Phù Yên muôx zuôr luôs 25.000 zis zos hộ dân là pêx xênhv hair nênhs tsơưs, nhoz trâu cxuô thax tsav hâur huyện. Têx zis pluôs thiaz jê cêr pluôs tsênhv yuôr ntâu. Zơưs Phan Ngọc Linh, Phó Chủ tịch UBPX huyện, haik pâuz: Huyện tưz chox car txuôs đros trâu hâux lưv, dự án chia muôz nhiax cxiv tsa uô, cxơưz huôv tsar nhiax txiax - xã hội têx xã txov nhêv, thax tsav pêx xênhv hair nênhs tsơưs; sir zôngv muôx liv têx nhiax ntơưv têx luôs hâux lưv, dự án, xuz muôz paz trâu pêx xênhv trơưk chai.

Hâur shông 2024, xav hur si nhiax têz qơưk luôs hâux lưv cxiv tsa jêx jol yiaz yax 7 tỷ nhiax; têz qơưk luôs hâux lưv cxuz cêr yaiz pluôs truôx njês 37,7 tỷ nhiax thiaz têz qơưk luôs hâux lưv huôv tsar nhiax txiax - xã hội thax tsav pêx xênhv hair nênhs tsơưs thiaz tox siaz yax tas 113 tỷ nhiax. Zơưs Nguyễn Văn Bắc, Thơưx phòng Kinh tế - Hạ tầng huyện Phù Yên, haik pâuz: Shông đhâu, huyện muôx 81 txox cêr tâu cxiv puôz, xav đêz 35,4 caik cêr. Txos nhiv no, 100% têx xã thax tsav huyện muôx cêr yêz mul txos trung tâm xã tâu lênhv đu lus; 80% têx cêr mul trâu cxuô jol, hâur jol tâu lênhv bê tông. Cxuô txox cêr tâu muôz lol zôngv chia huôv tsar nhiax txiax- xã hội thax tsav pêx xênhv hair nênhs tsơưs.

Iz chas ntơư, Phù Yên tưz chox car têx cơ quan cik txos kria tsưr ziv uô kôngz lông, chos ntông nox txir, zus tsiax cơư guôx, zus tsiax đêx, chos iz cxia yuôx njuôz trâu xuz jôngr. Zaz zâuv pêx tu jông yax 2.460 ha ntông nox txir. Shông 2024, xav hur si cxuô zav txir nox sâu tâu 4 cxênhz tấn. Pêx xênhv cxuô xã tox siaz tưz uô jông tu 151 ha tsax njuôz. Tsưx truôx yax 1.300 ha tâux, txâuk jâuz puz yax 120.000 tus tsiax. Tas shông 2024, xav hur si têx tsiax cxu hur si huyện zuôr 919.500 tus. Nzaz nzơưv muôx 3.350 ha zuss tsiax đêx, xav hur si suô tâu 2.760 tấn/shông. Zơưs Bạc Cầm Thiếp, jol Thượng Lang, xã Mường Lang, thav pâuz: Tâu xã fuô kria, zaz zâuv, cur zis nênhs tưz hlôngr 2 ha têz chos poz cưk tsik jông chia chos ntông nox txir. Iz chas ntơư, muôz nhiax zuôr yax 1.000 tsoz zuz mỡ chia chos thiaz tâu cán bộ Trung tâm Dịch vụ nông nghiệp huyện kria tsưr ziv chos thiaz tu.

Tror fuô lês jông cxuô cêr chai cxơưz paz pêx xênhv, đros trâu têx nhiax muôz txix li têz qơưk luôs hâux lưv, huyện Phù Yên tưz iz thênhv jux juk cxơưz paz pêx xênhv vùng pêx xênhv hair nênhs tsơưs, cxơưz nhiax txiax - xã hội nhoz têx xã, jol txov nhêv.