêr cơưv, 6 luz tsêr siz hluz, 6 qar cơưv mair tính thiaz puz yax 12.000 luz yo pax trâu mê nhuôv zâuk tox siaz; kriz 51 jias tưx zênhv lês hâux lưv, đros trâu yax 18,6 tỷ đaiv chia cxiv puôz cxuô zav paz trâu mê nhuôv zâuk, pêx xênhv mas ntux nas hiav, lês hâux lưv hâuk đêx ndo kror cxơưr, njuôk kho moz tsik zuôr nhiax.

Têx cêr siz tưr zos Tỉnh đoàn Sơn La tso yar tưz cxơưz paz zov chênhr trâu hâux lưv choz kria siaz xav nhiav têz, nhiav qơư, cxaz nzir cêr pâuz trâu fâuv hluôs. Tsi njênhk tâu qơư sơưr uô ntêx lông lês hâux lưv, moz siaz cxiv tsa thax tsav zênhv hnuz zênhv bluô nux, jông jav.