Nhiv no, chax chês ntok ntâuz pas ntơưv Gia Phù muôx 115 ziv pêx xênhv ntơưv jok Bùa Chung thiaz Nà Khằm tsênhv tsưx hưv truôx, paz 140 lênhx muôx hâux lưv uô. Xơưk: Pav siak, pav vor, tos trâu ndông, fuôv, tos pax jâuv thiaz xơưk hnaz đai uô jav, ntâu zav ntâuz pas.

Txix têx xor pax, xor pưv chiz ntâu xiv, đhâu pox niav oz cxaik têk, tưz ntok tơưv ntâu zav ntâuz, uô tâu ntâu tsar ntâu zav. Yênhx zav ntâuz tsik zos zôngv phaz nzưr xưz, mal tsênhv muôx txiax njis lok sâuv txux chi cênhz cưv tâu tsưx hưv hâu ntâu tiav nênhx. Pos Hoàng Thị Toan, jok Bùa Chung 2, xã Gia Phù, haik: Txix thâuv cur tsênhv zâu, tưz zênhx tâu têx pos, niav taik thiaz niav kria giuk xor pax, shâuv ntok ntâuz. Txos nhiv no, tsênhv ndo njôngr tuôr truôx têx txux chi chia kria trâu têx xênhz nzưr. Kror shir phaz yax mak, têx ntâuz pas tsênhv muôx nênhs zuôr chôngz, chuôz jos trâu pêx xênhv cuz siaz tsưx hưv truôx têx cênhz cưv jông. 

Têx hax huv zôngv ntâuz pas uô tơưv tâu zôngv đraiv hâur pêx xênhv luz nênhx, zôngv ntâu yax mak hâur têx ntu uô đaz uô kruô thiaz Tsiaz Pêz châus, yôngz cok, têx chêr tsôngk ntâuz pas, pav vor pav puô, tos trâu ndông, fuôv lok six tsênhv chênhz. Viv li, txos luz chaix uô yôngz, têx ntâuz pas thiaz cxuô zav zôngv ntâuz pas uô mak nênhs zuôr lok six chôngz.

Pos Đinh Thị Hiền, jok Nà Khằm, haik: Têx nxaik Puôz Ziz, Mêx Jênhx mak uô ntêx thâuv zuôr muk zuôr txir, zuôr tâu bax cxix ntâuz, pav vor, pav puô cxuô zav uô ntêx chia chox muk puz têx cxênhz jê tos niav txir pox zơưv. Têx shông lok no, cxuô zav zôngv ntâuz pas uô tâu kruô hâur xã thiaz oz chas zuôr lok six ntâu. Txos luz chaix muôx nênhs uô yôngz chôngz, kruô Bắc Yên, Phù Yên thiaz tỉnh Tuyên Quang tuôx zuôr pav puô, tos trâu ndông, ntâuz pas lok six ntâu. 

Nthuôr huôv cênhz cưv iz txưv muôx, Hội Liên hiệp Pox niav xã Gia Phù tưz tsa iz paz nênhs ntok ntâuz pas Puôz Ziz, Mê Jênhx, muôx 15 lênhx. Zos kror qơư chia têx nênhs nhiav ntok ntâuz pas, siz khov uô tơưv ntâu hax huv, siz cơưv tsưr ziv uô têx ntâuz jông muôs uô lax luôv. Ntâu lênhx hội viên, pox niav tâu cơưv nzir kỹ thuật ntok ntâuz, huôv tsar nzir têx hax huv yiaz fiv huv kruô, tsưx hưv thiaz nthuôr huôv zav cênhz cưv txux chi jông.

Niav lâuk Mùi Thị Lương, Thơưx chox paz nênhs ntok ntâuz pas Puôz Ziz, Mêx jênhx ntơưv xã Gia Phù, haik: Iz chas muôs trâu iz ndis hâur thax tsav, mak têx ntâuz, hax huv uô tâu tsênhv tâu piar muôs đhâu mạng xã hội, têx hnuz kriz ciaz lax luôv, hnuz nthuôr txux chi. Ntu no muk, zuôr tror gruô hu nzir nênhs siz chos huôv tsar, njuôk tsov uô ntâu zav ntâuz thiaz hax huv yiaz, trơưk cêr lax luôv, paz trâu tsôngv pox niav hâur thax tsav no muôx hâux lưv uô, sâu nju nhiax txiax.

Pos Ninh Thị Tâm Bình, Chủ tịch UBPX xã Gia Phù, haik: Xã xav mênhx hâux lưv tsưx hưv cênhz cưv chax chês ntok ntâuz pas, tsik zos tsưx hưv tâu têx txux chi jông xưz mak tsênhv paz pêx xênhv muôx hâux lưv uô, sâu tâu nju nhiax txiax. Xã zuôr tror đros têx tổ chức đoàn thể siz chos piar muôs têx hax huv uô tâu, kriz đar cêr luôv, huôv tsar cênhz cưv txux chi đros đraiv nuôv zax jêx jok thiaz cxiv tsa jêx jok yiaz.

Hâur ntu nênhx hlôngr yiaz nhiv no, têx pox niav Puôz Ziz, Mêx jênhx ntơưv Gia Phù tsênhv niax hnuz trâu siaz njo ntok tơưv ntâu zav ntâuz pas. Têx ntâuz pas no, tưz uô tơưv ntâu tsar ntâu zav taz tov zôngv trơưr cxuô hnuz, tsưx hưv truôx têx txux chi cênhz cưv jông iz txơưv pêx xênhv muôx txơưv.